Última Pascua ni buny Jesús nigolú gosacni. Ma yaca gaitybu por ngú bunybu Pascua né xpiimbu né dzúcu gochbu xpiimbu ñony Cena del Señor. Gonabbu Pedro né Juan ñonytzaay toib lagarien (Lu 22:7-13; bibiʼ dibuj ni sieed laidy guiich reʼ). Ndeʼ racné lóono guidudyno cuent que nigolú rasac tzoʼno puext par tzoʼno Memorial ni gac 27 de marz. Guirá congregaciones maca golúyibu ni guitudy discurs, ni tzané páa, vino né stipnés cós. Per ¿xí non gonyno par tzoʼno puext dzúcu?

Coʼno puext xcalnabanyno. Órni golno textos ni noʼ par Memorial gonyno pensary loni. Ló follet ni laa, Examinemos las Escrituras todos los días sieed toib programa. Ló apéndice B12 ni sieed ló La Biblia Traducción del Nuevo Mundo né ló guiich ni laa, Ni non gonyno ló reunión beʼo abril íz 2020 sieed stoib programa ni labúu guiquiinno. Pal nainy guisuidylo né xfamilo xigony rasac guidudyno guixquix por xcalgoity Jesús, sadzelo más información ló Índice de publicaciones Watch Tower né ló follet ni laa, Ni gacné a Testigos.

Guiruʼno stipnés buñ. Gonyno rutirigaʼlni lóono guiruʼno buñ par guidxin ló Memorial. ¿Chú layibu labúu guiruʼno? Labúu guiruʼno buñ ni ma goyguenno tibuelt, buñ ni bisuidy la Biblia né lóono nírcu, xfamilno né buñ ni rimbuno. Ancianos non gonyibu xtem par guiruʼyibu hermanos inactivos. Guisetnaladxno que pal biruʼno toib buñ ni diti rabés ló territorio xtunyno, tzoʼno ló jw.org/zpa né cú guiyopyno pu ór né pu lagary gac Memorial. Goyee ro ná, DE LÓODO né biquichña «Memorial».

¿Xí más non gonylo par tzoʼlo puext?