Jesús goniʼ par labúu gacno xpiimbu raquiin tzonisno (bíil Mateo 28:19, 20). ¿Xí radudy diitz tzonis buñ? ¿Né xí raquiin gony toib buñ par labúu tzonis?

1. ¿Xí radudy diitz tzonis buñ?

Ndeʼ radudy diitz guidopyzoo buñ tzoʼ lainy nís. Órni Jesús goyonis, guidopyzobu goyoʼ lainy nís, lainy toib guʼuc ni góc laa Jordán, de ngú «bireʼbu lainy nís» (Marcos 1:9, 10). Órni cristianos ni rasuidy xinésni rionis, láaca guidopyzobu rioʼ lainy nís.

2. ¿Xí raslooy toib buñ órni rionis?

Órni toib buñ rionis, raslooybu que ma góc dedicarbu Jehová. ¿Né xí raquiin gonybu antes de gac dedicarbu Jehová? Raquiin gonybu toib oración ro gaibybu Jehová que nainy láabu gonybu xchiin Jehová por tipzó. Né ndeʼ rac antes de tzonisbu. Ló oración cú raibybu Jehová que nosi Jehová gony adorarbu né ni más guisac par láabu ngú gonybu ni ranab Jehová. Láaca non gonybu rutirigaʼlni láabu par guisuʼbu né guisobbu xcalrrasuidy Jesús. Jesús goniʼ ndeʼ: «Pal noʼ ni ná guieed guicanal naʼ, diti coʼbu cuent láacabu [...] né guicanalbu naʼ guirá or» (Mateo 16:24). Órni buñ rac dedicar né rionis ma más radzakbu Jehová né ma más radzakbu buñ ni rony adorar láabu.

3. ¿Xí non gony buñ par labúu tzonis?

Pal nainy looy tzonislo, primer raquiin guisuidylo de Jehová né raquiin gaplo fe (bíil Hebreos 11:6). Laʼga más rimbulo Jehová né más raplo fe, sandxiʼlo Jehová más. Né ngú sachiin looy guiniʼlo xtiitz Dios né guisoblo láabu (2 Timoteo 4:2; 1 Juan 5:3). Órni toib buñ «ma cayony xinésni», sigory ngú sachiin láabu par gac dedicarbu né tzonisbu (Colosenses 1:9, 10). a

 NANOY GUISUIDYNO LÁANI

4. Guisuidyno xigony goyonis Jesús

Par guientzaayto xigony goyonis Jesús, colgoʼol Mateo 3:13-17. De ngú colgooy xtiitzni:

• Órni Jesús goyonis, ¿nacsabu toib badaʼ la?

• ¿Ximod goyonisbu? ¿Nosi bitzaayibu nís guic Jesús la?

Órni Jesús goyonis, órcu gosalóbu bunybu dxiin ni bidudy Dios láabu. Colgoʼol Lucas 3:21-23 né Juan 6:38, né colgooy xtiitzni:

• Después ni goyonis Jesús, ¿xí dxiin más gosac par láabu?

5. Looy labúu tzonislo

Órni looy ronylo pensary ma gac dedicarlo né ma tzonislo sigory moda ratzuibyni looy. Pal looy casuidyralo más de Jehová né rimbutzaaylo láabu, ndeʼ sacné looy par gonylo láani. Par guimbulo tipnés buñ ni buny láani, colguibiʼ VIDEO reʼ.

Colgoʼol Juan 17:3 né Santiago 1:5, né colgooy xtiitzni:

• ¿Xí raquiin gony toib buñ par labúu tzonis?

1. Rac dedicarno Jehová órni raibyno láabu que nainy lóono gonyno xchiimbu por tipzó.

2. Órni rionisno, raslooyno nisló xidal buñ que ma góc dedicarno Dios.

 6. Órni toib buñ rionis rioʼbu lad xcudx Jehová

Órni rionisno racno xfamil Jehová ni noʼ ló guidopynac Gudxlio. Guirá testigos xtuny Jehová nac nitisi lagary ro sieedyibu o ni ma bunyibu ló dzú ni see, toibsi cós ronyibu crer né rasobyibu Jehová. Colgoʼol Salmo 25:14 né 1 Pedro 2:17, né colgooy xtiitzni:

• Mod ná guirá versículos reʼ, ¿ximod racné galrrionis lóono?

 ¿XÍ BISUIDYLO?

Jesús goniʼ par labúu gac buñ xpiimbu non tzonis. Né par labúu gony buñ láani, raquiin gap buñ toib fe dxich lóo Jehová, guisobno ni nábu né gac dedicarno láabu.

Repas

• ¿Xí radudy diitz tzonis buñ, né xigony rasacni?

• Dedicación né galrrionis, ¿toibsi láani la?

• ¿Xí raquiin gony toib buñ antes de gac dedicar né tzonis?