Ló guidopynac Gudxlio buñ bisaʼsi mod rony pensary de alcohol. Tipnés buñ rioʼ ór reʼ láani né ximig. Stipnés buñ la, diti reʼ xitcal nís ni notz alcohol. Né noʼ ni reʼ dada guisochni layibu. ¿Xí ná la Biblia de nís ni notz alcohol?

1. ¿Mal gueʼ buñ nís ni notz alcohol la?

La Biblia diti náni que mal gueʼ buñ alcohol. Xalagary ngú Xtiitz Dios náni que «vino ragoʼ nakitni xcalnabany buñ» né nacni galrrascad ni ma bidudy Jehová lóono (Salmo 104:14, 15). Láaca ló la Biblia rasetlani de buñguieeu né buñgonaʼ ni dipa bisian a Jehová ni láaca goʼ nís ni notz alcohol (1 Timoteo 5:23).

2. ¿Xí consej radudy la Biblia a guirá buñ ni ná gueʼ alcohol?

Jehová diti nosi ná que mal guisoch buñ, láaca diti láani ngú tudy midid gueʼ buñ nís ni notz alcohol (Gálatas 5:21). La Biblia ná: «Diti tzoʼlo lad buñ ni reʼgolu vino» (Proverbios 23:20). Por ngú, pal ragoʼno guicno gueeno nís ni notz alcohol toibno o ro dxee xidal buñ, dipa tudy midid gueeno, dada guidxin midid gonyno o guinino bisaʼsi cós, o ma diti labúu gonyno pensary sacró. Nili guegoluʼno dada gonyni mal lóono, pal diti labúu rony mandaryno lóono balaati midid gueeno non guisianno láani.

3. ¿Ximod labúu gapno respet ni rony pensary stipnés de alcohol?

Tigaaga buñ non guiniʼ pal gueʼ nís ni notz alcohol o yaca. Diti gony juzgarno buñ ni ná gueʼ nís ni notz alcohol né midid. Nili gony lafuersno toib buñ par gueʼ pal ma goloʼbu guicbu diti gonybu láani (Romanos 14:10). Né diti reeno nís ni notz alcohol pal stipnés diti rasac sacró (bíil Romanos 14:21). Scú láani, cristiano diti nosi rioʼbu galrrasaʼ por láasibu láaca rioʼbu galrrasaʼ por stipnés (bíil 1 Corintios 10:23, 24).

 NANOY GUISUIDYNO LÁANI

4. Ma looy ganlo pal gueʼlo o pal yaca

¿Xí láani buny pensary Jesús de alcohol? Par ganno ximod rarexa galrranabdiitz reʼ guisuidyno primer galrradziguiaʼ ni bunybu. Colgoʼol Juan 2:1-11 né colgooy xtiitzni:

• ¿Xí rasuidy historia reʼ lóono mod bibiʼ Jesús alcohol né mod bibiʼbu guirá buñ ni goʼ láani?

• Jesús diti goniʼbu que mal gueʼ buñ nís ni notz alcohol, ¿xí láani gony pensary toib cristiano de toib buñ ni ma goloʼ guic gueʼ?

Órni toib cristiano ma goloʼ guic gueʼ nís ni notz alcohol diti radudyni diitz que guirá ór labúu gonybu láani. Colgoʼol Proverbios 22:3 né colguiniʼ pal láani gueʼ toib buñ órni:

• Caxony camión o caquiin toib máquina.

• Nacxiin.

• Doctor raiby láabu que diti labúu gueʼbu nís ni notz alcohol.

• Rasac naganbu balaati midid gueʼbu.

• Ley diti radudyni permís gueʼbu nís ni notz alcohol.

• Noʼbu né toib buñ ni ma goloʼ guic diti gueʼ nís ni notz alcohol portín ló dzú ni see godudy midid goʼbu láani.

¿Láani ngú guidudylo nís ni notz alcohol órni rac toib lanii galtzeʼel, o stoib lanii la? Par ganlo xi láani non gonylo, colguibiʼ VIDEO reʼ.

Colgoʼol Romanos 13:13 né 1 Corintios 10:31, 32. Órni ma bilox bíilto tigaaga texto reʼ, colgooy xtiitzni:

• ¿Ximod labúu gacné texto reʼ looy par ganlo xí labúu gonylo par coʼ nakitlo xcalnabany Jehová?

 5. Goloʼ guiclo balaati midid gueʼlo

Pal ma goloʼlo guiclo gueʼlo nís ni notz alcohol, bisetnaladx Jehová diti rabiʼbu mal gueeno nís ni notz alcohol, ni diti rioladxbu ngú tudy midid gueʼ buñ alcohol. ¿Xigony? Colgoʼol Oseas 4:11, 18 né colgooy xtiitzni:

• ¿Xí láani labúu guisaclóo toib buñ órni radudy midid reʼbu?

¿Xí labúu gacné lóono par diti tudy midid gueeno? Raquiin guidudyno cuent dada púti midid labúu gueeno nís ni notz alcohol. Colgoʼol Proverbios 11:2 né colgooy xtiitzni:

• ¿Xigony galán láani ngú coʼlo guiclo balaati midid nís ni notz alcohol labúu gueʼlo?

6. Labúu guisianlo gueʼlo nís ni notz alcohol

 ¿XÍ BISUIDYLO?

Jehová bidudy nís ni notz alcohol lóono par guibaladxno, diti rioladxbu guisoch buñ né dada tudy midid gueʼ buñ láani.

Repas

• ¿Xí ná la Biblia de nís ni notz alcohol?

• ¿Xí rasaclóo buñ órni radudy midid reʼ?

• ¿Ximod raslooyno respet ni rony pensary buñ de nís ni notz alcohol?