ÓRNI yása tzoʼ Israel lainy gudx Canaán, Jehová góoch a Abrahán que xfamilbu guica xalioo Canaán. Né nigoreʼ Josué rasanir nisló israelitas né mápa mer guioʼyibu lainy Layoo ni Jehová Goniʼ guiduidy layibu.

Dios goniʼ que guiránac buñ de Canaán non gaityibu, portín nacyibu buñ mal né ronyibu pór cós yox. Dios gochbu israelitas que guinitlóyibu guiránac gudx de Canaán.

Josué bixel chop buñ par guiláach gudx Canaán antes de ñoʼyibu lagary reʼ. Chop buñreʼ goyoʼyibu lainy gudx Jericó né bidxinyibu lidx toib buñgonaʼ ni laa Rahab. Órni goyoʼ ni biyopy layibu, gonaʼ reʼ bicachlan layibu ná gonbu que chop buñreʼ nacyibu israelitas. ¿Xigony bunybu láani? Portín ma bicadiagbu guirá galrradziguiaʼ ni Jehová buny par bilaa xcudxbu, né nigoreʼ Rahab ma raluladxbu lóo Jehová. Rahab gonab layibu naduidyibu xtiitzyibu que láabu né xfamilbu diti ñaityibu órni nanitló Jericó.

Diti xidzú israelitas goyoʼyibu lainy xalioo Canaán né cualóyibu Jericó. Jehová buny que bidoʼop muros xtuny Jericó né israelitas binitlóyibu guiránac buñ de Jericó, per nosi Rahab né xfamily bilaa. Modreʼ gosaló guerr ni gocla xhoop íz ro Josué né guirá soldad de Israel bunyibu gan xiroʼ Layoo ni Jehová Goniʼ guiduidy layibu. Né layoo ni bunyibu gan, bitzooyibu láani cuaʼyibu.

Toib dzú órni ma yaaca gaity Josué, bitopbu guiráca israelitas. Né goniʼbu guiránac ni Jehová ma buny por xfamilbu né por layibu né que diti nasianyibu Jehová. Per órni goity Josué né guirá buñ de xtzúbu, israelitas bisianyibu Jehová né gosaló bienyibu dioxh falz. Ló tzongayoʼ íz ni godudy, xidal buelt diti bisobdiitzyibu xiley Jehová. Órni layibu diti rasobdiitzyibu, Jehová raduidy lagary que tzoʼyibu xan xomandary filisteos né xan xomandary stipnés buñ. Per órni ranabyibu xcalrracné Jehová, láabu raxelbu toib buñ ni guilaa layibu. Goyoʼ doce buñ ni gocné layibu né góc laayibu jueces.

Libro ni rasetlaa guirá ni ma gonino rasaló né historia xtuny juez Otniel né raloxni né toib buñ ni góc nigolú nadip: juez Sansón. Guirá ni rasetlaa libro de Jueces rasuidyni lóono toib cós ni nigolú rasac: pal rasobno Jehová guirá ór, sabanyno sacró, né pal diti rasobno, mal sarecaano.

(Bireʼni ló Josué, Jueces né Levítico 18:24, 25.)