¿XIMOD nabany buñ pal ni ñony mandary layibu diti nasian de ñen a Jehová né nasobdiitzbu xcalmandary Dios guirá ór? Ló cuarent íz ni buny mandary Salomón birexani.

Órni yása gaity David goniʼbu que xiimbu Salomón ñony mandary xalagarybu. Toibtica dzú, Dios goninébu Salomón ló toib bacaʼal né gochbu Salomón nanab nitisi náni láabu. Salomón gonab galnann né galnaní par labúu ñonybu xinésni. Jehová bioladx ni láabu gonabbu, por ngú biduidybu guirá ni gonab Salomón. Jehová láaca góoch láabu que pal nasobbu nacaʼbu cós ni rasac, gloria, né labúu nabanybu xidzú.

Por galnann ni gop Salomón guirá buñ bimbu láabu. Toibtica dzú, chop buñgonaʼ goyee ronoʼbu par nabexabu toib galnagan portín guiropcayibu náyibu que nacyibu xinaʼ toib badaʼ. ¿Xí buny Salomón ór cú? ¡Buny mandarybu nachocyibu galaʼ badaʼ reʼ! Toib buñgonaʼ cú gosaguel per ni rarop buñgonaʼ cú goniʼ, que sa guicaʼbu badaʼyen reʼ. Ór cú Salomón gon que ni rarop buñgonaʼ nac xinaʼ badaʼyen reʼ. Órni guirá buñ gon ni góc, biduidyibu cuent que Salomón nap xcalnan Jehová.

Toib cós ni más bidziguiaʼ buñ ni bisaʼ Salomón láani ngú toib yoʼ sacróyen ro bienyibu Jehová lainy Jerusalén, cú bisuidyibu ni nigolú de Jehová. Dzú ni bunyibu xilanii yoʼ móz reʼ, Salomón goniné Dios né goniʼbu diitzreʼ: «Guibá ná nirodanndiguieʼni diti rigaʼlni par looy, ¡laʼxa yoʼ reʼ ni naʼ bisaʼya!» (1 Reyes 8:27).

Xidalguixo buñ bimbuyibu Salomón ná bibanyibu dada lagary ni laa Seba, ni noʼ gudx Arabia. Reina de Seba goyeebu Israel par nabiʼbu gloria né guirá cós ni rasac ni nap Salomón, né láaca par nagoʼbu prueby xcalnan Salomón. Bidziguiaʼbu xcalnan Salomón né dada bunyxiroʼbu Jehová portín Jehová golúbu toib rey ni nap galnann. Xcalmandary Salomón gocni sacroyen né buñ bibany goxtiguie ló dzúcu, portín Jehová biduidy xilaay láabu.

Nabanni, per Salomón diti guirá ór bisobbu Jehová. Guibiʼno ximod, ná Dios goniʼ que guirá ni ñony mandary diti non ñoʼ xidal tzeʼelyibu, per Salomón goyoʼ xidal tzeelbu né xidal de layibu bienyibu dioxh falz. Por ngú Dios gochbu Salomón que gobierno xtunybu sadzoni. Jehová bunybu toib acuerdo né David por ngú Salomón diti bisnit guidopyca gobierno xtunybu. Ná Salomón diti bisobbu, Jehová buny por narebuʼ xtiitzbu ni gochbu David.

(Bireʼni ló 1 Reyes 1 a 11, 2 Crónicas 1 a 9 né Deuteronomio 17:17.)