Adán né Eva goyoʼ xiinyibu né modreʼ bidal buñ ló Gudxlio. Per bidxiinni midid tipnés xiin Jehová ni goyoʼ guibá láaca gocyibu toibsi né Buñdzab né cualóbu Jehová.

Bietjyibu ló Gudxlio né bitzñayibu né buñgonaʼ, per par labúu ñonyibu ngú nír gocyibu buñgudxlio. Guirá buñgonaʼ reʼ goyoʼ xiinyibu né bimbiox reʼ diti bireʼyibu xomod buñgudxlio portín layibu nigolú buñ mal né buñxiblo gocyibu.

Gudxlio bidza de buñ ni buny pór cós mal. La Biblia ná: «Nigolú bidal cós mal ni buny buñ ló Gudxlio, guirá ni bunyibu pensary né ni goyoʼ lainy xcalnabanyibu pór cós mal gocni guirá ór.»

Noé gócbu toib buñguieeu tzaay. Jehová góoch Noé, que Láabu guinitlobu guirá buñ mal ló toib guiérodann.

Dios láaca gochbu Noé que nasaʼ toib bark rodann ni góc laa arca, né nagoʼbu xhomilbu né guirá clas nimal lainyni.

Noé buny que buñ ñan que gac toib guiérodann, per diti noʼ chú bicadiag láabu. Noʼ ni bixiich láabu né ni bianladx láabu.

Órni arca reʼ bilox goyaʼ Noé goloʼ guirá nimal lainyni.