1, 2. ¿Xí láani non ganno de Buñdzab né demony?

 SACRÓYEN sabanyno ló Gudxlio copy ni ná Jehová guidudy lóono. Orcúra sabanyno xomod goniʼ Dios dada nírcu. Per nigoreʼ nabanyno ló toib Gudxlio ni noʼ ladxña Buñdzab né xidemony (2 Corintios 4:4). Ná diti labúu rabiʼno layibu, noʼyibu ló Gudxlio né nigolú nadipyibu.

² Ló capítulo reʼ, sasuidyno ximod labúu guibigaxno Jehová né xi raquiin gonyno par diti tzaguiabno ladxña Buñdzab. Jehová radudy xtiitz gacné lóono, per non ganno xi tramp raquiin Buñdzab né demony par guiscú né guicaló lóono.

3. ¿Xí raniiny Buñdzab?

³ Buñdzab raniʼ que lóono rony adorarno Jehová portín noʼ ni racaʼno né pal racalóno galnagandaʼ ma diti sonyno xchiin Jehová (bíil Job 2:4, 5). Órni buñ ma ná guimbu a Jehová, Buñdzab né xidemony radudy cuent né rayopy mod guicaa layibu. Nigolú radzuitzyibu órni toib buñ rac dedicar a Jehová né rionis. La Biblia ná que Buñdzab casaa  «xomod toib betz ni cacaʼ rudx né cayopy ni guá» (1 Pedro 5:8). Buñdzab raniiny galsitno de Jehová (Salmo 7:1, 2; 2 Timoteo 3:12).

4, 5. a) ¿Xí diti labúu rony Buñdzab? b) ¿Ximod labúu guicalóno Buñdzab?

⁴ Per diti noʼ xi portín guidzuibyno Buñdzab né xidemony, portín Jehová diti radudy lagary gonyibu lóono guirá ni raniiny layibu. Jehová radudy xtiitz que «xidalguixo buñ» salaa ló «gran tribulación» (Apocalipsis 7:9, 14). Buñdzab diti labúu guicaa  ló xpiin Dios par labúu guilaa, portín Jehová ralaa xcudx.

⁵ Pal rabigaxno Jehová, Buñdzab diti labúu sonybu que galsitno de Dios. La Biblia raiby lóono: «Jehová sioʼ né lóoto pal diti rasianto láabu» (2 Crónicas 15:2; bíil 1 Corintios 10:13). Xidal buñguieeu né buñgonaʼ ni bibany ló dzú ni see xomod Abel, Enoc, Noé, Sara né Moisés, cualóyibu Buñdzab né dipa bisianyibu Jehová (Hebreos 11:4-40). Lóono láaca labúu gonyno scúca. Xtiitz Dios raiby lóono: «Colguicaló Buñdzab, né láabu salsitbu de lóoto» (Santiago 4:7).

6. ¿Xí láani raniiny Buñdzab gony, né ximod ronybu láani?

⁶ Buñdzab nan que Jehová diti radudy lagary gonybu lóono guirá ni raniiny layibu. Ná scú, rayopyibu mod ma diti guidzakno Dios. Buñdzab racaló lóono de xidal mod, né ma de goló xidal mil íz raquiimbu tramp ni biquiimbu ló dzú ni see. ¿Xí tramp raquiimbu?

7. ¿Xigony racaló Buñdzab xpiin Jehová?

⁷ Apóstol Juan bicaʼ: «Guidopynac gudxliogoxreʼ noʼni ladxña Buñdzab» (1 Juan 5:19). Buñdzab rony mandary gudxliogoxreʼ né láaca raniiny gony mandarybu xpiin Jehová (Miqueas 4:1; Juan 15:19; Apocalipsis 12:12, 17). Nanbu que ma tidxósi tiemp napbu, por ngú nigolú ragoʼbu galnagan par guisianno Dios. Rioʼ ór laʼpabu racalóbu lóono, per rioʼ ór nalanga ronybu láani.

8. ¿Xí non guienno guiráno ni nacno cristianos?

 ⁸ La Biblia ná que «cacalsaʼno [...] demony ni noʼ guibá» (Efesios 6:12). Non guienno que desde dzú góc dedicarno Jehová, guiráno cacalsaʼno Buñdzab né demony. Por ngú, ló Efesios, apóstol Pablo tzón buelt goniʼ que cristianos non guisagaʼdxich (Efesios 6:11, 13, 14).

9. ¿Xí raniiny Buñdzab né demony gony lóono?

⁹ Buñdzab né xidemony náyibu guiscúyibu lóono de xidal mod. Pal ma buny guantaryno dzú cualóbu lóono, diti non gapno confianz lóocano né gonyno pensary que labúu sacalóno láabu nitisi ór. Buñdzab rabiʼ xi debilidad napno, né modcu rabúbu xi tramp guiquimbu par guicantaʼbu lóono. Per la Biblia raiby lóono xi tramp raquiimbu par diti tzaguiabno loni (2 Corintios 2:11; bibiʼ ni ná nota 31, «Tramp ni raquiin Buñdzab»). Toibtica tramp reʼ láani ngú órni buñ rayopy xcalrracné demony.

10. a) ¿Xí cós rony buñ ni rayopy xcalrracné demony? b) ¿Xí rony pensary Jehová órni buñ rayopy xcalrracné demony?

¹⁰ Órni buñ rayopy xcalrracné demony láani ngú órni raniiny ganyibu xi guisacloyibu, ronyibu galbruj, galchiser né rayopyibu mod guininéyibu gueʼet. La Biblia raiby lóono que Jehová rianladx órni buñ rayopy xcalrracné demony né que diti labúu gony adorarno láabu pal rayopyno xcalrracné demony (Deuteronomio 18:10-12; Apocalipsis 21:8). Lóono ni nacno cristianos nipa tidxóyen  diti guiyopyno xcalrracné demony (Romanos 12:9).

11. ¿Xí labúu sasaclono pal rioladxno cós ni radzak né demony?

¹¹ Buñdzab nan que pal rioladxno cós ni radzak né demony, diti sasac naganbu guicantaʼbu lóono ló ndeʼ. Órni buñ rayopy xcalrracné demony ralsit de Jehová.

12. ¿Xí raniiny Buñdzab gony pensary buñ?

¹² Buñdzab rayopy mod guiscú buñ. Dxoga dxoga ronybu que buñ gony pensary que «cós mal nac cós tzaay» (Isaías 5:20). Buñdzab raniiny gonyno pensary que xilitz la Biblia diti noʼ pu raquiinni, né sabanyno más goxt pal diti rasobno ni rony mandary Dios.

13. Bisetlaa xi tramp raquiin Buñdzab.

¹³ Toibtica tramp ni más raquiin Buñdzab láani ngú órni rayopybu mod diti guiluladxno ni ná Jehová. Né desde dzú gosaló goyoʼ buñ ló Gudxlio ronybu ngú. Por ejemplo, lainy Lagary móz ni góc laa Edén, gonabdiitzbu Eva: «¿Nigolúpa Dios ma goniʼ que lóoto diti non guáto guirá yac ni radudy xcaa ni noʼ lainy lagary sacróyen la?» (Génesis 3:1). Después ló dzú ni bibany Job, Buñdzab gonabdiitzbu Jehová nisló guirá ángeles: «¿Xilaʼsi radzuiby Job a Dios la?» (Job 1:9). Después ni goyonis Jesús, Buñdzab cualó láabu scareʼ: «Pal naclo xiin Dios, góoch guirá guiee reʼ gacni páa» (Mateo 4:3).

14. ¿Xí rony Buñdzab par gony buñ crer que órni rayopyibu xcalrracné demony ditini mal?

¹⁴ Ló naareʼ Buñdzab láaca rayopy mod par diti  gony buñ crer ni ná Jehová. Par gony buñ pensary que órni buñ rayopy xcalrracné demony diti tampa mal láani, ronybu que tipnés cós ni radzak né demony guienni sacróyen. Dada tipnés cristianos diti ma bibiʼ pal noʼ riesga loni (2 Corintios 11:3). Por ngú, ¿xí labúu gonyno par diti tzaguiabno ló tramp reʼ? ¿Xí labúu gonyno par diti guiscú Buñdzab lóono? Guisuidyno chop cós ni rioʼ ór raquiin Buñdzab par guiscú lóono: galnakit né remeidy.

15. ¿Xí clas galnakit labúu ñony que nadzakno demony?

¹⁵ Guiráno rioladxno tzoʼ nakitno. Per xidal videos, películas, programas de televisión, videojuegos né páginas ni noʼ ló Internet radzakni né demony, galchiser né galbruj. Xidal buñ rony pensary que ditini mal, né diti radudyibu cuent que noʼyibu né Buñdzab. Buñ láaca labúu nadzak demony pal raniiny ganyibu xi guisacloyibu, raquiinyibu baraj, rayopyibu buñ par goʼol ladxñayibu o rayopyibu ximod rarexa toib bacaʼal. Buñdzab ronybu que guirá ndeʼ guienni sacróyen né rayopyibu mod guioladxno láani. Noʼ buñ dada rony pensary que diti noʼ riesga guibiʼyibu cós ni radzak né demony pal diti cayonyibu láani. ¿Xigony noʼ riesga gonyno pensary modcu? (1 Corintios 10:12).

16. ¿Xigony non cueʼno tiplad galnakit ni radzak né demony?

¹⁶ Buñdzab né demony diti labúu goʼolyibu xpensaryno. Per labúu ganyibu ni ronyno pensary né ni raniiny gonyno órni rabiʼyibu ni rioladxno né  ni rioladx xfamilno, ndeʼ raguiña dada galnakit. Pal napno películas, música o libros ro ritlaa galbruj, galchiser, lagary ronoʼ demony, buñ bruj, vampiros o cós ni radzak né demony, Buñdzab né demony sadudy cuent que raniiny ganno de layibu. Dada labúu ñonyibu que nayopyno xcalrracnéyibu (bíil Gálatas 6:7).

17. ¿Ximod labúu guicantaʼ Buñdzab lóono pal nainy gacno remeidy?

¹⁷ Láaca, Buñdzab labúu guichelbu ñeʼno pal raniiny lóono gacno remeidy. Noʼ xidal buñguitz né tipnésyibu ma xidal buelt goyee ló doctor per  diti rialyibu (Marcos 5:25, 26). Labúu nadopy xcalnabanyibu né dada ñacyibu remeidy né nitisi cós. Per lóono ni nacno cristianos non gapno cuidad né diti guicaʼno remeidy ni radudy buñ chiser (Isaías 1:13).

18. ¿Xí remeidy diti non gacno?

¹⁸ Ló xtzú gudx Israel, tipnés israelitas buny «galchiser», né Jehová góoch layibu: «Órni lóoto rascaʼto ñato, diti rabiʼya lóoto. Ná guininéto naʼ guirá ór, diti racadiaga lóoto» (Isaías 1:15). Mod ma bisuidyno, Jehová diti bicadiag órni bunyibu oración. Diti nainy gonyno cós ni guicaa lóono guidzakno Jehová né xtol ngú ma diti gacnébu lóono, máspa órni caxoʼno (Salmo 41:3). Por ngú, non ganno pal remeidy ni cayonyno pensary gacno radzakni né demony o galchiser (Mateo 6:13). Pal ronyno pensary que radzakni né guirá cós reʼ diti gacno remeidy né láani. (Bibiʼ ni ná nota 32, «Mod gacno remeidy»).

19. ¿Xigony xidal buñ radzuiby Buñdzab?

¹⁹ Tipnés buñ rony pensary que Buñdzab né demony diti nigolú noʼyibu, per noʼ buñ dada ma cualó layibu. Xidal buñ radzuibygoluʼ layibu né por nitisi cosien ni rac maca rieed ló xpensaryibu que sasacloyibu desgrasy. Noʼ buñ ni ratzuiby stipnés portín rabeʼyibu xcuent demony. Xidal buñ rioladx guicadiag guirá cuent reʼ, né guichetzyibu láani guirá lad. Por ngú, buñ radzuiby Buñdzab.

20. ¿Ximod labúu nachetzno xcalrrascú Buñdzab?

 ²⁰ Buny pensary ló ndeʼ: Buñdzab raniiny que buñ guidzuiby láabu (2 Tesalonicenses 2:9, 10). Láabu rascúbu, por ngú nanbu ximod guikíilbu xpensary buñ par guioladx guicadiag xcuent demony par guiluladxyibu cós ni sigory diti nigolú góc. Sigory buñreʼ raniʼyibu cós ni ralooypa ma bibiʼyibu o ma bicadiagyibu. Laʼga más rachetzyibu cuent reʼ más ragoʼyibu xpichni. Diti nainy lóono gacnéno Buñdzab né guirá cuent reʼ ni ratzuiby buñ (Juan 8:44; 2 Timoteo 2:16).

21. ¿Xí láani labúu guinino xalagary cueʼno xcuent demony?

²¹ Pal Buñdzab natzuiby toibtica xpiin Jehová diti non guiniʼbu ni gosaclobu par guidziguiaʼ buñ. Lóono ni nacno cristianos diti non guidzuibyno Buñdzab né xidemony. Xalagary ngú gonyno pensary ló cós ni buny Jesús, guinino ni bunybu né guinino de galnadip ni bidudy Jehová láabu (Hebreos 12:2). Jesús diti goleʼbu xcuent demony par nacadiag xpiimbu. Goniʼbu ni gony Gobierno xtuny Dios né «cós sacróyen ni sieed de Dios» (Hechos 2:11; Lucas 8:1; Romanos 1:11, 12).

22. ¿Xí ma goloʼlo guiclo gonylo?

²² Diti guialadxno que Buñdzab raniiny galsitno de Jehová né sonybu rutirigaʼlni láabu par guirebuʼ ni nábu. Per rimbuno tramp ni raquiimbu né ma goloʼno guicno cueʼno tiplad nitisi cós ni radzak né demony. La Biblia ná: «Diti guidudyto lagary gac ni ná Buñdzab» (bíil Efesios 4:27). Pal racalóno Buñdzab diti siabno ló xtrampbu né diti noʼ xi sacno portín Jehová san lóono (Efesios 6:11).