¡GANNLO xí ni cayonyibu nigoreʼ! ¡Cayenyibu toib torien! ¿Xigony cayonybu ndeʼ?

Órni Moisés rian xidzú laidy dainy, gudxcú raniʼ: Diti nánno xí gosaclo Moisés. Guisaʼno toib dioxh par cué lóono de lagary reʼ.

Aarón buch Moisés rasaguel né ranibu: Colcueʼ guirá cós de or ni naptó, né colguitné láani ronoʼya. Órni gudx rony ndeʼ Aarón racaʼ or rasiaabu láani né rasaʼbu toib torien de or. Gudx raniʼ: ¡Ndeʼ Dios xtunyno ni goleʼ lóono lainy gudx Egipto! Ór cú ronyibu toib lanii roʼ né rienyibu torien ni nac de or.

Órni Jehová rabí ni cayonyibu, radzuitzgulubu. Né raibybu Moisés: Naguelsi bietj dainy reʼ. Gudx nigolú cayonyibu cós mal. Ma diti rasetnaladxbu guirá leyes ni bidudi layibu, né caxixipyibu nisló toib torien de or.

Moisés rietj ni maca dainy reʼ, né órni radxinbu gahx, ndeʼ ni rabíbu. ¡Buñ ni dxee cayoʼolyibu canción né cayáyibu ronoʼ torien! Moisés radzuitzgulu, rasalbu guieetabla ni nap leyes layoo né ndeʼ rioy. Ór cú Moisés racaʼbu torien reʼ rasiaabu ronybu torien reʼ dée.

Ni buny gudx reʼ nigolú mal gocni. Por ngú Moisés raiby a stipnés buñguieeu que nacaʼyibu espad xtunyibu, ni nac xomod toib machet. Né Moisés goní: Guirá buñ mal ni bieen torien reʼ, non gaityibu. Xidal buñguieeu ronyibu ni raiby Moisés layibu. ¡Por ngú, ragaityibu 3,000 buñ! ¿Diti raduidy ndeʼ diitz que nosi Jehová non gony adorarno, diti dioxh falz la?