SALOMÓN toib mbioxhlasien nacbu órni radxiin rony mandarybu. Nadxibu Jehová, né rasobbu litz ni biduidy bixiosbu láabu. Jehová rioladx mod nac Salomón, né por ngú toibtica gueʼel ló toib bacaʼal Jehová raiby láabu: Salomón, ¿xí nainy looy guidudi looy?

Salomón racapy: Jehová Dios xtuni, toib mbioxhlasien naʼ né diti naana ximod gony mandary. Por ngú, biduidy galnann naʼ par labúu gony mandary galán xcudxlo.

Jehová rioladx ni Salomón ranab láabu. Por ngú ranibu: Por ni gonablo galnann né diti gonablo guibanylo xidzú né ni gapló xidal cós ni rasac, sadudi looy más galnann que stoib buñ ni bibany hasta nigoreʼ. Per diti ngúsi sadudi looy, láaca saduidy cós ni diti gonablo naʼ, scú láani, sadudi xiroʼ cós ni rasac né guidxin gaclo buñxirop.

Diti xidzú chop buñgonaʼ rieed ronoʼ Salomón xtol toib galnagan. Toib de layibu ná: Gonaʼ reʼ né naʼ rabésdo toibsi yoʼ. Naʼ gosann toib badaʼyen, né godudy chop govitz láabu láaca gosanbu toib badaʼyen. Toibtica gueʼel, xpadaʼbu goity. Per laʼga natiasy, godiʼxbu xpadaʼbu ni ma goity cueʼya né cuaʼbu xpadaʼya. Órni bireʼ bacaʼal lóoya né bibiʼya badaʼ reʼ ma goity, biduidy cuent que diti xpadaʼya láabu.

Órni stoib buñgonaʼ cú bicadiag ndeʼ, goníbu: ¡Yaca! ¡Badaʼ ni nabany ngú xpadaʼya, né ni ma goity ngú xtunybu! Primer gonaʼ ni goní racapy: ¡Yaca! ¡Badaʼ ni ma goity ngú xtunylo né ni nabany ngú xtuni! Scú radíldiitzyibu. ¿Xí gony Salomón né layibu nigoreʼ?

Ranabbu toib espad, né órni ritnéyibu espad ronoʼbu, Salomón raniʼ: Colguichoc choplaʼ badaʼ ni nabany cú, né colguiduidy tiplaʼ cada toibyibu.

Buñgonaʼ ni nigolú xiimbu badaʼ reʼ racaʼbu rudx: ¡Yaca! Ranába lóto, diti guigaityto láabu. ¡Colguiduidy badaʼ reʼ gonaʼ ca! Per stoib gonaʼ ná: Ni toibdo guicaʼdo badaʼ reʼ, colguichoc láabu choplaʼ.

Nigoreʼ Salomón raniʼ: ¡Diti guigaityto badaʼ ca! Colguiduidy láabu primer buñgonaʼ ni gosaló goní. Nigolú xiimbu badaʼ reʼ. Salomón nann ndeʼ portín gonaʼ reʼ nadxigolúbu xpadaʼbu que goyoʼbu puext naduidybu xiimbu a stoib buñgonaʼ par diti nagaityibu badaʼyen reʼ. Órni buñ bicadiag ximod Salomón golexa galnagan reʼ, rabaladxyibu que Salomón cayony mandary layibu.

Ló guirá dzú ni Salomón buny mandary, Dios bisiab xilaay ronoʼ xcudxbu né bunybu que layoo biduidyni xiroʼ trigo né cebada, balach, higos né stipnés ni ro buñ. Buñ godóc pór lairy móz né golésyibu lainy yoʼ sacró. Nigolú goyoʼ cós buen par guirá buñ.