Ester gócbu toib mbioxhlas judía ni bibany lainy gudx Persia ni góc laa Susa. Xidal íz antes, Nabucodonosor goleʼ xfamilybu Jerusalén. Xprim Mardoqueo góc Ester né láabu bisniʼsbu Ester. Mardoqueo gócbu toibtica xomós rey Asuero de Persia.

Rey Asuero biyopybu stoib buñgonaʼ ni gac tzeelbu. Por ngú xomósbu golú tipnés buñgonaʼ móz ni goyoʼ lainy gudxcú né ladcu goyoʼ Ester. Lad guirá buñgonaʼ mózcu, golúbu Ester par ñac reina. Mardoqueo gochbu Ester que diti naniʼbu que nacbu buñ judía.

Goyoʼ toib buñ mal ni góc laa Hamán né láabu gosanirbu nisló príncipes. Hamán goniiny que guiránac buñ naxixip nislóbu, per Mardoqueo diti buny láani. Hamán bidzuitzgoluʼ né nábu nagaitybu Mardoqueo. Órni gon Hamán que Mardoqueo nacbu judío, goniʼbu guigaitybu guiránac buñ judíos ni goyoʼ lainy gudxcú. Né gochbu Asuero: «Guigaityno guirá buñ judíos portín nacyibu buñ mal». Asuero cuapy láabu: «Buny nitisi nainy looy». Né cuaʼbu lagary par bunybu toib ley. Ló leycu cuá que dzú 13 de beʼo adar buñ nagaity guirá buñ judíos. Per Jehová bibiʼ guirá ni góc ló dzúcu.

Ester diti gon xitcal, por ngú Mardoqueo bixel tlaʼ guiich ronoʼ Ester né goniʼbu: «Non guininélo rey Asuero». Ester cuapy láabu: «Nitisi buñ ni tzee ronoʼ Asuero né Asuero diti raxelcaʼ láabu, saitybu. Né ma de goló 30 govitz Asuero diti ma bixelcaʼ naʼ. Per ná scú, tzaʼya ronoʼbu. Pal ralísbu cetro xtunybu, diti sati. Per pal diti ralísbu láani, sati».

Ester goyeebu ronoʼ rey Asuero. Órni Asuero bibiʼ láabu, biscaʼbu cetro o xiacbu nisló Ester. Ester bibig ronoʼbu né Asuero gonabdiitz láabu: «¿Xí nainy looy Ester?». Láabu cuapybu: «Gonytzaya toib galrro gueʼel reʼ né nainyna tzeelo né  Hamán par guáxtzuto». Órni ma cayoxtzuyibu, Ester biruʼ layibu guáxtzuyibu stoib dzúcu. Ma stoib dzúcu órni cayoxtzuyibu, Asuero gonabdiitzbu Ester: «¿Xí nainy looy Ester?». Ester cuapy: «Noʼ toib buñ ni ná guigaity naʼ né guirá buñ xcudxi. Ranába lólo, bilaa lóodo». Asuero gonabdiitz: «¿Chú láabu ná guigaity looy?». Láabu cuapybu: «Hamán nacbu toib buñ mal né nábu guigaitybu naʼ». Asuero bidzuitzgoluʼ né órcuca buny mandarybu ñaity Hamán.

Per ni toib buñ labúu binitló ley ni goleʼ Hamán, ni rey Asuero diti labúu buny láani. Por ngú Asuero bunybu que Mardoqueo nasanir nisló príncipes né cuaʼbu lagary ñonybu stoib ley copy, ro naniʼ que buñ judíos labúu nacalóyibu órni ñaiby buñ nagaity layibu. Dzú 13 de beʼo adar, buñ judíos bunyibu gan enemig xtunyibu. Desde dzúcu buñ judíos ronyibu lanii par guisetnaladxyibu ximod bunyibu gan enemig xtunyibu.