Ló xtzú Esdras láaca bibany stoib buñ ni góc laa Nehemías. Láabu bibanybu lainy toib gudx ni góc laa Susa ni goyoʼ Persia né gócbu xomós rey Artajerjes. Toibtica dzú, buch Nehemías bieedbu de Judá né gochbu Jeremías: «Israelitas ni bidxin Jerusalén noʼyibu ló riesga. Muros né xpuert gudx Jerusalén ni binitló babilonios diti noʼ chú ma golís láani». Nehemías goyoʼ nabann. Goniiny ñacnébu xcudxbu, por ngú gonabbu lóo Jehová naduidy reycu lagary láabu ñeebu Jerusalén.

Después, reycu bibiʼbu que Nehemías noʼ nabann. Né gochbu Nehemías: «¿Xigony noʼlo nabann? ¿Xí cayaclo?». Nehemías cuapy: «Noʼya nabann portín diti noʼ ni ma golís muros xtuny xcudxi, Jerusalén». Reycu gonabdiitz láabu: «Labúu gacnéya looy la?». Órcuca Nehemías dzudiguié gonabbu xcalrracné Jehová né después goniʼbu: «Ranába looy, biduidy lagary naʼ tzaʼya par guilísa muros xtuny Jerusalén». Rey Artajerjes biduidy lagary ñeebu né láaca gocnébu Nehemías par diti ñoʼ xi ñacbu ló néz. Láaca gochbu Nehemías gony mandary gudx Judá né biduidybu yac par ñactzay xpuert Jerusalén.

Órni bidxin Nehemías Jerusalén, goyeebu bibiʼbu ximod nac muros xtunyni. Después bitopbu sacerdotes né stipnés buñ ni buny mandary gudxcú né goniʼbu: «Murosca diti rienni sacró. Non gonytzaayno láani nimaca». Buñ gosaguel né gosalóyibu bisaʼyibu láani.

Tipnés buñ ni bianladx a israelitas bixiichyibu né goniʼyibu: «Toibsi bez ni guisagacaa laidy murosca satubydany láani». Per guirá israelitas diti goloʼyibu cuent ni goniʼ buñcu né bunyibu dxiin. Conforma godudy dzú muroscu gocni más nasoʼ né más dxich.

Ór cú xidal buñ ni bianladx layibu gocyibu toibsi par ñeeyibu nadíilyibu né Jerusalén. Buñ israelitas bidzuibyibu órni gonyibu láani. Per Nehemías góoch layibu: «Diti guidzuibyto. Jehová noʼ né  lóono». Né bixelbu tipnés buñ par gan buñ ni cayony dxiin. Né modcu diti noʼ ni gosacloyibu.

Nosi ló 52 dzú bisaʼyibu muros né xpuertni. Órni bilox bisaʼyibu muroscu Nehemías bixelcaʼbu levitas lainy gudx Jerusalén par ñonyibu toib lanii. Bunybu chop grupos ni bíil canción. Esdras goyné toib grupo né Nehemías goyné stoib grupo. Biaʼpyibu squiler ni noʼ roʼ Puert ro ralainy Nís. Después tigaaga grupo gonás xilad laidy muroscu. Bicudxbu trompet, címbalos né arpas né bíilyibu canción par bunyxiroʼyibu Jehová dada órni bidxinyibu lainy templo. Buñguieeu, buñgonaʼ né bimbiox biscadyibu cós a Jehová né bunyibu toib lanii. Nigolú nakit goyoʼyibu né xirudxyibu bienni sitgoluʼ.