Juan gócbu xiin Zacarías né Elisabet. Jehová golú láabu par ñacbu profeta né par ñaibybu buñ que ma yaaca guidxin Mesías. Per xalagary nasuidybu buñ lainy sinagogas o lainy gudx, Juan bisuidybu buñ ló yoovich. Xidal buñ de gudx Jerusalén né Judea goyee par bicadiag láabu. Láabu gochbu buñ nasian cós mal né ñonyibu ni ná Dios. Por ngú, xidal buñ bisian cós mal ni buny né Juan golonis layibu lainy guʼuc Jordán.

Juan diti gócbu buñ ric. Xhapbu gocni de guitzlaidy camey, godóbu gozóo né godóbu xchiin búscer. Buñ ná nimbutzaay láabu. Dada buñ ni xiatz xomod fariseos né saduceos goyee ro bisuidybu buñ. Ór cú Juan góoch layibu: «Raquiin guitzaʼto mod nacto né guisianto cós mal ni ronyto. Riatzto portín ronyto pensary que nacto xiin Abrahán, per ngú diti raduidy diitz que nacto xiin Dios».

Xidal buñ gonabdiitzyibu Juan: «¿Xí non gonydo par labúu guicacuent Dios lóodo?». Láabu cuapybu: «Pal napto choplaʼ lairy, colguiscad toibni a buñ ni diti nap». ¿Nanlo xigony goniʼbu scú la? Portín goniiny láabu que layibu naduidyibu cuent que par labúu gonyibu ni ná Dios biquiin ñonladxyibu saʼyibu.

Láaca gochbu buñ ni racaʼ impuestos: «Diti cuannto xpidxiich buñ né diti guiscúto buñ». Gochbu soldad: «Diti guiscúto buñ né diti guiaxto par gonyto cós mal».

 Sacerdotes né levitas láaca goyeeyibu ronoʼ Juan né goniʼyibu: «Guirá buñ ná gan chú looy». Juan góoch layibu: «Naʼ naca toib rudx ló yoovich ni cayacné buñ guibigyibu Jehová, xomod goniʼ profeta Isaías».

Buñ nigolú bioladx ni bisuidy Juan né xidal buñ ná ñan pal nacbu Mesías. Per Juan góoch layibu: «Mápa mer guidxin toib ni nap más galnadip que naʼ. Ni xtoʼ xcalguitbu diti non guixadxi. Naʼ ragonisa lóoto lainy nís né láabu sagonisbu lóoto né espíritu santo».