Apóstoles xtuny Jesús bisobyibu né goniʼyibu xtiitz Dios ló guidopy Gudxlio. Ló íz 47, herman de Antioquía bixelyibu Pablo né Bernabé ñeeyibu naniʼyibu xtiitz Dios stipnés lagary. Guiropcayibu goniʼyibu xtiitz Dios né gan lainy guirá gudx ni noʼ Asia Menor, xomod Derbe, Listra né Iconio.

Pablo né Bernabé goninéyibu nitisi buñ: buñ ric, buñ pobre, mbioxhlas né buñgol. Xidal buñ cuacuent né bisob xtiitz Jesús. Pablo né Bernabé láaca goninéyibu buñ ni buny mandary gudx Chipre ni góc laa Sergio Paulo, per goyoʼ toib buñ chiser ni ná nacaa layibu. Pablo gochbu buñchisercu: «Jehová satuidy looy ló castig». Órcuca buñchisercu biaʼan sieg. Sergio Paulo biluladxbu guirá ni bisuidy Pablo láabu órni bibiʼbu ni gosaclóo buñchisercu.

Pablo né Bernabé goniʼyibu xtiitz Dios guirá lagary: yoʼ por yoʼ, lainy mercad, ló néz né lainy sinagogas. Toib buelt bisialbu toib buñ xot lainy gudx Listra. Buñ ni bibiʼ galrradziguiaʼ ni bunyibu buny pensary que nacyibu dios né náyibu naxixipyibu né ñenyibu Pablo né Bernabé. Biincu diti biduidy lagary ñonyibu ngú né goniʼyibu: «¡Nosi Dios non guienno! Lóodo nacdo buñgudxlio». Ór cú bidxin tipnés buñ judíos né goloʼyibu diitz guirá buñcu par ñanladxyibu Pablo. Buñ bigasguiee, bisobioo né goleʼyibu Pablo lainy gudxcú, né bunyibu pensary que Pablo ma goity. ¡Per Pablo diti goity! Órcuca bidxin tipnés herman, gocnéyibu né goynéyibu Pablo lainy gudxcú stoib. Después, Pablo bibiguet Antioquía.

Ló íz 49, Pablo goyeebu stoib lad. Goyguenbu herman ni goyoʼ Asia Menor né después goyeebu goniʼbu xtiitz Dios ló stipnés lagary ni noʼ más sit, xomod Europa. Goyeebu gudx Atenas, Éfeso, Filipos, Tesalónica  né stipnés lagary. Órni goyeebu niscú, goynébu Silas, Lucas né toib mbioxhlas ni góc laa Timoteo. Bunyibu dxiin toibsi par goyoʼ stipnés congregación copy né gocnéyibu herman par ñac nadip fe xtuny. Pablo láaca goyeebu gudx Corinto né biaʼanbu lagarycu tobiz gorol par gocnébu herman ni goyoʼ cú. Goniʼbu xtiitz Dios, bisuidybu buñ né bicaʼbu guiich ni bixelbu ló xidal congregaciones. Láaca bunybu dxiin par godudybu dzú, bunytzaaybu yoʼ lairy. Después, Pablo bibiguet Antioquía.

Ló íz 52, Pablo bireʼbu ni rion buelt né gosalóbu goniʼbu xtiitz Dios niis Asia Menor. Goyeebu nís lad norte dada bidxinbu gudx Filipos, né bietjbu gudx Corinto. Pablo láaca bisuidybu buñ xidal íz lainy gudx Éfeso, bisialbu buñ né gocnébu herman de congregación ni goyoʼ cú. Láaca goloʼbu discurs guirá dzú lainy toib scuel. Xidal buñ bioladx ni bisuidy Pablo layibu né bisianyibu cós mal ni bunyibu. Después ni goniʼbu xtiitz Dios guirá lagarycu, bibiguetbu Jerusalén.