Lainy gudx Asiria ni góc laa Nínive golés buñ mal. Jehová bixelbu profeta xtunybu ni góc laa Jonás par ñee Nínive né ñaibybu buñ de lagarycu natzaʼyibu mod nabanyibu. Xalagary ñee Jonás Nínive goyoʼbu lainy bark né goyeebu stoib lagary ni góc laa Tarsis.

Órni barkcu goyoʼni lainy nisdaʼ góc toib buroʼdant, né guirá buñ ni goyoʼ lainyni nigolú bidzuiby. Ór cú gonabyibu ló xtioxhyibu né gonabdiitzyibu: «¿Xigony casaclono ndeʼ?». Bidxin midid, Jonás góoch layibu: «Naʼ napa dool portín diti goyaʼya ro bixel Jehová naʼ. Colguisal naʼ lainy nisdaʼ né buroʼdant reʼ sabésni». Guirá buñcu diti gosaguelyibu nasalyibu Jonás lainy nisdaʼ, per láabu gochbu buñcu xidal buelt ñony laani. Ór cú bisalyibu Jonás lainy nisdaʼ né buroʼdantcu golésni.

Jonás bunybu pensary que ma gaitybu. Laʼga láabu caguichbu lainy nisdaʼ goninébu Jehová. Ór cú Jehová bixelbu toib beel xiroʼ né godaibymu Jonás, per beel reʼ diti bigaity laabu. Órni Jonás goyoʼ lainy beel xiroʼcu gonabbu lóo Jehová: «Naʼ radudi xtiidza que guirá ór soni ni nálo». Jehová gonbu Jonás laʼga goyoʼbu lainy beel xiroʼcu né ló tzón govitz beelcu bidxibmu Jonás ló yoovich.

Jehová bilaabu Jonás, ¿biduidyni diitz que ma diti goyeebu Nínive la? Yaca. Jehová bixelbu Jonás stoib, né nigoreʼ ma  bisobdiitzbu. Goyeebu né gochbu guirá buñ mal ni rabés lagarycu: «Jehová sanitlóbu gudx reʼ ló 40 dzú». Ór cú guirá ninivitas bisobdiitzyibu né bitzaʼyibu mod bibanyibu. Ni buny mandary gudx Nínive gochbu buñ xcudxbu: «Colguinab lóo Dios né colguisian cós mal ni ronyto ór cú sigory diti sanitlóbu lóono». Guirá buñcu bisianyibu guirá cós mal ni bunyibu, pór ngú Jehová ma diti binitló gudx Nínive.

Jonás bidzuitz portín Jehová diti binitlóbu gudxcú. Bunysi xpensarylo: Jehová gopbu paseinys né binladxbu Jonás. Per Jonás diti binladxbu buñ de Nínive. Xalagary ñonladxbu buñcu bireʼbu lainy gudxcú né gorúbu xan xpalaa toib labaa buur. Né labaacu bibichni né Jonás bidzuitzgoluʼbu. Ór cú Jehová góoch láabu: «Más rioʼlo galrrasaʼ por labaaca que por guirá ninivitas. Naʼ binladxi layibu por ngú diti binitlóya layibu». ¿Xí goniiny Dios ñen Jonás? Que guirá buñ ninivitas rasacyibu más que nitisi labaa.