1. ¿Xigony non guisuidyno de ángeles?

ÁNGELES nacyibu xfamil Jehová. La Biblia rabeʼ laayibu «xiin Dios» (Job 38:7). Né Dios raniiny guimbuno xfamilbu. ¿Xí rony ángeles? ¿Ximod gocnéyibu buñ ló dzú ni see? ¿Labúu racnéyibu lóono ló naareʼ la? (Bibiʼ ni ná nota 8, «Ángeles»).

2. a) ¿Chú bisaʼ ángeles? b) ¿Balac ángeles noʼ?

² Nír raquiin ganno chú bisaʼ ángeles. Colosenses 1:16 ná que Jehová primerdiguieʼ bisaʼbu Jesús, né después «guirá cós goyaʼni lainy guibá né ló gudxlio». Lad «guirá cós» reʼ noʼ ángeles. ¿Balac ángeles bisaʼ Jehová? La Biblia ná que noʼ xidal millón de ángeles (Salmo 103:20; Apocalipsis 5:11).

3. ¿Xí ná Job 38:4-7 de ángeles?

³ La Biblia láaca náni que Dios bisaʼbu ángeles antes de nasaʼbu Gudxlio. ¿Ximod gosacyibu órni Jehová bisaʼ Gudxlio? Libro xtuny Job náni que nigolú bibaladxyibu. Guirá ángeles gocyibu toib famil ni biguaʼ toibsi né nosi Jehová buny adoraryibu (Job 38:4-7).

4. ¿Ximod nanno que ángeles rioʼyibu galrrasaʼ por buñ?

⁴ Ángeles puextca noʼyibu par gacnéyibu buñ né rioʼyibu galrrasaʼ xi láani gony Dios por layibu né por  Gudxlio (Proverbios 8:30, 31; 1 Pedro 1:11, 12). Nandxichno que ángeles nigolú goyoʼ nabanyibu órni Adán né Eva góc nayaʼyibu. Ló naareʼ más rioʼ nabanyibu órni rabiʼyibu que casi guirá buñ diti rasob ni ná Dios. Per rabaladxyibu órni toib buñ rac arrepentir né rabiguet ronoʼ Dios (Lucas 15:10). Ángeles nigolú rioʼyibu galrrasaʼ por xpiin Dios, né Dios raquiin ángeles  par gacnébu né par guilaabu xpiimbu (Hebreos 1:7, 14). Guisuidyno tipnés ejemplos.

5. ¿Ximod ángeles gocnéyibu xpiin Dios ló dzú ni see?

⁵ Jehová bixelbu chop ángeles par ñacnéyibu Lot né xfamil par nalaayibu órni binitló gudx Sodoma né Gomorra (Génesis 19:15, 16). Xidalguixo íz después, goyoʼ buñ ni bisal a profeta Daniel lainy xcarió betz. Per diti noʼ xi gosaclobu portín Dios «bixel ángel xtuny né bisieg roʼ guirá betz» (Daniel 6:22). Ló siglo primero, Dios bixel toib ángel par nabeʼ apóstol Pedro lachquiip (Hechos 12:6-11). Ángeles gocnéyibu Jesús órni goyoʼbu ló Gudxlio. Después ni goyonisbu, tipnés ángeles gocné láabu (Marcos 1:13). Né órni ma yaaca gaitybu, toib ángel «buny nadip láabu» (Lucas 22:43).

6. a) ¿Ximod nanno que ángeles racnéyibu xpiin Dios ló naareʼ? b) ¿Xí galrranabdiitz guicapyno?

⁶ Ángeles ma diti rareʼyibu ló buñ ló naareʼ. Per Dios raquiinra layibu par gacnéyibu xpiin Dios. ¿Ximod nanno láani? La Biblia ná: «Ángel xtuny Jehová noʼ roloo guirá buñ ni radzuiby Dios, né calaa layibu» (Salmo 34:7). Raquiinrano xcalrracnéyibu portín napno tipnés enemig ni nigolú nadip né rayopy mod gony mal lóono. ¿Chú nac guirá enemig reʼ? ¿Ximod bidxinyibu ló Gudxlio? ¿Xí ronyibu par gonyibu mal lóono? Par ganno láani, guisuidyno xi góc después ni goyaʼ Adán né Eva.

7. ¿Dada xí midid ma biscú Buñdzab buñ?

⁷ Ló capítulo 3, bisuidyno que toib ángel góc nayaʼ nisló Dios né goniiny láabu ñony mandarybu.  La Biblia rabeʼ laabu «Buñdzab» (Apocalipsis 12:9). Buñdzab láaca goniiny que buñgudxlio diti nasob Dios. Bunybu gan biscúbu Eva, né desde dzúcu ma biscúbu casi guirá buñ. Per tipnés buñ bisob ni ná Jehová, xomod Abel, Enoc né Noé (Hebreos 11:4, 5, 7).

8. a) ¿Ximod tipnés ángeles bidxin góc demony? b) ¿Xí buny demony par nalaayibu ló Guiérodann ni góc?

⁸ Ló xtzú Noé, tipnés ángeles góc nayaʼyibu né bisianyibu guibá par nabésyibu ló Gudxlio xomod buñ. ¿Xigony? La Biblia ná que goniiny ñoʼ tzeʼelyibu (bíil Génesis 6:2). Per diti non ñonyibu ngú (Judas 6). Xomodca tipnés ángeles ni góc nayaʼ, casi guirá buñ ni bibany dzúcu diti buny xinésni né buñ mal gocyibu. Jehová binitlóbu buñ mal né toib guiérodann ro biguaguel nís ló guidopynac Gudxlio. Per bilaabu buñ ni bisob láabu (Génesis 7:17, 23). Par labúu nalaayibu ló Guiérodancu, ángeles ni góc nayaʼ bibiguetyibu guibá. La Biblia rabeʼ laayibu «demony». Layibu gocyibu toibsi né Buñdzab né ma goyoʼyibu ladxña Buñdzab (Mateo 9:34).

9. a) ¿Xí gosaclóo demony órni bibiguetyibu guibá? b) ¿Xí guisuidyno nigoreʼ?

⁹ Órni demony bibiguet guibá, Jehová diti bidudy lagary ñoʼyibu lad xfamilbu stoib (2 Pedro 2:4). Dada ló naareʼ demony «cascú guiránac buñgudxlio» ná ma diti labúu racyibu buñ (Apocalipsis 12:9; 1 Juan 5:19). Guisuidyno ximod rascúyibu xidal buñ (bíil 2 Corintios 2:11).

10. ¿Ximod rascú demony buñ?

¹⁰ Demony rascúyibu buñ de xidal mod. Tipnés  buñ rieeyibu nisló buñ bruj o ronoʼ curander. Layibu ronyibu dxiin né xcalrracné demony. Dios raiby lóono que galsitno de guirá ni radzak demony (Gálatas 5:19-21). Xomod toib buñ ni raquiin tramp par guiab nimal loni, demony láaca raquiin galrrascú par guichelbu né gony mandarybu buñ.

11. a) ¿Xí rony buñ par gan xi guisacloyibu? b) ¿Xigony diti non gonyno ndeʼ?

¹¹ Toib tramp ni raquiin demony, láani ngú órni buñ ná gan xi guisacloyibu o nainy ganyibu ni diti rimbuyibu. Tipnés buñ raquiin baraj, rayopyibu buñ par goʼol ladxñayibu o rayopyibu ximod rarexa toib bacaʼal. Xidal buñ raniʼ que ndeʼ ditini mal, per noʼ xiroʼ riesga loni. La Biblia ná que buñ ni rony dxiin de clas reʼ toibsi ronyibu dxiin né demony. Xomod ná Hechos 16:16-18 que toib demony gocné a toib mbioxhlas gonaʼ par ñan xi ñac ló dzú ni sietra. Órni apóstol Pablo goleʼ demony laidy mbioxhlas reʼ, gonaʼ reʼ ma diti gop galnadip.

12. a) ¿Xigony noʼ xiroʼ riesga guiyopyno mod guininéno gueʼet? b) ¿Xigony cristianos rabeʼyibu tiplad guirá ni radzak né demony?

¹² Stoib tramp ni raquiin demony, láani ngú órni buñ rony pensary que labúu guininéyibu gueʼet. Ndeʼ rimbu buñ láani xomod galchiser. Demony raniiny guiluladxno que gueʼet nabanysa stoib lagary né labúu guininéyibu lóono, gacnéyibu o gonyibu mal lóono. Órni raity ximigno o xfamilno, sigory noʼ buñ ni rayopy xcalrracné buñ ni ná que raniné gueʼet, xomod toib buñ bruj. Sigory buñ brujcu raniʼ ni buny gueʼetcu o dada raniʼbu mod goniʼ gueʼetcu. Buñ ni goity xfamil, sigory labúu gonybu pensary  que caninébu gueʼetcu, per ni caninébu ngú demony (1 Samuel 28:3-19). Xidal costumbres ni rony buñ órni ragach gueʼet, sieedni ló crenys que gueʼet nabany stoib lagary. Lad guirá costumbres reʼ noʼ, órni buñ raxelcaʼ ni rony rosair, órni ronyibu velory, órni ronyibu xilanii gueʼet, órni ronyibu lanii xant né stipnés cós. Órni cristianos diti rony guirá costumbres reʼ, sigory xfamilyibu o xpesinyibu raniʼ mal de layibu o ma diti ragobioo layibu. Per cristianos nanyibu que gueʼet ma diti nabany stoib lagary. Diti labúu raninéno layibu, ma diti labúu racnéyibu né ma diti labúu ronyibu mal lóono (Salmo 115:17). Por ngú, gon looy. Diti guiyopylo mod guininélo gueʼet o demony, goleʼ tiplad guiráxadit ni radzak demony (bíil Deuteronomio 18:10, 11; Isaías 8:19). (Bibiʼ ni ná nota 26, «Galchiser né galbruj»).

13. ¿Xí ma buny xidal buñ ni bidzuiby demony nírcu?

¹³ Demony diti nosi rascú buñ, láaca ratzuibyibu buñ. Ló naareʼ Buñdzab né xidemony nanyibu que «ma tidxósi tiemp» napyibu par gonyibu cós mal ló Gudxlio, portín Dios mápa mer guicaa lóoyibu. Por ngú, ma más cayonyibu cós mal ló xtzúno (Apocalipsis 12:12, 17). Per xidalguixo buñ ni bidzuiby a demony nírcu, nigoreʼ ma diti radzuibyibu. ¿Ximod bireʼyibu ló ndeʼ?

14. ¿Ximod labúu guireʼno ladxña demony xomod cristianos ni bibany ló siglo primero?

¹⁴ La Biblia raiby lóono ximod labúu guilaano né guireʼno ladxña demony. Ló siglo primero tipnés buñ ni golés lainy gudx Éfeso goninéyibu demony antes  de ñacyibu cristianos. ¿Ximod bireʼyibu ladxña demony? La Biblia ná: «Xidal buñ ni góc buñ bruj bitop guirá libros ni gop né bisaʼij láani nisló guirá buñ» (Hechos 19:19). Goniiny ñacyibu cristianos, por ngú bisaʼijyibu guirá libros de galchiser ni gopyibu. Ló naareʼ, ngúca raquiin gonyno. Par gonyno ni ná Jehová raquiin guisaʼijno guirá cós ni radzak né demony. Xomod libros, revistas, horóscopos, películas, música, galrraguit o nitisi cós ro ritlaa de demony xomod cós tzaay o cós sacróyen. Láaca diti non gapno cós ni buñ raquiin par diti tzoʼ ni guayaʼ layibu (1 Corintios 10:21).

15. ¿Xí más raquiin gonyno par diti tzaguiabno ladxña Buñdzab né demony?

¹⁵ Chop tzón íz después de goló bisaʼijyibu libros xtunyibu, apóstol Pablo bicaʼ que buñ de gudx Éfeso cacalsaʼrayibu demony (Efesios 6:12). Ná ma bisaʼijyibu xilibrayibu, demony biyopy mod ñony mal layibu. Per ¿xí más biquiin ñony guirá cristianos de dzúcu? Par diti ñoʼ xi ñony demony layibu, Pablo goniʼ: «Colguicaʼ escudo xiroʼ de fe, né láani labúu sasioʼoyto guirá flech ni nap guii ni rasal Buñdzab loguiaʼto» (Efesios 6:16). Modca ralaa toib escudo a toib soldad ló guerr, fe ni napno labúu guilaani lóono órni racalóno demony. Pal napno confianz que Jehová labúu san lóono, labúu sacalóno Buñdzab né xidemony (Mateo 17:20).

16. ¿Xí labúu gonyno par gony nadipno fe ni napno lóo Jehová?

¹⁶ ¿Xí labúu gonyno par gony nadipno fe ni napno lóo Jehová? Golno la Biblia guirá dzú né gapno confianz que láabu sanbu lóono. Pal fe ni napno lóo Jehová  nadipni, Buñdzab né xidemony diti noʼ xi sonyibu lóono (1 Juan 5:5).

17. ¿Xí más raquiin gonyno par diti tzaguiabno ladxña demony?

¹⁷ Cristianos de gudx Éfeso non ñonyibu stipnés cós. Golésyibu lainy toib gudx ro bidza galchiser. Por ngú Pablo góoch layibu: «Guirási ór colguinab lóo Dios» (Efesios 6:18). Guirá ór non nanabyibu ñan Jehová layibu. Lóono láaca nabanyno ló toib Gudxlio ro bidza galchiser. Por ngú, guinabno Jehová gan lóono né guiquiinno laabu órni guininéno láabu (bíil Proverbios 18:10). Pal guirá ór ranabno Jehová diti tzaguiabno ladxña Buñdzab, sacapybu lóono (Salmo 145:19; Mateo 6:13).

18, 19. a) ¿Ximod labúu gonyno gan Buñdzab né demony? b) ¿Xí galrranabdiitz guicapyno ló capítulo ni sieed?

¹⁸ Pal rasapyno guirá cós ni radzak demony né rapno confianz que Jehová san lóono, Buñdzab né demony diti noʼ xi labúu sonyibu lóono. Diti noʼ xi portín guidzuibyno layibu (bíil Santiago 4:7, 8). Jehová nap más galnadip que demony. Ma bisuidyno que ló xtzú Noé Jehová buny castigar layibu, né nandxichno que ló dzú ni sietra Jehová sanitló layibu (Judas 6). Bisetnaladx que diti toibno cacalóno demony. Jehová raquiin ángeles xtuny par gan lóono (2 Reyes 6:15-17). Né xcalrracné Jehová labúu sonyno gan Buñdzab né demony (1 Pedro 5:6, 7; 2 Pedro 2:9).

¹⁹ Ma bisuidyno que Buñdzab né xidemony nigolú cayonyibu mal buñgudxlio. Por ngú sigory ranabdiitzno lóocano: «¿Xigony yása guinitló Jehová layibu?». Galrranabdiitz reʼ sacapyno láani ló capítulo ni sieed.