1. ¿Chú bisaʼ lóono?

JEHOVÁ «láabu ngú Dios ni nabany» (Jeremías 10:10). Bisaʼbu lóono né por láabu nabanyno. La Biblia raniʼ ndeʼ de Jehová: «Portín looy bisaʼlo guirá cós, né por ni goniiny looy goyoʼni né goyaʼni» (Apocalipsis 4:11). Nabanyno portín scú goniiny Jehová. Vida nacni xcalrrascad Dios (bíil Salmo 36:9).

2. ¿Xí non gonyno par tzeeni lóono galán?

² Jehová radudy guirá ni raquiinno par guibanyno, xomod galrro né nís (Hechos 17:28). Per diti ngúsi, láaca raniiny láabu guibanyno goxt (Hechos 14:15-17). Par tzeeni lóono galán non guisobdiitzno Dios (Isaías 48:17, 18).

3. ¿Xí buny Jehová órni Caín bigaitybu Abel?

³ La Biblia rasuidy que guiránac buñ nigolú rasac par Jehová. Guisuidyno ni buny Caín ni góc xiin lagol Adán né Eva. Caín nigolú bidzuitzbu né Abel. Por ngú Jehová gochbu Caín que nachocbu ló xcalnadzuitzbu. Per Caín diti goloʼ cuent láabu. Nigolú bidzuitzbu, «bunynaabu né bigaitybu buchbu» (Génesis 4:3-8). Jehová buny castigarbu Caín portín bigaitybu Abel (Génesis 4:9-13). Ndeʼ rasuidy lóono que galnadzuitz né galrrianladx nigolú mal láani  portín labúu guichiinni lóono gonyno cós mal. Buñ de clas reʼ diti labúu sabany tipzó (bíil 1 Juan 3:15). Par guicacuent Jehová lóono non gonladxno guiránac buñ (1 Juan 3:11, 12).

4. ¿Xí rasuidyno ló toibtica de Chii mandamientos?

⁴ Xidal mil íz después, Jehová bidudy Chii Mandamientos a Moisés. Toibtica mandamientos reʼ ná: «Diti guigaitylo buñ» (Deuteronomio 5:17). Buñ ni nompa bigaity stoib buñ, non ñaity. Ndeʼ rasuidy lóono que vida nigolú rasacni par Jehová.

5. ¿Ximod rasac Jehová órni toib buñgonaʼ nompa ratudy xiin?

⁵ ¿Ximod rasac Jehová órni toib buñgonaʼ nompa ratudy xiin? Par Jehová, dada toib badaʼyen ni yása gál nigolú rasac. Jehová nayadit goniʼ láani ló Ley ni bidudybu israelitas: pal toib buñ ñonynaa toib buñgonaʼ ni nacxiin né nadudy xiimbu, ni bunynaa láabu non ñaity (bíil Éxodo 21:22, 23; Salmo 127:3). Ndeʼ rasuidy lóono que Jehová diti rioladxbu que toib buñgonaʼ nompa guitudy xiin. (Bibiʼ ni ná nota 28, «Buñ ni nompa ratudy xiin»).

6, 7. ¿Ximod raslooyno a Jehová que nigolú rasac vida par lóono?

⁶ ¿Ximod raslooyno a Jehová que nigolú rasac vida par lóono? Diti gonyno cós ni coʼ lóono ló riesga, nili coʼno stipnés ló riesga. Por ngú, diti ragobno gues, mariguan nili stipnés drogas, portín guirá ndeʼ ronyni mal né labúu guigaityni lóono.

⁷ Dios bidudy vida lóono, non guiquiinno láani mod nainy láabu. Por ngú non gapno lóono. Pal diti ronyno láani, sacno buñ buidy nisló Dios (Romanos  6:19; 12:1; 2 Corintios 7:1). Diti labúu gony adorarno Dios pal diti rapno respet vida ni biscadbu lóono. Nigolú nagan par guisian buñ vicios ni nap. Per pal rasac vida par lóono né raniiny guisianno láani, Jehová sacné lóono.

8. ¿Xí labúu gonyno par diti tzoʼno ló riesga?

⁸ Ma bisuidyno que vida ni biscad Dios lóono nigolú rasacni. Jehová ná gonyno rutirigaʼlni lóono par diti tzoʼno ló riesga. Por ngú, rapno cuidad órni rasanéno camión, mot o nitisi cós ni labúu coʼ lóono ló riesga. Láaca diti cuenunysi raguitno par diti gacnaano o gaityno (Salmo 11:5). Láaca rapno cuidad que lidxno diti tzoʼ desgrasy. Jehová gochbu israelitas: «Pal guisaʼlo toib yoʼ, naplo xi de guilíslo toib muro roloo guic yoʼ lidxlo. Modreʼ, pal toib buñ riab né rarexcoo guic yoʼ lidxlo, buñ ni rabés lidxlo diti sap dool por runy ni bixú» (Deuteronomio 22:8).

9. ¿Ximod non guibiʼno nimal?

⁹ Jehová láaca rioʼ galrrasaʼ ximod rabiʼno nimal. Radudybu lagary guigaityno layimu par guáno né par guiquiinno guit laidyimu. Láaca labúu guigaityno nimal pal noʼno ló riesga (Génesis 3:21; 9:3; Éxodo 21:28). Per diti gonynano, diti guigaityno o guitíilno layimu por ni násini lóono (Proverbios 12:10).

10. ¿Xigony nanno que runy rony representarni vida?

¹⁰ Runy nigolú rasacni par Jehová portín rony representarni vida. Por ngú, Jehová buny castigarbu Caín por ni bigaitybu Abel (Génesis 4:10). Después ni góc Guiérodann, Jehová nayadit goniʼ stoib que  runy rony representarni vida. Jehová bidudy lagary a Noé né xfamil ñooyibu nimal. Jehová góoch layibu: «Labúu guáto nitisi nimal ni nabany. Xomodca bidudi guixaʼ par guáto, láaca radudi nimal lóoto». Per Jehová góoch layibu: «Diti non guáto beʼel toibsi né vida xtunymu, ndeʼ nac xirunymu» (Génesis 1:29; 9:3, 4).

11. ¿Xí buny mandary Jehová xcudx?

¹¹ Xhoongayoʼ íz después de goló buny mandary Dios a Noé que diti ñoobu runy, Jehová gochbu xcudxbu: «Pal toibtica israelitas o toib buñ ni nac de stoib gudx ni rabés ladto ragaity nimal guiʼix o toib nimal ni rasapy ni labúu roo buñ, láabu non guixúbu xirunymu layoo né guigotzbu yoo loni». Né láaca goniʼbu: «Diti non guáto runy» (Levítico 17:13, 14). Jehová goniiny que xcudxbu nabiʼ que runy nigolú rasacni. Labúu ñooyibu beʼel per diti ñooyibu runy. Órni nagaityibu toib nimal par ñooyibu non naxúyibu xiruny nimal layoo.

12. ¿Ximod rabiʼ cristianos runy?

¹² Chop tzón íz después de xcalgoity Jesús, apóstoles né ancianos ni goyoʼ lainy congregación cristiana bidopyibu par naniʼyibu xi Ley ni cuaʼ israelitas non nasobyibu (bíil Hechos 15:28, 29; 21:25). Jehová gocné layibu nadudyibu cuent que runy nigolú rasacni par láabu né que non nasacni par cristianos. Cristianos ni bibany ló siglo primero diti non ñooyibu né ñeʼyibu runy. Láaca diti non ñooyibu beʼel ni nap runy. Pal ñonyibu ngú, ñacni suusi ñenyibu dioxh falz o ñonyibu galyoxh. Desde dzúcu  cristianos ni rony xinésni diti rooyibu né diti reʼyibu runy. Dada ló naareʼ Jehová raniiny gapno respet runy.

13. ¿Xigony cristianos diti racaʼ runy?

¹³ ¿Láaca radudyni diitz que cristianos diti non guicaʼ runy la? Scú. Jehová ná que diti non guáno né diti non gueeno runy. Buny pensary ló ndeʼ: pal doctor raiby looy diti non gueʼlo alcohol, ¿nagoʼlo láani ló xinesrunylo la? Yaca. Scúca, órni Dios rony mandary diti guáno né diti gueeno runy, ndeʼ láaca radudy diitz que diti coʼno láani ló xinesrunyno. (Bibiʼ ni ná nota 29, «Buñ ni racaʼ runy»).

14, 15. Ná raniiny lóono guibanyno más, ¿xí diti non gonyno, né chú láabu más rasac guisobno?

¹⁴ Pal toib doctor raiby lóono que saityno pal diti racaʼno runy, ¿xí láani gonyno? Cada toibno guiniʼ pal guisob ni ná xiley Dios de runy. Lóono rabiʼno vida xomod toib galrrascad xtuny Dios né nigolú rapno respet láani. Por ngú rayopyno stipnés remeidy par diti gaityno, per dipa rasaguelno racaʼno runy.

¹⁵ Ronyno rutirigaʼlni lóono por gacno buñ nasac. Nanno que runy rony representarni vida né que nigolú rasacni nisló Dios, por ngú diti racaʼno runy. Más rasac guisobno Jehová, xalagary guibanyno chop tzón dzú más. Jesús goniʼ: «Portín ni ná guilaa vida xtuny sasnit láani, per ni rasnit vida xtuny por naʼ sadzel láani» (Mateo 16:25). Raniiny guisobno Jehová portín nadxiʼno láabu. Láaca, Jehová nan  xi ngú ni más galán par lóono. Xomodca láabu, par lóono nigolú rasac vida né rapno respet láani (Hebreos 11:6).

16. ¿Xigony cristianos rasobdiitz ni ná Dios?

¹⁶ Cristianos ni rony xinésni rasob ni rony mandary Dios de runy, por ngú diti roono, diti reeno nili racno remeidy né runy. * Per racaʼno stipnés remeidy par diti gaityno. Dios bisaʼ lóono, por ngú nandxichno que nanbu xi láani más galán par lóono. Né looyga, ¿ronylo pensary modreʼ la?

17. ¿Xí toibsi mod bidudy Jehová lagary naquiin gudx Israel runy?

¹⁷ Ló ley ni cuaʼ Moisés, Jehová gochbu israelitas: «Vida xtuny ni nabany noʼni ló runy, né naʼca ma goloʼya láani ló altar par lóoto, par guiá xcalkiéto, portín runy rasiáni» (Levítico 17:11). Órni israelitas buny galkié, Jehová labúu natudy xcalkiéyibu scásiʼ, pal ninéyibu toib nimal lainy templo né sacerdote nagaity láamu né naxú tidxó xirunymu ló altar. Modreʼsi bidudy Jehová lagary naquiin gudx Israel runy.

18. ¿Xí oportunida cuaʼ buñgudxlio por ni goity Jesús?

¹⁸ Órni Jesús bieed ló Gudxlio, goitybu por lóono par nadudy xcalkiéno scásiʼ. Después, ma diti biquiin nascadyibu nimal a Dios, xomod bitlaa ló Ley (Mateo 20:28; Hebreos 10:1). Vida xtuny Jesús nigolú gosacni. Por ni goitybu, Jehová bidudy oportunida guiránac buñgudxlio nabany por tipzó (Juan 3:16; Hebreos 9:11, 12; 1 Pedro 1:18, 19).

19. ¿Xí raquiin gonyno par diti gapno dool por xiruny buñ?

 ¹⁹ Raxquixpano Jehová por ni nabanyno. Por ngú, raniiny lóono gaibyno stipnés buñ que pal rapyibu fe lóo Jesús labúu sabanyibu tipzó. Láaca, nadxiʼno buñ, por ngú ronyno rutirigaʼlni lóono rasuidyno layibu xi raquiin gonyibu par guibanyibu tipzó (Ezequiel 3:17-21). Modreʼ labúu guinino xomod apóstol Pablo: «Noʼya nayaa de xiruny guirá buñ, portín diti biatzladxi naniya guirá ni raniiny Dios» (Hechos 20:26, 27). Órni rasuidyno stipnés ni ná Jehová né balaati rasac vida par láabu, raslooyno que rapno xiroʼ respet vida né runy.