Jehová diti saduidy lagary que buñ mal guinitlo Lagary móz. Lo lagary reʼ nosi ximigbu guibany. ¿Xí gac né guirá buñ mal cú? Para que ganno ximod gocni, guibino ximod gocni lo xtzú Noé. Noé ma xidzú íz de goloo bibany. Láabu gócbu toib buñ tzaay ni bunygulu tem par labúu ñonybu mod ni ná Jehová. Pero guirá buñ ni bibany dzúcu pór cós mal buny. Por ngú, Jehová gochbu Noé que guinitlobu guirá buñ mal né toib guiee rodand ni laa diluvio. Láaca gochbu Noé que nasaʼ toib arca, par labúu ñobu lainy né xfamilbu né scú diti niaitybu ór ni nieed Guiee rodant reʼ (Génesis 6:9-18).

Noé né xfamil bunybu toib arca. Noé gochbu guirá buñ que guieed toib Diluvio, per ni toib diti ná nacadiag láabu. Né por cós mal bunybu. Ór ni Noé bilox bisaʼ arca, golóbu guirá nimal, né biobu né xhomilbu lainy arca. Ór cu Jehová bitneʼ toib guiee rodant. Goc guiee cuarent dzú né cuarent goxin, né nis cú biguáni enter lo Gudxlio (Génesis 7:7-12).

 Guirá buñ mal goity, nosi Noé né xhomilbu bilaa. Jehová gonn layibu lo dzú goc guierodand reʼ para que labúu ñoyibu lainy toib gudxlio ro ma yadi cós mal (Génesis 7:22, 23). Biblia raniʼ stoib vuelt que sadxin stoib ór que Jehová sanitló a guirá ni diti na gony cós tzaay ni láabu nábu. Buñ tzaay diti sanitló. Sabanybu tipzó ló Gudxlio, ór ni ma gocni toib Lagary móz (2 Pedro 2:5, 6, 9).

Lo dzureʼ, xidal buñ rony cós mal. Gudxlioreʼ bidzani de galnagan. Jehová raxel guirási ór Testigos xtuny par gaybu buñ, pero diti guiráyibu racadiag xtiitz Jehová. Diti nayibu guisiambu mod ni nabanyibu, ni que Dios gaiby layibu xi ngú cós buen né cós mal. ¿Xi gac né guirá buñreʼ? ¿Sioʼ ór satzayibu la? Xidalyibu yaca. Ma gaxtiguié noʼ que buñ mal sanitló stoib né por tipzó (Salmo 92:7).

Gudxlio reʼ diti sanitló; láacani sácni toib Lagary móz. Guirá ni nainy gac ximig Dios sabany tipzó lainy Lagary mózre, looca Gudxlio (Salmo 37:29).