Para que tzó toib ni gac ximigno, raquiinni tem. Tem ni gonyno par gacno ximig Dios saduidyni xiroʼ galnasac lóono. Jesús goniʼ que ni raluladx en láabu: «Xtiitz Dios salaa lóoto» (Juan 8:32). ¿Xí goníbu né diitz reʼ?

Labúu saguaʼno goxt nigoreʼ. Labúu guiréno tiplad de guirá galrrasuidy falz, né galrrascú ni buñdzab cachetz. Láaca labúu guiréno de guirá galrasaʼ ni rony que millón de buñ gap láani, buñ ni diti rimbu Jehová (Romanos 8:22). Guirá ni nac ximig Dios diti nacbu toib mós xtuny «ni radzuiby galgoity» (Hebreos 2:14, 15).

Labúu saguaʼno goxt lainy Gudxlio copy ni Dios guiduidy lóono. ¡Libertad mózre sapno láani dzú ni siedra! Ór ni Gudxlio reʼ gac toib lagary móz, ma diti sioʼ guerr, galguitz ni cós mal. Ma diti sioʼ buñ pobre, ni galrralán. Ma diti sioʼx né gaity buñ, né diti guidzuibyno, láaca má diti sioʼ buñ mal ni gony mandary lóono. La Biblia ná de Dios: «Caxalo ladxñalo né caduidylo guirá cós ni náni buñ ne ni nabany» (Salmo 145:16).

 Guirá ximig Dios sabany tipzó. Ni guibanyno tipzó, láani ngú toib ni Jehová rascad guirá ni gac ximigbu (Romanos 6:23). Buny xpensarylo tidxo, par looy xí ngú ni guibanylo tipzó.

Sapno tiemp par gonyno xidal cós. Si nainy guicudxno toib guiip, o gonyno dibuj o gonytzaayno yac, labúu sonyno láani. O láaca guisuidyno ximod goyaʼ toib nimal o stipnés yac. O saano né guimbuno stipnés gudx rop, né buñ ni rabés niscú. Como má diti saityno, labúu sonyno xidal cós.

Láaca sapno tiemp par tzó xidal ximigno. Como guibanyno ne diti saityno, labúu guimbuno guirá ni nac ximig Dios. Simbuuno xí dxiin nambu né xi clas buñ nacyibu, né láaca sacno ximigbu. Sonladxno layibu né layibu láaca sonladxbu lóono (1 Corintios 13:8). Né como má diti saityno, labúu sacno ximig guirá ni guibany ló Gudxlio. Né por ngú, el que más guidzagno Jehová más sac ximigno láabu conforma dzú né íz. Por ngú ¡Gacno ximig Dios tipzó!