Lagary mózre diti sácni xomod lo Gudxlio ro rabésno nigoreʼ. Dios diti bioladx que Gudxlio reʼ nadzaa de galnagan, galrriob né galnabann. Lo dzú ni siedra, Dios sony de Gudxlio toib lagary móz. ¿Ximod sácni? Guibino xi na la Biblia.

Buñ tzaay. Lagary mózre sácni toib lagary ro cués guirá ximig Dios. Guiráyibu sony por cós tzaay né sabanybu mod ná Jehová non guibanybu (Proverbios 2:21).

Sioʼgolu ni gua buñ. Lo Lagary mózre, diti noʼ chu saduidy lo galrralán. La Biblia raniʼ scareʼ: «Sioʼgolu ni gua buñ lo Gudxlio» (Salmo 72:16).

Sioʼ por yoʼ galán né dxiin sacró. Lo lagary sacroyen reʼ, guirá famil ni guibany cu sioʼ liich, né guirá buñ ni guiguaʼ cú sioladxbu dxiin ni gonybu (Isaías 65:21-23).

 Saguá buñ sacró ló guidopy Gudxlio. Ma diti sadil né saity buñ lo guerr. Xtiitz Dios ná: «[Dios] sonybu que ma diti sioʼ guerr» (Salmo 46:8, 9).

Ma diti saxoʼ buñ. Biblia raniʼ: «Ni toib ni guibany loo [Gudxlio móz] guiniʼ: Caxoʼya» (Isaías 33:24). Láaca ma diti sioʼ buñ xot, né ni diti rabiʼ, né ni diti rien, né buñ gop (Isaías 35:5, 6).

Diti sioʼ castig ni yoob ni galgoity. Xtiitz Dios raniʼ: «Galgoity ma diti sioʼni más, ma diti sioʼ ni guisac maláy, láaca ma diti sioʼ ni guicalas rudx, láaca diti sioʼ ni tudy ló galrrioop. Cós ni ma góc ma goduidyni» (Revelación [Apocalipsis] 21:4).

Ma diti sioʼ buñ mal. Jehová raniʼ: «Guirá buñ mal chocbu né guiaxbu de lo Gudxlio reʼ» (Proverbios 2:22).

Guirá buñ sonladx saʼ né diti sonybu mal a stipnés buñ. Ma diti sioʼ buñ mal ni gony mandary lóono né ni guisobladx xtuny stipnés né diti sioʼ galrrianladx. Guirá buñ sioʼ toibsi né sabany mod ni ná Jehová (Isaías 26:9).