Conés buñ layibu, guisuidy, né rioʼ ór gony corregir buñ layibu. Láaca non guisuidylo layibu xi ngú cós tzaay né gonybu xinésni par diti guichéyibu.

Ló ndeʼga, xidal famil ma diti rony disciplinar xiin, portín radzuibyibu gonynayibu xiinyibu. Tipnés buñ ni ronladx xiin ragoʼ tipnés reglas né rasuidyibu xiinyibu guisob láani.

«Mbiox raquiin que tzoʼ ni gaiby layibu xipa ni gonyibu ndeʼ sacné layibu órni ma nacyibu nigox. Pal diti racni scú, sacyibu xomod toib bark ni diti nap timón: sareʼyibu ló ro seeyibu né diti sarebuʼ ni gonyibu» (Pamela).

Buny ni ma goni’lo. Pal xiinlo diti rasob looy, góoch láabu que sarecaabu mal. Órni guisobbu, góoch láabu que galán ni bunybu.

«Ló naareʼ mbiox ma diti rasob bixios, por ngú órni ximbioxa rasob naʼ rony felicitar layibu. Mod cú diti sasac naganyibu guicacuentyibu disciplina órni guiquiinyibu láani» (Christine).

NI NÁ LA BIBLIA: «Portín ni cadxiʼp buñ, ngú satop» (Gálatas 6:7).

Bieen xiinlo. Órni gony corregirlo xiinlo bisetnaladx balac íz napbu, pal rientzaaybu né pal nirodann ni bunybu. Disciplina más galán nacni órni radzakni né ni bunybu. Por ejemplo, pal xiinlo diti rony respetar ni ma goniʼlo mod guiquimbu celular, labúu gaibylo láabu balac ór guiquimbu láani. Diti gony xiroʼlo láani.

«Guirá ór nainy naʼ gaana pal nompa buny xiinna diti bisob naʼ o bichébu. Diti ngúca láani gony corregir xiinna por mod ronybu, xalagary ngú gacnéya láabu guidudybu cuent que bichébu» (Wendell).

NI NÁ LA BIBLIA: «Buñ ni ma noʼ xiin, diti guitzuitzto xiinnto, par diti guireʼganyibu» (Colosenses 3:21).

Binladx xiinlo. Pal rony corregirlo xiinlo né galrronladx, sadudyibu cuent né diti sasac naganyibu guicacuentyibu corrección né ngú sasuidy layibu.

«Órni xiindo raché, guirási ór gochdo láabu guirá cós sacró ni ma bunybu, galán bunybu láani. Né gochdo láabu que guirá galrraché ni cayonybu pal rony corregirbu láani diti sonyni mal láabu né lóodo sacnédo láabu» (Daniel).

NI NÁ LA BIBLIA: «Galnadxiʼ nacni paseins né natzaayni» (1 Corintios 13:4).