Por xidal mil íz buñ diti gon ximod gocni, né galguitz de clas reʼ bigaityni xidal millón buñ. Conforma godudy íz, científicos gonyibu ximod gocni. Gonyibu que xidal buñ raxoʼ portín noʼ xidal gérmenes xomod bacterias né virus ni radudy a stipnés buñ. Por ni bienyibu ndeʼ gocnéni layibu nacaayibu né nasialyibu xidal galguitz, né por ngú xidal millón de buñ rabany más tiemp né ma diti tampa raxoʼ.

¿Per ximod rarexa stipnés galrranabdiitz ni más rasac? ¿Nálo que pal nanlo ximod rarexa guirá galrranabdiitz reʼ labúu satzaʼni mod nabanylo la?

• ¿Chú láabu ngú Dios?

• ¿Chú láabu ngú Jesucristo?

• ¿Xí láani ngú Gobierno xtuny Dios?

• ¿Xí guicaʼno ló dzú ni sietra?

Xidalguixo buñ ma nan ximod rarexa galrranabdiitz reʼ, né por ngú nigoreʼ ma nabanyibu más sacró. Órni guienlo ximod rarexani, láaca sabanylo goxt.

Sigory ranabdiitzlo pal nigolúpa sadzelo galnigolú. Ló naareʼ ma más nagan guidudy buñ cuent xi ngú ni nigolú né xi ngú galrrascú. ¿Xigony?

Xidal buñ diti nap confianz ni ná gobiernos, ni sieed ló Internet nili ni radudy ló televisión. Rasac naganyibu ganyibu pal nigolú ni ná biinreʼ, pal nacni ni ritzanlósi ló xpensaryibu o pal nacni toib galrrascú rodann. Xidal buñ ma diti nap confianz ló saʼ né noʼ xidal información ni diti nigolú, por ngú buñ diti rioʼ de acuerdo xi ngú ni nigolú né diti rienyibu ximodpa nacni.

Ná nacni scú, labúu ganlo xipa mod rarexa guirá galrranabdiitz ni rony buñ. ¿Ximod? Xomod órni rayopylo ximod rarexa stipnés galrranabdiitz ni diti tampa rasac.

Guirá dzú rayopyno xipa mod nac toib cós. Por ejemplo, Jessica racábu cuidad que guirá galrro ni rasiʼbu diti gapni cacahuat. Láabu nábu: «Xiindzapa nimaca raxoʼ pal roobu nika tidxóyen ni nap cacahuat né dada labúu gaitybu. Por ngú antes de siiya nitisi galrro, nír rabiʼtzaya pal diti notzni nili tidxóyen cacahuat. De ngú ranabdidza tipnés fábricas par gaana pal ni ratoʼyibu diti notzni cacahuat. Láaca rayobi información ni raiby naʼ pal fábricacu ronyni galrro ni galán nac».

Sigory looy diti ronylo xomod Jessica guirá dzú, per labúu gonylo xomod láabu par ganlo ximod rarexa stipnés galrranabdiitz ni más rasac:

• Guiyopylo información.

• Guinabdiitzlo ximodpa nacni.

• Guicálo cuidad que guirá ni náni nigolúni.

Ndeʼ sacné looy guienlo ximod rarexa galrranabdiitz ni más rasac ni rony buñ. Guisuidyno ximod.

Par labúu ñen Jessica ximod rarexa tipnés galrranabdiitz ni más rasac, bunybu xomod ronybu órni rasiʼbu galrro ni diti notz cacahuat. Láabu nábu: «Órni roltzaya la Biblia né órni rayobi ni diti rienna ngú ma gocné naʼ guidzela xi ni merpa rasuidyni». Xidalguixo buñ ma buny xomod Jessica né ma biyopyibu ximod rabexa la Biblia tipnés galrranabdiitz reʼ:

• ¿Xigony noʼno ló Gudxlio?

• ¿Xí racno órni raityno?

• ¿Xigony nogoluʼ galrrioʼob?

• ¿Xí cayony Dios par guinitlóbu galrrioʼob?

• ¿Ximod xfamilno labúu guibany goxt?

Looy láaca labúu guidzelo ximod rarexa galrranabdiitz reʼ né stipnés galrranabdiitz pal roʼol lo la Biblia né rayopylo más información ló www.dan124.com/zpa.