Mápa mer Gobierno xtuny Dios ni noʼ lainy guibá sony mandaryni guidopynac Gudxlio, né guirá buñ sabany goxtiguie né sioladxyibu xchiinyibu. Dios golú Jesús par gony mandary lóono. Diti nacbu xomod guirá gobiernos ni noʼ ló Gudxlio. Jesús guirá ór raniiny láabu cós sacróyen par stipnés. Ni guichiin láabu ngú xcalnadxiʼbu, guirá ór sacbu toib rey ni gony xinésni ni gap galrronladx (Isaías 11:4).

Buñ de guirá gudx né de guirá color diti sianladxyibu saʼyibu, saguaʼyibu toibsi (Apocalipsis 7:9, 10). Guirá buñ ni guibany ló Gudxlio sonladxyibu Dios né saʼyibu. Guirácano sonyno dxiin toibsi né goxt par gony cumplirno ni ma goniʼ Dios nírcu: ganno Gudxlio, lagary ro rabésno (Salmo 115:16).

Órni Gobierno xtuny Dios gony mandary ló Gudxlio, órcu Dios sacañaa ló galnalaʼ né ló galnachich, sac nalaʼ né sac nachich de buenti midid (Salmo 24:1, 2). Órni Jesús goyoʼ ló Gudxlio biscueʼsbu buroʼdant, bislooybu xi labúu gonybu né xcalnadip Dios (Marcos 4:39, 41). Órni Cristo gony mandary lóono ma diti sadzuibyno que sioʼ toib guiérodann o toib xo rodann. Láaca Gobierno xtuny Dios sonybu que buñ né nimal guiguaʼ sacró, né ma diti sioʼ ni guixin ló Gudxlio (Oseas 2:18).

Guirácano ma diti saxoʼno. Ni toib buñ diti saxoʼ, diti sioʼx nili saity (Isaías 35:5, 6). Sabanyno toib lagary nayaa né sacróyen, xomod góc lagary ro bibany Adán né Eva. Gudxlio sadudyni xiroʼ ni guá buñ, né guirácano sapno ni guáno, xomod góc lagary Edén (Génesis 2:9). Ló Gudxlio copy sac cumplir ni góoch Dios gudx Israel ni goyoʼ ló dzú ni see: «Sooto xpáato dada guidza lainyto» (Levítico 26:4, 5).

Órni gony mandary Gobierno xtuny Dios sioʼ paz ló Guidopynac Gudxlio, sac xinésni né guirá buñ sagobioo saʼ. Ma diti sioʼ guerr, diti sioʼ buñ ni gony mandary saʼ né guirácano sapno ni caquiinno. La Biblia ná: «Tigaagayibu sabú xan labaa balach né xan yac higos, né diti sioʼ ni satzuiby layibu» (Miqueas 4:3, 4).

Guirá famil sap lidx né diti sioʼ ni gax láani layibu, né guirácano sioladxno ni gonyno. Por ngú, la Biblia ná que guirá ni guibany ló Gudxlio copy «diti xilaʼsi gonyibu xtem» (Isaías 65:21-23).

La Biblia ná: «Ló gudxlio sioʼgolu xcalnan Jehová» (Isaías 11:9). Lóono ni nacno buñgudxlio sasuidyno xcalnan Jehová ni bisaʼ lóono, né guirá cós sacróyen ni ma bisaʼbu. Diti saquiinno xcalnanno par guisaʼno guip nili par gonyno mal stipnés, xalagary ngú guiquiinno xcalnanno par guiguaʼno sacró né ganno Gudxlio (Salmo 37:11; Isaías 2:4).

Dios bunygoluʼ xtem órni bisaʼbu Gudxlio portín nainy láabu guibanyno tipzó né guibaladxno guirá dzú (Salmo 37:29; Isaías 45:18). Par labúu gonybu láani, Dios «sanitlóbu galgoity por tipzó» (Isaías 25:8). La Biblia ná «ma diti sioʼ galgoity, ma diti sioʼ galnabann, nili sioʼ galrribdxaʼ nili sioʼ galrrioʼob» (Apocalipsis 21:4). Dios sadudy oportunida buñ ni guilaabu guibany tipzó ló Gudxlio copy, ndeʼ radudy diitz guirá ni guilaabu órni guidxin fin né guirá buñ ni guiás lad gueʼet (Juan 5:28, 29; Hechos 24:15).

 Ló naareʼ xidal guixoʼ buñ ni noʼ guirá lad ma cayonyibu puext par guibanyibu ló toib lagary móz. Ná nacyibu buñ galkié, cayonyibu xtem par gacyibu buñ ni rioladx Dios guibany ló Gudxlio copy. ¿Ximod ronyibu láani? Cayimbuyibu Jehová né Xiimbu Jesucristo (Juan 17:3).

Mápa mer guinitló gudxliogoxreʼ. Pal nainy looy ganlo xi raquiin gonylo par guilaalo né par guibanylo goxt ló toib lagary sacróyen, gonab toib testigo xtuny Jehová guisuidy looy scásiʼ né libro ni laa, ¡Bibany goxtiguie por tipzó!