1. ¿Ximod góc organizar xpiin Jehová ló siglo primero?

 GUIRÁ ór ni Jehová ronycuent toib dxiin xpiin, rabésbu que diti cuensósi gonyibu láani (1 Cor. 14:33). Por ejemplo, raniiny láabu que diitz sacró gac predicarni ló guidopynac Gudxlio (Mat. 24:14). Né ma bunycuentbu dxiinreʼ Jesús par guisanirbu loni. Né Jesús rabiʼ que dxiincu tzoʼni organizado. Ló siglo primero, lainy gudx Jerusalén goyoʼ toib grupo ro goyoʼ apóstoles né ancianos de gudxcu, né xcuentyibu biaʼan naniʼyibu xi láani gac, né nadudyibu instrucciones a guirá congregaciones par nasob láani (Hech. 15:2; 16:4). Lainy guirá congregaciones golúyibu ancianos par nagonés né nadudy instrucciones a guirá herman (Hech. 14:23). Hermanos bisobyibu, por ngú «guirá congregación góc nadip fe xtunyibu né guirá dzú gocyibu más xidal» (Hech. 16:5).

2. ¿Ximod cagonés né cayaʼan Jehová xcudx desde íz 1919?

² Ló naareʼ, Jehová ma buny organizar xcudx. Ló íz 1919, Jesús gosaló biquiin chop tzón ungidos par ñony organizar mod naniʼ buñ xtiitz Dios né nadudy galrro espiritual a guirá xpiimbu (Luc. 12:42). a Riendxichni que Jehová casiab xcalnasác loguiaʼ dxiin ni ronyibu (Is. 60:22; 65:13, 14).

3, 4. a) Golexa né toib ejemplo ximod racnéni lóono ni noʼno organizados. b) ¿Xí guisuidyno ló artículo reʼ?

³ Pal cuensósi ñonyno dxiin, diti labúu ñony cumplirno né dxiin ni bunycuent Jesús lóono (Mat. 28:19, 20). Por ejemplo, pal territorio xtuny congregación diti ñoni organizado,  tigaaga buñ labúu ñony predicar rotísi naniiny láabu. Né pentzi xidal buelt ñoʼno cuca, laʼga ló stipnés lagary dipa ñac predicar. ¿Ritzanló ló xpensarylo ximod racnéni lóono ni noʼno organizados la?

⁴ Ló naareʼ, Jesús rony organizar xcudx Dios mod buny organizarbu xpiimbu órni goyoʼbu ló Gudxlio. Ló artículo reʼ, sasuidyno ejemplo ni godix Jesús né sabiʼno ximod xcudxno rasuʼ láabu. Láaca sanino ni labúu gonyno par guislooyno que napno confianz ló xcudx Jehová.

XCUDXNO RACANAL EJEMPLO XTUNY JESÚS

5. ¿Ximod rasuʼ xcudx Jehová ejemplo xtuny Jesús? (Juan 8:28).

⁵ Jesús bisuidy de Bixios ni noʼ guibá ni non ñonybu né ni non naniʼbu. Modcuca, xcudx Jehová rabeʼ guirá consej né galrrasuidy ló Xtiitz Dios (bíil Juan 8:28; 2 Tim. 3:16, 17). Láaca, casi guirá ór raibyibu lóono golno Xtiitz Dios né guisobno ni rasuidyno. ¿Ximod racnéni lóono ni guisobno consej reʼ?

6. ¿Ximod racnéni lóono ni guisuidyno la Biblia?

⁶ Ni guisuidyno la Biblia né publicaciones racnégoluʼni lóono. Por ejemplo, radudyni lagary guitzakno ni rasuidy la Biblia né guirá instrucciones ni radudy xcudx Jehová lóono. Órni rabiʼno que instrucciones cu rareʼni ló la Biblia, rac nadip confianz ni napno ló xcudx Jehová (Rom. 12:2).

7. ¿Xí mensaj buny predicar Jesús, né ximod rasuʼ xcudx Jehová láabu?

⁷ Jesús goniʼ «diitz sacró de Gobierno xtuny Dios» (Luc. 4:43, 44). Né láaca, buny mandarybu xpiimbu ñony ngúca (Luc. 9:1, 2; 10:8, 9). Ló xtzúno, guirá ni noʼ lad xcudx Jehová raniʼyibu mensaj de Gobierno xtuny Dios, nac rotísi lagary ro rabésyibu o balaati responsabilidad napyibu.

8. ¿Xí privilegio napno?

⁸ Ni gaibyno galnigolú de Gobierno xtuny Dios a buñ, nacni toib galnasác rodann. Né diti guirá labúu rony láani. Por ejemplo, órni Jesús goyoʼ ló Gudxlio, diti bidudybu lagary que demony naniʼ de láabu (Luc. 4:41). Ló xtzúno, par labúu guireʼ toib buñ predicación né testigos xtuny Jehová, primer noʼ ni raquiin gonybu. ¿Ximod raslooyno que rasac par lóono privilegio ni napno ni labúu rony predicarno? Diti guitudyno ni toib oportunida ni gapno par guinino xtiitz Dios. Xomodca Jesús, meta xtunyno láani ngú, guisagaʼno né guiseʼno láach de galnigolú lainy xcalnabany buñ (Mat. 13:3, 23; 1 Cor. 3:6).

9. ¿Xí ma buny xcudx Jehová par guimbu buñ laa Dios?

⁹ Jesús goniʼbu laa Dios. Ló stoib oración gochbu Bixiosbu ni noʼ guibá: «Naʼ ma bisudi laalo layibu» (Juan 17:26). Xcudx Jehová rasuʼtzay láabu, órni ronyibu rutirigaʼlni layibu, par gan buñ ximod laa Dios. Toibtica herramientas par gonyibu láani ngú, Traducción del Nuevo Mundo, ni ma noʼ guidopy o lad ladni ló más de 270 diitz. Traducción de Biblia reʼ, ma bunyni que laa Dios nabiguetni lagary ro goyoʼni órni cuáni. Apéndices A4 né A5 rabexani xigony cuá laa Dios stoib. Né apéndice C, ni sieed ló Biblia de estudio, rasetlani xidal prueby ni raslooy que laa Dios non guirecaani ló Escrituras Griegas Cristianas 237 buelt.

10. ¿Xí rasuidyno de experiencia xtuny toib buñgonaʼ de Myanmar?

 ¹⁰ Xomodca Jesús, nainy lóono que xidal buñ guimbu laa Dios. Lainy gudx Myanmar, toib Testigo bisuidybu toib buñgonaʼ de 67 íz que laa Dios ngú Jehová. Gonaʼcu nigolú bibaladx né dada gorudxaʼbu, né gochbu hermana reʼ: «Ndeʼ primerdiguieʼ buelt ni racadiaga laa Dios. [...] De goló nabani ndeʼ ni más rasac ni ma bisudi». Experiencia reʼ raslooyni lóono que ni guisuidy buñ ximod laa Dios labúu ratzaʼni mod nabany buñ ni natzaay xcalnabany.

DITI GUIAÑ GUISLOOYNO QUE NAPNO CONFIANZ LÓ XCUDX JEHOVÁ

11. ¿Ximod labúu guislooy ancianos que napyibu confianz ló xcudx Dios? (Láaca bibiʼ retrat).

¹¹ ¿Ximod labúu guislooy ancianos que rapyibu confianz ló xcudx Dios? Toibtica mod ni labúu gonyibu, láani ngú, goʼoltzayibu instrucciones ni racaʼyibu né guisobyibu láani. Por ejemplo, racaʼyibu instrucciones de ximod non gac asignaciones né oración ló reunión, per láaca racaʼyibu instrucciones ximod non ganyibu xilieen xtuny Cristo. Órni ancianos racanalyibu guirá instrucciones ni radudy xcudx Jehová, herman rasac que Jehová ronladx né ran layibu.

12. a) ¿Xigony non guisobno instrucciones ni radudy ni rasanir lóno? (Hebreos 13:7, 17). b) ¿Xigony non guibiʼno cós tzaay ni nap herman ni rasanir lóno?

¹² Órni ancianos guidudy toib instrucción lóono, ni más galán gonyno láani ngú guisobno né guidopy xcalnabanyno. Modcu diti sasac naganyibu gony cumpliryibu né responsabilidad xtunyibu. La Biblia raiby lóono que non guisobno ni rasanir ladno, guisobno ná diti rienno xigony ronyibu toib cós (bíil Hebreos 13:7, 17). Ngú rioʼ ór rac naganni, portín guirá ancianos nacyibu buñ galkié. Per guisetnaladxno que pal xalagary guibiʼno cós tzaay ni ronyibu, pór rayopyno ro rachéyibu, cayonyno ni merpa raniiny xienemigno. ¿Xigony ranino ngú? Portín, pal ronyno pensary mal de ancianos, labúu guisnitno confianz ni napno ló xcudx Dios, né ngú ni merpa raniiny layibu. Per, ¿xí cós labúu gonyno par guibiʼno xcalrrascú xienemigno né diti coʼno cuent láani?

DITI GUIDUDYNO LAGARY QUE NI TOIB BUÑ GONY QUE MA DITI GAPNO CONFIANZ LÓ XCUDX DIOS

13. ¿Xí raniiny xienemigno gony pensary buñ de xcudx Dios?

¹³ Xienemigno raslooyibu xcudx Dios, de toib mod ni gony que cós tzaay ni rony xcudxno guienni xomod cós mal. Por ejemplo, la Biblia rasuidyni que Jehová nainy que xpiimbu tzoʼyibu nayaa ló sentido físico, moral né espiritual. Láaca náni que nitisi buñ ni rony galyoxh né diti rac arrepentir, non gac expulsarbu (1 Cor. 5:11-13; 6:9, 10). Rasobno mandary reʼ, por ngú xienemigno raniʼ que diti napno respet ni rony crer stipnés né que nacno buñ mal, né que ronyno pensary que más rasacno que stipnés.

14. ¿Pu ralainy guirá historias falz ni raniʼ buñ de xcudxno?

¹⁴ Guisetnaladxno chú ni merpa cacaló lóono. Buñdzab, «bixios guirá ni rascú» noʼbu nixitz guirá galrrascú ni raniʼ buñ de xcudx Jehová (Juan 8:44; Gén. 3:1-5). Diti radziguiaʼno ni raquiimbu tipnés buñ par guichetz galrrascú cu. Diti  laʼra ndeʼ cayonybu láani, ma bunybu láani ló siglo primero.

15. ¿Xí láani buny líderes religiosos a Jesús né xpiin?

¹⁵ Ná Jesús, ni nac Xiin Dios, diti gopbu galkié né bunybu galrradziguiaʼ, Buñdzab biquiin tipnés buñ par naniʼ galrrascú de láabu. Por ejemplo, líderes religiosos gochyibu buñ que Jesús goleʼ demony laidy buñ né «xcalrracné ni rony mandary guirá demony» (Mar. 3:22). Después, órni buny juzgaryibu Jesús, líderes religiosos goniʼyibu que Jesús goniʼ galrrascú né diti gop respet Dios, né bikíilyibu xidal buñ par nanabyibu ñaity Jesús (Mat. 27:20). Después, órni xpiin Jesús gosaló buny predicar, xienemigyibu «bikíilyibu buñ ni diti nac judíos par nacalóyibu», nacanalyibu né nagaityibu biincu (Hech. 14:2, 19). Ni casetlano Hechos 14:2, ló Guiich ni Caniʼ 1 de diciembre íz 1998 golexani que buñ judíos ni cualó xpiin Jesús, diti nosi diti bicadiagyibu mensaj xtuny Dios, láaca «gosaló bigotzyibu falz xpiin Jesús» par nacaló buñ de stipnés gudx a guirá cristianos.

16. ¿Xí non guisetnaladxno pal radxin historias falz guidiagno?

¹⁶ Buñdzab diti ma bisiambu de guiniʼbu galrrascú, né lóo naareʼ cascúbu buñ ni noʼ ló «guidopynac gudxlio» (Apoc. 12:9). Por ngú, pal racadiagno cós mal de xcudx Jehová o de herman ni rasanir loni, guisetnaladxno ni buny xi enemig Dios a Jesús né xpiin ló siglo primero. Xomodca goniʼ la Biblia, buñ cacanal testigos xtuny Jehová né caniʼ galrrascú  de layibu (Mat. 5:11, 12). Xienemigno diti labúu sascúyibu lóono pal nandxichno pu ralainy guirá xcalrrascúyibu né nimaca rapno lóono. ¿Xí non gonyno par gapno lóono?

17. ¿Xí non gonyno pal radxin historias falz guidiagno? (2 Timoteo 1:13; láaca bibiʼ cuadriyen « ¿Bidxin toib historia falz looy la? ¿Xí non gonylo?»).

¹⁷ Diti guicadiagno historias falz ni raniʼyibu. Apóstol Pablo nayadit golexabu ni non gonyno pal radxin historias declascu guidiagno. Ló 1 Timoteo 1:3, 4 bidudybu mandary reʼ: «Nili guicadiagyibu cuent ni diti nigolú». Né bidudybu consej reʼ a Timoteo: «Diti guicadiaglo cuent ni raniʼ mal de Dios» (1 Tim. 4:7). Guisetlano toib ejemplo: pal toib mbiox mitien radzel toib cós ló píis, pentzi salísbu láani né coʼbu láani roʼbu; per toib buñgox ni ma noʼ xcalrrien dipa ñony ngú, portín riembu que labúu gonyni mal láabu. Scúca, lóono diti racadiagno historias falz né nosi racadiagno «diitz nasac» de galnigolú (bíil 2 Timoteo 1:13).

18. ¿Ximod labúu guislooyno que napno confianz ló xcudx Jehová?

¹⁸ Ma bisuidyno tzón mod ro xcudx Dios rasuʼ Jesús, per noʼ stipnés. Conforma guisuidylo la Biblia, sadzelo más. Diti guiañ gacnélo xhermanlo par gony nadipyibu confianz ni napyibu ló xcudx Dios. Né bunyra xchiimbu, góc leal, né diti guidudylo lagary que ni toib cós, galsit looy de gudx ni raquiimbu par gac cumplir ni nábu (Sal. 37:28). ¿Nigolú toib privilegio rodann ni ronyno xchiin Jehová lainy toib gudx ro bidza galnadxiʼ né lealtad ja? ¡Guirá ór guisac par lóono privilegio cu!