¿MA BIDUʼDYLO cuent que ló gudxliogoxreʼ xidal buñ rony pensary que non guicaʼyibu guirá ni nainy layibu o que non guicaʼyibu tipnés privilegios la? Ná raduʼdy buñ xidal cós layibu, ronyibu pensary que non guicaʼyibu más. Né diti radziguiaʼno láani portín la Biblia goniʼ que ló dzú ni ma guidubylagaʼ sioʼ buñ ni rony pensary en láasiyibu né ni diti raduʼdy guixquix (2 Tim. 3:2).

Nigolú, diti ló ndeʼga noʼ clas buñ ni rioʼ galrrasaʼ por láasiyibu. Adán né Eva bunyibu crer que stipláacayibu labúu naniʼyibu xi ngú cós tzaay né xi láani ngú cós mal, né guiráno cadudyno ló galrrioʼob xtolyibu. Xidal íz después, rey Uzías de gudx Judá biché órni bunybu pensary que labúu naduʼdybu incienso lainy templo, ná diti gopbu derech par ñonybu láani (2 Crón. 26:18, 19). Né fariseos né saduceos bunyibu crer que Dios non naduʼdy guirá ni goniiny layibu portín nacyibu xfamil Abrahán (Mat. 3:9).

Nabanyno lad buñ ni rony pensary en láasiyibu né ni riatz, por ngú labúu nacá clas pensary cu lóono (Gál. 5:26). Labúu nasalóno ñonyno pensary que non guicaʼno tipnés privilegios o non guiduʼdy buñ guirá ni nainy lóono. ¿Xí labúu gonyno par diti guicá clas pensary cu lóono? Ni non gonyno primer, láani ngú  guienno ximod rabiʼ Jehová láani. Guisuidyno chop principios ni sieed ló la Biblia.

Jehová ngú ni guiniʼ xi láani non guicaʼno. Guibiʼno tipnés ejemplos.

• Lainy famil, Jehová raniiny que buñgonaʼ non gap respet tzeʼel, né buñguieeu gandxiʼ tzeʼel (Efes. 5:33). Ni ma noʼ tzeʼel nosi tzeʼelyibu non gandxiʼyibu né coʼyibu cuent (1 Cor. 7:3). Ni ma noʼ xiin napyibu derech que xiinyibu non guisob layibu, né mbiox napyibu derech que bixiosyibu né xinaʼyibu gan né gonladx layibu (2 Cor. 12:14; Efes. 6:2).

• Né lainy congregación, ancianos non guicaʼyibu respet por guirá dxiin nadip ni ronyibu por congregación (1 Tes. 5:12). Per, diti napyibu derech de gony mandaryibu guirá ni rony xhermanyibu (1 Ped. 5:2, 3).

• Dios biduʼdy galmandary gobiernos par guinabyibu lóono quiixno impuestos né gapno respet layibu (Rom. 13:1, 6, 7).

Jehová nigolú ronladx lóono né raduʼdybu lóono cós ni diti bunyno gan. Nacno buñ galkié por ngú ni non guicaʼno láani ngú galgoity (Rom. 6:23). Per, por xcalnadxiʼbu ni diti radzaʼ, Jehová rascadbu lóono xidal cós sacró (Sal. 103:10, 11). Galnasác né privilegio ni napno racaʼno láani por xcalrronladxbu (Rom. 12:6-8; Efes. 2:8).

Gapno cuidad né mod rony pensary gudxliogoxreʼ. Portín labúu ñonyno pensary, que lóono non guicaʼno más cós que stipnés. Toibtica dzú, Jesús goniʼ toib historia ni raslooy que diti nagan gapno clas pensary cu. Goniʼbu de toib buñguieeu ni gop toib layoo ro goyoʼ balach, buñguieeu reʼ biyopybu buñ par ñony dxiin guidopynac dzú né naguiixbu buñreʼ toib denario. Después biyopybu más buñ ni buny dxiin goxeʼsi tiemp, tipnésyibu nosi buny dxiin tip ór. Órni goyoʼ gueʼel godixbu guirá buñcu toib denario. Per ni gosaló buny dxiin tempran, golésyibu ñaxyibu más por guirá dxiin ni bunyibu ló govitzyaʼ (Mat. 20:1-16). Né ejemplo reʼ, Jesús golexabu xpiimbu que non ñoʼyibu conforme né ni nainy Dios guiduʼdy layibu.

 Guiduʼdyno guixquix, diti guinabgoluʼno (1 Tes. 5:18). Guisuʼno Pablo, láabu diti gonabbu herman de gudx Corinto naduʼdy bidxiich láabu ná gopbu derech par ñonybu láani (1 Cor. 9:11-14). Xalagary guinabgoluʼno, non guiduʼdyno guixquix por cós ni racaʼno.

Gacno buñdxo. Órni toib buñ rony pensary que más rasacbu, ronybu pensary que non guicaʼbu más que ni napbu. Per clas pensary cu nacni xomod toib venen, né galbuñdxo nacni xiremeidyni.

Profeta Daniel bisiambu toib galán ejemplo mod gac buñ buñdxo. Xfamilbu góc buñxirop, móz gócbu, naní góc guicbu né gonbu bunybu xidal cós. Por ngú labúu ñonybu pensary que non nacaʼbu privilegios ni cuaʼbu (Dan. 1:3, 4, 19, 20). Per, xalagary ngú gócbu buñdxo né nigolú gosacbu par Jehová (Dan. 2:30; 10:11, 12).

Diti guiduʼdyno lagary guicá mod nac buñ de gudxliogoxreʼ lóono ni rony pensary en láasiyibu né ni nac buñ farmay. Xalagary ngú tzoʼ nakitno né guirá galnasác ni raduʼdy Jehová lóono por xcalrronladxbu.