1, 2. ¿Xigony más galán nabany toib buñ órni rionis?

 ÓRNI toib buñ rionis, radxin racbu xfamil Jehová. ¡Ngú nigolú ragoʼ nakit lóono! Ni radzaktzay Jehová, noʼyibu de acuerdo né diitz reʼ ni goniʼ salmista David: «Dichós buñ ni rabúlo né ritnélo par tzoʼ cueʼlo par cués láachluʼ lidxlo» (Sal. 65:4).

² ¿Xí clas buñ raxelcaʼ Jehová láachluʼ lidxbu? Xomod bisuidyno ló artículo ni godudy, láabu ma goloʼbu guicbu guibigaxbu ronoʼ guirá ni raslooy que nainy gac ximigbu (Sant. 4:8). Órni rac dedicaryibu Jehová né rionisyibu, né radxin radzaktzayibu Jehová. Né láabu radudybu xtiitzbu: «Sabiʼto que saxala guibá né sasiaba galnasác ronoʼto dada órni ma diti cayac falt xitcal lóoto» (Mal. 3:10; Jer. 17:7, 8).

3. ¿Xí responsabilidad rodann napno guiráno ni nacno cristianos ni ma góc dedicarno né ma goyonisno? (Eclesiastés 5:4, 5).

³ Nigolú, galrrionis nosi nacni ro rasaló rony buñ xchiin Jehová. Guirá cristianos nainy guibanyno mod ranab dedicación xtunyno, ná tzoʼ tipnés tentación né tzoʼ prueby fe xtunyno (bíil Eclesiastés 5:4, 5). Láaca non guisuʼno né guisobno Jesús (Mat. 28:19, 20; 1 Ped. 2:21). Artículo reʼ sacné lóono par gonyno láani.

CUANAL JESÚS GUIRÁ ÓR NÁ GUICALÓLO GALNAGAN NÉ TENTACIÓN

4. ¿Ximod sanéno lóono ni nacno xpiin Jesús toib «yac nadop»? (Lucas 9:23).

⁴ Diti gonylo pensary que, después ni ma goyonislo, sabanylo sacró né ma diti sacalólo galnagan. Jesús goniʼ  que tigaaga xpiimbu non tzané «yac nadop xtunybu dzúna dzú» (bíil Lucas 9:23). ¿Bidudy Jesús diitz que xpiimbu guirá ór nadudy ló galrrioʼob la? Yaca, diti ngú ni bidudybu diitz. Ni goniiny nadudybu diitz láani ngú que diti nosi nacaʼyibu galnasác, láaca nacalóyibu xidal galnagan, né tipnésni nigolú ñoʼobni layibu (2 Tim. 3:12).

5. ¿Xí galnasác bidudy Jesús xtiitz guicaʼ guirá ni rony sacrificios por Gobierno xtuny Dios?

⁵ Pentzi xfamilo ma cualó looy, o ma bisianlo tipnés cós ni rasac por ni goloʼlo Gobierno xtuny Dios primer lagary (Mat. 6:33). Pal ma gosaclolo ndeʼ, labúu gaplo confianz que Jehová nan guirá ni ma bunylo por láabu (Heb. 6:10). Sigory ma bibiʼlo que nigolú ni goniʼ Jesús: «Guirá ni ma bisian lidx, buch, bisan, beel, xinaʼ, bixios, xiin o xalioo por naʼ né por diitz sacró sacaʼ más de 100 ló naareʼ: Yoʼ, buch, bisan, beel, xinaʼ, xiin né xalioo né láaca sacaló galnagan, né ló dzú ni sietra galnabany tipzó» (Mar. 10:29, 30). Guirá galnasác ni ma cuaʼlo radudyni loguiaʼ guirá sacrificios ni bunylo (Sal. 37:4).

6. ¿Xigony non guicalóralo «ni raniiny beʼel laidy buñ gony» después ni ma goyonislo?

⁶ Después ni ma goyonislo, non guicalóralo «ni raniiny beʼel laidy buñ gony» (1 Juan 2:16). Portín sacralo buñ galkié. Rioʼ ór labúu guisaclo xomod apóstol Pablo, ni goniʼ: «Xcalnabani nigolúpa nainy guisobni xiley Dios, per ladi noʼ stoib ley ni cacaló ley ni noʼ ló xpensari né rasiegyoʼni naʼ ló xiley galkié ni noʼ ladi» (Rom. 7:22, 23). Né diti guixacladxlo por ni guicalólo cós mal ni raniiny gonylo. Per ni gonylo pensary ló ni bidudylo xtiitzlo Jehová órni góc dedicarlo láabu, sadudyni fuers looy par cueʼlo tiplad tentación ni rareʼ lólo. Voto de dedicación xtunylo nigolú sacnéni looy órni tzoʼ toib tentación ronoʼlo. ¿Xigony ranino ngú?

7. ¿Xigony ni ma góc dedicarno Jehová racnéni lóono gacno leal?

⁷ Órni toib buñ rac dedicar Jehová, rabeʼbu tiplad láacabu. Ndeʼ radudy diitz que ma diti rasaguelbu ronybu cós ni raniiny láabu ni diti rioladx Jehová (Mat. 16:24). Por ngú, órni guicalóno prueby, diti sioʼno galrrasaʼ xi gonyno. Par lóono nosi sioʼ toib cós ni gonyno: gacno leal Jehová. Sagoʼno guicno coʼ nakitno xcalnabanybu. Órni buny dedicarno xcalnabanyno Jehová, goleʼno tiplad stipnés cós. Sacno xomod Job, ni ná godudy ló galnagandaʼ goniʼ ndeʼ: «Dipa sasiana goni ni nac xinésni» (Job 27:5).

8. ¿Xigony ni gonyno pensary ló voto de dedicación xtunyno sacnéni lóono par diti guiabno ló tentación?

⁸ Ni gonyno pensary ló ni bidudyno xtiitzno gonyno xchiin Jehová sadudyni fuers lóono par cueʼno tiplad nitisi tentación. Por ejemplo, ¿sadudyno xomodno toib buñ ni ma noʼ tzeʼel la? ¡Yaca! Órni rac dedicarno Jehová, ma ragoʼno guicno diti gonyno ngú. Diti radudyno lagary que cós mal ni raniiny lóono tzoʼ loni lainy xcalnabanyno, por ngú, después diti rioʼno galrrasaʼ por cueʼno láani. Salsitno de «xinés buñ mal» (Prov. 4:14, 15).

9. ¿Xigony ni gonyno pensary ló voto de dedicación xtunyno sacnéni lóono coʼno xchiin Dios primer lagary?

⁹ ¿Né pal noʼ ni ná guidudy toib dxiin lóono ni sacaa lóno par tzoʼno guirá  reunión ga? Nandxichno xi láani non gonyno. Antes de gaibybu lóono de dxiincu, maca goloʼno guicno diti guicacuentno láani. Por ngú, diti sachéno né gonyno dxiincu né después guiyopyno mod coʼno Jehová primer lagary. Ejemplo xtuny Jesús labúu racné lóono. Xomodca goloʼbu guicbu coʼ nakitbu Bixiosbu, lóono láaca nimaca sabeʼno tiplad guirá ni nanno que diti rioladx Dios ni góc dedicarno né sasagaʼdxichno ló xtiitzno (Mat. 4:10; Juan 8:29).

10. ¿Ximod sacné Jehová lóono par guicanalno Jesús guirá ór después ni ma goyonisno?

¹⁰ Né guirá galnagan né tentación radudyni lagary lóono guislooyno que ma goloʼno guicno guicanalno Jesús guirá ór. Né nanno que Jehová sacné lóono gonyno láani, portín la Biblia ná: «Dios nac fiel né diti sadudybu lagary tudyto ló ni diti labúu gony guantaryto, xalagary ngú, órni guicalóto toib tentación, láaca sayopybu mod guireʼto loni né gony guantaryto» (1 Cor. 10:13).

¿XÍ LABÚU GONYLO PAR GUICANALO JESÚS GUIRÁ ÓR?

11. ¿Xí láani ngú toibtica mod galán par guicanalo Jesús guirá ór? (Láaca bibiʼ retrat).

¹¹ Jesús buny xchiin Jehová né guidopy xcalnabany, né por ni bunybu oración goyoʼbu gax de Jehová (Luc. 6:12). Toibtica galán mod ni labúu gonylo par guicanalo Jesús guirá ór después ni ma goyonislo láani ngú guiaʼlo gonylo tipnés cós ni sabigax looy más ronoʼ Jehová. La Biblia ná: «Diti gonyno pensary balaati ma buny progresarno, diti guiañ saano ló néz reʼca» (Filip. 3:16). Nagabga ór, sacadiaglo experiencias xtuny herman ni goloʼ guic gony más por Jehová.  Pentzi goyeeyibu Scuel par ni raniʼ Xtiitz Dios o goyeeyibu stoib lagary ro biquiin más buñ par guiniʼ xtiitz Dios. ¿Labúu gonylo ngúca la? Pal scú ¡buny láani! Xpiin Jehová guirá ór rayopyibu más mod par gonyibu más ló xchiin Jehová (Hech. 16:9). Per ¿pal nigoreʼ diti labúu gonylo láani ga? Diti gonylo pensary que ni labúu rony láani, más rasacyibu que looy. Ni más rasac ló carrera cristiana láani ngú gony guantaryno (Mat. 10:22). Diti guialadxlo que Jehová nigolú rioʼ nakit pal radudylo ni más galán ni labúu guidudylo. Modcu labúu sacanalo Jesús guirá ór después ni ma goyonislo (Sal. 26:1).

12, 13. ¿Xí labúu gonylo pal radudylo cuent que ma diti naplo gan? (1 Corintios 9:16, 17; bibiʼ cuadriyen ni laa « ¿Xí labúu gonylo par guixonyralo ló carrera?»).

¹² ¿Né pal radudylo cuent que ngúca ngúca raniʼlo órni ronylo oración, o rasaclo que ma ronylo cós nosi portín ma biaʼalo ronylo láani né ma diti rabaladxlo guiniʼlo xtiitz Dios né goʼolo la Biblia suusi nírcu ga? Pal rasaclolo ngú después ni ma goyonislo, diti gonylo pensary que ma bisnitlo espíritu xtuny Jehová. Nacno buñ galkié, por ngú wal rasacno modcu nagabga ór. Pal rabiʼlo que moda ma diti naplo gan, buny pensary ló ejemplo xtuny apóstol Pablo. Ná bunybu rutigoygaʼlni láabu por nasuʼbu Jesús, gonbu que ñoʼ ór diti ñapbu gan ñonybu xinésni (bíil 1 Corintios 9:16, 17). Goniʼbu: «Ná goni láani lafuers, nacni toib dxiin ni ma cuaʼya». Ló stipnés diitz, Pablo goloʼbu guicbu ñony cumplirbu né dxiin ni ma cuaʼbu ná goyoʼ ór diti gosacbu sacró.

¹³ Né scúca, diti guidudylo lagary que  mod rasaclo gonyni que ma diti gonylo ni ma goloʼlo guiclo. Xalagary ngú, goloʼ guiclo gonylo xinésni dada órni diti gaplo gan gonylo láani. Conforma radudy tiemp, ni ronylo sacnéni looy par guisaclo sacró. Pal naplo toib galán programa espiritual, ngú sacné looy par guicanalo Jesús guirá ór después ni ma goyonislo. Né láaca, órni stipnés herman de congregación xtunylo guibiʼ que nodieʼlo ló xchiin Jehová, sac animaryibu (1 Tes. 5:11).

«GUIRÁ ÓR COLGUIBIʼ XIMOD NOʼTO»

14. ¿Xigony galán láani que nagabga ór guibiʼlo ximod nabanylo, né xigony? (2 Corintios 13:5).

¹⁴ Después ni ma goyonislo, nigolú rasac que nagabga ór guibiʼlo ximod nabanylo né xi láani ma biaʼalo ronylo (bíil 2 Corintios 13:5). Por ejemplo, cuá cuidad pal ronylo oración guirá dzú, pal roʼolo né casuidylo la Biblia, pal rieelo guirá reunión né rony predicarlo. Biyopy mod par gacné guirá ndeʼ looy né guioladxlo láani. Labúu guinabdiitzlo looyca: «¿Naana cuéxaya tipnés galrrasuidy ni diti tampa nagan ni sieed ló la Biblia la? ¿Noʼ ni labúu goni par nigolú guioladxi goni xchiin Dios la? ¿Órni raninéya Jehová, raabi láabu ni merpa caquiinna né raslooyni que napa confianz lóbu la? ¿Roni rutirigaʼlni naʼ par diti guisnita ni toib reunión la? ¿Xí labúu goni par coʼya guica ló reunión né gony comentar sacró?».

15, 16. ¿Xí rasuidy experiencia xtuny Robert looy?

¹⁵ Láaca galán láani gonylo pensary xi debilidad naplo. Guibiʼno toib experiencia ni raslooy que nigolú rasac gonyno ngú. Toib hermano ni laa Robert ná: «Órni gopa 20 íz, buni dxiin chop tzón ór. Toibtica dzú después de dxiin, toib xcompañera biruʼ naʼ lidx. Gochbu naʼ que diti noʼ ni noʼ lidxbu, né que labúu ñoʼ nakitdo guiropsido. Primer bicaʼya diitz xidal cós, per después goodxi láabu que diti siaʼya lidxbu né golexaya xigony diti gosaguela». Robert buny gan tentación cu, né galán ni bunybu ngú. Per después bunybu pensary ló ni góc né bidudybu cuent que labúu ñonybu láani más galán. Nábu: «Diti nimaca goniya que diti ñaʼya lidxbu, xomod buny José né tzeʼel Potifar (Gén. 39:7-9). Né diti buni pensary pal nasac nagana ñaabi láabu que yaca. Ni godudi ló, gocnéni naʼ nadudi cuent que cayatzra guidzaktzaya Jehová».

 ¹⁶ Gonyno pensary que rioʼ toib tentación nislólo né diti rasaguelo ronylo láani. Ná scú, ¿xigony diti ronylo ni buny Robert? Gonabdiitz looy: «¿Goclaya par naniya que yaca la?». Pal radudylo cuent que noʼ ro raquiin gonylo dxiin, diti guireʼganlo. Xalagary ngú, buny pensary que galán ngú ni bidudylo cuent que naplo debilidad cu. Órni gonylo oración góochca láani Jehová, né nimaca buny dxiin loguiaʼni né guisoblo láabu (Sal. 139:23, 24).

17. Mod bisuidyno ló experiencia xtuny Robert, ¿ximod ni gacno leal Jehová raguiñani laabu?

¹⁷ Per diti reʼ radopy historia xtuny Robert. Láabu nábu: «Órni goodxi xcompañera que diti siaʼya lidxbu, gochbu naʼ: Bunylo gan prueby reʼ. Gonabdiidza láabu xi nainy nadudybu diitz né ngú. Gochbu naʼ que toibtica ximigbu ni góc Testigo, goniʼ que guirá Testigos mbioxhlas nabanyibu de chop mod né pal napyibu oportunida par gonyibu cós mal, diti ronyibu pensary láani chop buelt né ronyibu láani. Por ngú gochbu ximigbu que nagoʼbu prueby naʼ. ¡Balaati rabaladxi por ni diti buny buʼdi laa Jehová!».

18. ¿Xí láani ma goloʼlo guiclo gonylo después ni ma goyonislo? (Láaca bibiʼ cuadriyen ni laa « Chop artículos ni sacné looy»).

¹⁸ Órni radudylo xcalnabanylo Jehová né rionislo, raslooylo que nainy gony nayaalo laabu gac nitisi gac. Né labúu gaplo confianz que Jehová nan guirá galnagan ni racalólo, né guirá tentación ni rioʼ nislólo ni diti rasaguelo ronylo. Láabu rabiʼbu que ronylo rutirigaʼlni looy par diti guisianlo láabu, né por ngú sasiabbu xcalnasácbu ronoʼlo. Gop confianz ndeʼ: né espíritu santo xtunybu, sadudybu fuers looy par gonylo xinésni (Luc. 11:11-13). Né xcalrracné Jehová, labúu guicanalo Jesús guirá ór después ni ma goyonislo.