1. ¿Xí gosac David por Jehová, né xí bichiin ndeʼ láabu ñonybu?

REY DAVID bicaʼ: «Jehová xiroʼbu né por ngú non gonyxiroʼno láabu» (Sal. 145:3). Gondxiʼbu Jehová, né galnadxiʼcu bichiin láabu ñonyxiroʼbu Jehová lad congregación (Sal. 22:22; 40:5). Né lóono láaca scúca nadxiʼno Jehová né noʼno de acuerdo né ni goniʼ David que non gonyxiroʼno Jehová por tipzó (1 Crón. 29:​10-13).

2. a) ¿Ximod labúu gonyxiroʼno Jehová? b) ¿Xí galnagan racaló tipnés herman, né xí guisuidyno?

² Toib mod ni labúu gonyxiroʼno Jehová ló reunión láani ngú gony comentarno ló reunión. Xidal herman rasac naganyibu gonyibu láani. Nainy gony comentaryibu, per radzuibyibu. ¿Xí labúu gonyibu par diti guidzuibyibu? ¿Né xí sugerencias labúu gacné guirácano par labúu guidudyno comentarios ni gacné herman? Antes de guicapyno galrranabdiitz reʼ, gonyno repas tap razón ni rasacgoluʼ xigony rony comentarno ló reunión.

3-5. a) Mod ná Hebreos 13:15, ¿xigony rony comentarno ló reunión? b) ¿Xigony nanno que Jehová diti rabés que guiráno gony comentarno toibsi midid?

³ Jehová ma bidudy toib privilegio rodann par gonyxiroʼno láabu (Sal. 119:108). Guirá comentarios ni radudyno nacni toib «sacrificio de alabanza», né diti noʼ stoib ni labúu guidudy sacrificio reʼ por lóono (bíil Hebreos 13:15). ¿Ranab Jehová que guirácano guidudyno toibsi clas comentario la? Yaca.

⁴ Jehová nan que diti toibsi midid naniʼ guicno né gadzé galnagan racalóno, né nigolú rasac par láabu guirá sacrificios ni ronyno. Gonyno pensary xi clas sacrificios cuacuentbu ni buny israelitas. Buñ ric bidudyibu toib xilieen o toib chivien. Né buñ pobre bidudyibu «chop tórtolas o chop xiin palom». Né pal goyoʼ ni diti labúu nadudy chop palom, Jehová cuacuent guieʼ rin (Lev. 5:​7, 11). Ná rin reʼ más baratni, par Dios gosac galrrascad reʼ, per raquiin ñacni guieʼ rin, toib rin ni más galán nac.

⁵ Dios xtunydo diti ma bitzaʼ mod nac xpensary. Órni rony comentarno, riembu lóono né diti ranabbu gonyno mod buny Apolos o mod buny Pablo láani (Hech. 18:24; 26:28). Nosi ni ranab Jehová láani ngú gonyno rutirigaʼlni lóono. Guisetnaladxno gonaʼ viod ni bidudy chop nilasien. Jehová cuacuent ni bidudybu portín bidudybu guirá ni gopbu (Luc. 21:​1-4).

6. a) Mod ná Hebreos 10:24, 25, ¿ximod racné comentarios lóono? b) ¿Ximod labúu guislooylo que rasac par looy comentarios xtuny herman?

⁶ Órni rony comentarno rony animarno saʼno (bíil Hebreos 10:​24, 25). Guirácano rioladxno guicadiagno xidal clas comentarios ló reunión. Por ejemplo, órni toib mbioxien rony comentar né raniʼbu ni rareʼ lainy xcalnabanybu. Nigolú rabaladxno órni toib hermano rabexa toib cós ni ma biembu. Né nigolú radziguiaʼno órni toib hermano ni nac buñdzuu o órni toib herman radudy toib comentario ná casaló casuidybu diitz ni ranino (1 Tes. 2:2). ¿Ximod labúu guislooyno que rasac par lóono xtem ni cayonyibu? Toib mod ni labúu gonyno láani ngú guidudyno guixquix láabu órni ralox reunión, né gaibyno láabu que comentario ni bidudybu buny animar lóono. Stoib mod ni labúu gonyno láani ngú gony comentarno. Modcu diti nosi gac animarno, láaca sony animarno stipnés (Rom. 1:​11, 12).

7. ¿Órni rony comentarno, ¿ximod racnéni lóono?

⁷ Órni rony comentarno racnéni lóono (Is. 48:17). ¿Ximod? Primer pal nainy lóono guilísno ñano, rasuidytzayno xquiichno par reunión, sientzaayno Xtiitz Dios né sasobno láani laʼga nabanyno. Ni rarop, sioladxno más reunión, portín cú noʼ xpensaryno. Ni rion, órni rony comentarno raquiin gonyno xtem, né órni ranino láani riaʼni más ló xpensaryno.

8-9. a) Mod ná Malaquías 3:16, ¿ximod rabiʼ Jehová órni ronyno xtem por gony comentarno? b) Ná scú, ¿ximod rasac tipnés herman?

⁸ Jehová rioladx órni ranino ni ronyno crer. Labúu gapno confianz que racadiagbu lóono, né nigolú rasac guirá xtem ni ronyno par gony comentarno ló reunión (bíil Malaquías 3:16). Láaca, radudybu galnasác lóono (Mal. 3:10).

⁹ Napno razón par gony comentarno. Per ná nacni scú, sigory noʼ tipnés herman ni moda radzuiby. Pal scúca rasaclo, diti guireʼganlo. Guisuidyno tipnés consej né ejemplos ni sieed ló la Biblia, né tipnés sugerencias ni sacné guirácano par labúu gony comentarno.

10. a) Xidal de lóono, ¿ximod rasacno? b) ¿Xí radudy diitz pal radzuibyno gony comentarno?

¹⁰ ¿Órni nainy looy guilíslo ñalo ló reunión nigolú radzuibylo la? Pal scú rasaclo, diti looysi rasaclo modreʼ. Guirácano moda radzuibyno órni gony comentarno. Per pal ngú racaa looy par diti gony comentarlo, raquiin ganlo xigony rasaclo modreʼ. ¿Radzuibylo guialadxlo guiniʼlo o guiniʼlo ni diti nac xinésni la? ¿O rioʼlo galrrasaʼ que ni gony comentarlo diti nacni xomod ni rony comentar stipnés la? Órni rasaclo modreʼ, raslooyni que naclo buñdxo né ronylo pensary que stipnés nan más que looy. Jehová nigolú rioladx gacno buñdxo (Sal. 138:6; Filip. 2:3). Per láaca raniiny láabu gonyxiroʼno láabu né gony animarno herman ni noʼ ló reunión (1 Tes. 5:11). Láabu ronladxbu looy né sadudybu balory ni caquiinlo.

11. ¿Xí textos labúu gacné lóono?

¹¹ Guibiʼno tipnés textos ni sieed ló la Biblia. Xtiitz Dios raibyni lóono que guiráno rachéno órni ranino (Sant. 3:2). Jehová diti canab lóono diti guichéno, né xhermanno diti ranabyibu ngú (Sal. 103:​12-14). Nacyibu xfamilno né ronladxyibu lóono (Mar. 10:​29, 30; Juan 13:35). Rienyibu que órni ranino diti ngú ni goniiny lóono.

12-13. ¿Xí rasuidy lóono ni gosaclóo Nehemías né Jonás?

¹² Guibiʼno tipnés textos ni sieed ló la Biblia par diti guidzuibyno. Salóno né ni buny dxiin lainy toib palacio xtuny rey. Órni gonbu que muros né xpuert gudx Jerusalén ma cayabni, goyoʼ nabambu (Neh. 1:​1-4). Órni rey gonabdiitz láabu xigony noʼbu nabann nigolú bidzuibybu. Antes de nacapybu, Nehemías bunyca toib oración. Por ni bunybu ngú, rey gocné xcudx Dios (Neh. 2:​1-8). Ejemplo xtuny Nehemías rasuidyni lóono que non guininéno Dios. Gonyno pensary ni gosaclóo Jonás. Órni Jehová gonab láabu naninébu buñ ninivitas bidzuibybu né goyeebu stoib lagary (Jon. 1:​1-3). Né xcalrracné Dios labúu bunybu dxiinreʼ, né guirá ni goniʼbu gocnéni guirá buñ ninivitas (Jon. 3:​5-10). Ejemplo xtuny Jonás rasuidyni lóono que Jehová labúu gacné lóono ná radzuibyno. Herman ni noʼ lainy congregación diti radzuibyno layibu xomod buñ ninivitas, ¿scú ja?

¹³ ¿Xí sacné lóono par guidudyno comentarios ni gony animar xhermanno? Guibiʼno tipnés mod.

14. a) ¿Xigony non guisuidytzayno xquiichno ni rinéno reunión? b) ¿Pu ór labúu guisuidyno xquiichno?

¹⁴ Gac prepararno par guirá reunión. Sapno más confianz pal rabeʼno tiemp rasuidytzayno xquiichno par gony comentarno (Prov. 21:5). Scú láani diti guiráno ronyno láani toibsi ór. Eloise, toib gonaʼ ni nap más 80 íz, rasalóbu rasuidybu Guiich ni caniʼ órni rasaló xomal. Láabu nábu: «Rientzaaya ni radudy ló reunión órni rasudi láani antes». Toib hermana ni laa Joy, ni rony dxiin guirá xomal, rasuidybu Guiich ni caniʼ antes de reunión portín ngú racné láabu par diti guialadxbu láani. Ike, toib anciano ni nodieʼ ló xchiin congregación né nacbu precursor, nábu: «Ma bidudi cuent que más galán guisudi xquiichi tiprat lainy xomal, xalagary goola láani guidopycani».

15. ¿Xí raquiin gonylo par guisuidytzaylo xquiichlo ni rinélo reunión?

¹⁵ ¿Ximod rasuidytzayno xquiichno par reunión? Primer raquiin guinabno Jehová guidudybu espíritu santo xtunybu lóono (Luc. 11:13; 1 Juan 5:14). De ngú, guibiʼno guidopyca artículo de xi rasetlani. Guibiʼno título, subtítulos, retrat né cuadriyen. De ngú, salóno golno tigaaga párrafo né golno guirá textos pal labúuni. Gonyno pensary ló información cú, né guidudyno cuent xi más rareʼ loguiaʼ né órcu salóno guicapyno galrranabdiitz ni napni. Laʼga más rac prepararno, más sacnéni lóono né diti sasac naganno gony comentarno (2 Cor. 9:6).

16. ¿Xí herramientas naplo, né ximod raquiinlo láani?

¹⁶ Guiquiinno herramientas ni ma napno. Jehová raquiin xcudx par guidudy lóono herramientas electrónicas par gacné lóono guisuidytzayno xquiichno. Ló aplicación JW Library^® labúu guilitno tipnés publicaciones de estudio ló teléfono o tableta xtunyno. Modcu labúu guisuidyno guirá ni sieed ló publicación, golno o guicadiagno láani ortísi né rotísi lagary ni nainy lóono. Noʼ tipnés herman ni raquiin aplicación reʼ par guisuidy xquiich órni noʼyibu ló dxiin o órni noʼyibu lainy yolayscuel, o órni seʼyibu ló néz. Láaca noʼ toib programa ni laa Watchtower Library né láaca noʼ Watchtower BIBLIOTECA LÓ INTERNET, diti nagan par guisuidyno xquiichno né guirá programas reʼ.

17. a) ¿Xigony galán láani cueʼlo xidal comentarios? b) ¿Xí bisuidylo ló video Góc ximig Jehová: Buny preparar comentario xtunylo?

¹⁷ Pal labúuni gony prepararno xidal comentarios ló tigaaga artículo. ¿Xigony? Portín diti guirá ór ni guilísno ñano sony comentarno. Portín stipnés láaca salís ña órni guilísno ñano. Hermano ni rony estudio de Guiich ni caniʼ rabiʼbu balac comentarios noʼ par diti tudybu tiemp. Por ngú diti guidzuitzno o guireʼganno pal diti labúu rony comentarno ló primer párrafo ni noʼ. Órni rasuidytzayno xquiichno napno más oportunida par gony comentarno. Toib cós ni labúu gonyno ngú golno toib texto ni sieed ló la Biblia. Pal labúuni gony prepararno toib comentario ni guireʼ lainy xcalnabanyno. *

18. ¿Xigony comentarios ni guidudyno non gacni dop?

¹⁸ Diti guidudyno comentario sioʼol. Órni guirá comentarios racni dop né nayaani rony animarni lóono. Por ngú guidudyno comentario de galaʼ minut (Prov. 10:19; 15:23). Nigolú rasac que herman ni ma sané xidal íz guislooyibu láani modreʼ. Pal hermanos reʼ radudyibu comentarios nigolú sioʼol, ndeʼ labúu gony que stipnés diti sap balory guilís ña portín sonybu pensary que diti labúu saniʼyibu xomod rony stipnés láani. Órni guirá comentarios dopni, stipnés herman labúu gony comentar. Pal radudyno comentario ló primer párrafo, diti guinino que ndeʼ que ndúc, diti guinino guirá ni sieed ló párrafo cú. Órni ma bitlaa xi ni más rareʼ loguiaʼ labúu guinino stipnés cosien (bibiʼ cuadriyen ni laa, « ¿Xí más labúu guiniya órni gony comentar?»).

19. ¿Ximod herman ni casuidy né lóono Guiich ni caniʼ labúu gacné lóono, per xí raquiin gonyno?

¹⁹ Gaibyno herman ni cayony estudio de Guiich ni caniʼ ló xi párrafo nainy gony comentarno. Pal ragoʼno guicno gonyno láani modreʼ, gaibyno hermano reʼ antes de saló reunión. Órni ma bidxinno ló párrafo cú, guilíscano ñano guiaʼ par labúu guibiʼbu láani.

20. ¿Xigony labúu guinino que reunión nacni xomod órni roono toib galrro né ximigno?

²⁰ Reunión ni rac lainy congregación nacni xomod órni cayóno né ximigno. Pal tipnés hermanos raruʼyibu lóono guáno toib barbacoa né ranabyibu lóono sanéno tipnés cosien, ¿xí láani sonyno? Sigory moda nadzuibyno, per ronyno rutirigaʼlni lóono par ñonyno toib cós ni rioladxyibu. Né scúca ló reunión, Jehová ma buny preparar cós tzaay par lóono (Sal. 23:5; Mat. 24:45). Rioladxbu que guidudyno toib cós ni ma bunytzaayno. Por ngú guisuidytzayno xquiichno, né gonyno rutirigaʼlni lóono par gony comentarno ló reunión. Modcu diti nosi lóono guáno galrro ni bunytzaay Jehová, láaca sacnéno stipnés guá galrro reʼ.