La Biblia bitzaʼ mod bibanyibu

¿XÍ LÁANI buny que toib rastafari nasiambu mod bibanybu né ma diti nabixladxbu buñquiich? ¿Xigony toib mbioxhlas goloʼ guic ma diti nayopybu galrradíil né nasiambu natoʼbu drogas né guirá mod bunybu? Ganno xi rasetlayibu.

«Ma diti bibixladxi buñ» (HAFENI NGHAMA)

ÍZ: 34

GUDX: ZAMBIA

TIPNÉS CÓS NI BUNYBU: GÓCBU RASTAFARI

NI BUNI LÓ DZÚ NI SEE: Xtol guerr, xinaʼya bixonybu de Namibia né goyoʼbu lad Organización de gudx África del Suroeste. Buñ ni goyoʼ lad movimiento reʼ bireʼyibu contra régimen sudafricano ni buny mandary Namibia ló dzúcu. Xinaʼya goyee toib campo de refugiados de Zambia, né cu goola.

Godudi quins íz ló gadzéga campos de gudx África. Grupo reʼ, ni gosanir lainy liberación xtuny Namibia, bisuidybu mbioxhlas ñanladx buñquiich né ñoʼyibu ló política.

Dzú gopa ons íz goniiny naʼ ñaca cristiano, por ngú goyaʼya ronoʼ xobal de iglesia ni goyoʼ ló campocu, ro goyee católicos, luteranos, anglicanos né stipnés buñ. Per xobal reʼ diti goniiny ñony láani. Nigolú bireʼgana né góca ateo. Ná scú dzú gopa quins íz, goyoʼya lad movimiento político religioso ni góc laa rastafaris. Buni láani portín bioladxi música reggae, per láaca par nadíila, par diti cuenunysi ñonyibu buñ yaʼas de gudx África. Goloʼni guica xomod ragoʼny rastafari guic, gosalóya godóba mariguan, ma diti godóya beel nili galrro ni sieed de nimal né gosalóya buny defender nosi buñ yaʼas. Ná scú diti bitzaʼya mod bibani, né bibiʼyraya películas ro ronynaa né ragaity buñ saʼ. Né diti bisiana diitznaa né diitz yox.

¿XIMOD BITZAʼ LA BIBLIA MOD BIBANI?: Ló íz 1995, dzú gopa gaal íz, buni pensary xi ñoni né galnabany xtuni. Par ló dzúcu ma sanéya xiroʼ tiemp cayoola guiich xtuny rastafaris ni radxin ladxñaya, né tipnésni bitnéni textos ni sieed ló la Biblia, per diti bioladxi mod golexayibu láani. Por ngú, goloʼya guica nasudi láani stipnaʼca.

Né xcalrracné ximiga rastafari, gopa toib guiich de testigos xtuny Jehová. Né nimaca gosaló bisudi láani né la Biblia. Diti xidzú después goninéya Testigos, né xcalrracnéyibu bisudi más. Antes ni nasudi la Biblia né layibu, bitzaʼya xidal cós.

Nigolú gosac nagana nasiana nagoba gues né galrrasoch (2 Corintios 7:1). Láaca goctzaya, né dada bigaya guica né goloʼni láani sacró, ma diti bibiʼya películas ro ragaity buñ né ronynaa saʼ né ma diti bibiʼya pornografía, né ma diti goniya diitznaa (Efesios 5:3, 4). Después dada ma diti bibixladxi buñquiich (Hechos 10:34, 35). Par labúu natzaʼya guirá ndeʼ, nír non nasiana nacadiaga música ro ritlaa de galrrianladx né ma diti nadzaʼga buñ ni bikíil naʼ ñoni cós mal.

Órni bisiana guirá ndeʼ biyobi toib Salón del Reino de testigos xtuny Jehová. Órcu gosaloya bisudi la Biblia né goloʼya guica ñonisa. Xfamila diti bioladx láani. Xinaʼya góoch naʼ que ñoʼya lad nitisi «religión» per diti lad Testigos. Né toibtica xfamila ni nac buñchiin guirá ór goniʼbu mal de naʼ por ni ma goloʼya guica goni.

Xfamila diti bioladx né bixiichyibu naʼ, labúu buni guantary portín bisoba ejemplo né xcalrrasuidy Jesús. Láaca gondxichi que Testigos nap religión ni rasuidy xinésni, portín guirá ni bisuidyibu naʼ radzaktzayni né ni ná la Biblia. Guirá ór rasobyibu ni rony mandary Dios ló la Biblia, por ngú rony predicaryibu guirá buñ (Mateo 28:19, 20; Hechos 15:14). Láaca diti rioʼyibu lad política (Salmo 146:3, 4; Juan 15:17, 18).

¿XÍ GALNASÁC MA CUAʼYA?: Ni rasoba ni sieed ló la Biblia ma gocnegoluʼni naʼ. Ma diti ragoba mariguan, toib vis ni gosac más de tigayoʼ dólares tip beʼo. Nigoreʼ ma diti ranit xpensari, né ma naca buñ nasac.

Dzú góca mbiox goniiny naʼ nabani sacró, né ndeʼra ma cayonyni láani. Per ni más rasac ngú ni ma noʼya gax de Dios (Santiago 4:8).

«Ma labúu buni mandary xcalnadzutzi» (MARTINO PEDRETTI)

ÍZ: 43

GUDX: AUSTRALIA

TIPNÉS CÓS NI BUNYBU: BIGAITYBU BUÑ NÉ BITOʼBU DROGAS

NI BUNI LÓ DZÚ NI SEE: Dzú góca mbiox xfamila nigolú bitzaʼyibu lagary; golésdo lainy xidal gudxyen lainy toib gudxrop, né por tidxó tiemp ló toib misión aborigen lainy xcudxdo. Rasetnaladxi dzú goyoʼya né xprima né bixoya. Gonásdo beel, goyoʼdo campear, bunytzaaydo bumeranes né bunydo stipnés cós.

Góca buñdzuitz né biyobi galrradíil, portín bixiosa ni góc boxeador bisuidy naʼ nadíila desde dzú góca mbiox. Dzú góca mbioxhlas godudydzúya lainy cantin. Ximiga né naʼ bioladxdo nayopydo galrradíil. Gosanédo labax né xac béisbol, goyoʼdo ló galrradíil ro goyoʼ más de gaal buñ.

Par labúu buni gan bidxiich, bitoʼya drogas né mercancía ni golaʼn buñ ni ronyca dxiin ló muelles. Láaca buni dxiin né buñ ni bitoʼ drogas, gonaba xpidxiichyibu buñ ni diti ma godix layibu né bitzubi guirá buñreʼ né guip. Goniya: «Guigati, o guigaityibu naʼ». Goniiny naʼ ñaca toib buñ ni ragaity.

¿XIMOD BITZAʼ LA BIBLIA MOD BIBANI?: Rasetnaladxi bicadiaga de testigos xtuny Jehová dzú góca mbiox. Per dada dzú gopa más de gaal íz goniiny naʼ ñaana chú layibu, por ngú gonabdiidza xinaʼya. Chop govitz después toib Testigo ni laa Dixon godap xitz puert xtuni. Biiydo diitz tiprat né después biruʼbu naʼ ñaʼya reunión né láabu. Ngú góc primer reunión ni goyaʼya, né desde dzúcu ma sanéya gaal íz de goloʼ riaʼya. Bioladxi que guirá galrranabdiitz ni buni layibu golexayibu láani né la Biblia.

Bisuidyibu naʼ que Jehová Dios rioʼ galrrasaʼ por buñgudxlio, né dada buñ ni diti rap respet láabu (2 Pedro 3:9). Láaca bisudi que láabu nacbu Bixiosa ni nadxiʼ naʼ né sanbu naʼ ná stipnés diti sony láani. ¡Balaati buny animarni naʼ órni goona que pal ratzaʼya, labúu natudybu scásiʼ guirá xcalkiéya! Goyoʼ toib texto ni sieed ló la Biblia ni gocnégoluʼ naʼ: Efesios 4:22-24. Cu náni que non guisianno mod bibanyno nírcu né gacno buñ copy xomod raniiny Dios.

Gosac nagana nasiana mod bibani. Labúu godudi xidal dzú sin naquiinna drogas, per órni radxin guic xomal né goyoʼya né guirá ximiga biaba loni stoib. Bidudi cuent que diti labúu natzaʼya pal radzaksaya layibu, goloʼya guica ma diti nadzaʼga layibu né ñaʼya stoib lagary. Gosaguela que tipnésyibu ñony compañer naʼ ló viaj, per bidudyibu mariguan naʼ. Goodxi layibu que ma goloʼya guica guisiana vis, né órni bidxindo ro ralox gudxcu bisiana layibu. Diti xidzú después goona que golanyibu lainy toib bank né xcalrracné toib scopet.

¿XÍ GALNASÁC MA CUAʼYA?: Órni bisiana guirá ximiga, ma diti gosac nagana natzaʼya. Bidxin midid goyonisa xomod Testigo íz 1989. Después bisana, bixiosa né xinaʼya láaca goyonisyibu.

Ló naareʼ ma sanéya 17 íz de goloʼ buni galtzeʼel né napa tzón xiinna. Nigoreʼ ma labúu raniya que ma labúu buni mandary xcalnadzutzi, ná rioʼ buñ ni ratzaldaʼ naʼ. Láaca bisudi gandxiʼya guirá clas buñ, nac nitisi color xtunyibu o diitz ni raniʼyibu (Apocalipsis 7:9). Dipa rialadxi diitz ni goniʼ Jesús ni gocnégoluʼ naʼ: «Pal diti rareʼto ló xcalrrasudi, nigolú nacto xpiina; né galnigolú salaa lóoto» (Juan 8:31, 32).

[Comentario]

Par labúu natzaʼya guirá ndeʼ nír non nasiana de nacadiaga música ro ritlaa de galrrianladx.

[Comentario]

Ximiga né naʼ bioladxdo nayopydo galrradíil. Gosanédo labax né xac béisbol, goyoʼdo ló galrradíil ro goyoʼ más de gaal buñ.