Oración, ¿pu ór né pu lagary gonyno láani?
CASI guirá religión ni noʼ ló Gudxlio, napyibu toibpa lagary né ór ro ronyibu oración. Per ¿rasetlaa la Biblia láani la?
La Biblia rasetlaa pu ór labúu gonyno oración. Jesús bidudybu guixquix Dios antes de ñoobu (Lucas 22:17). Xpiimbu láaca buny oración guirá ór, órni bidopyibu par gony adoraryibu Dios. Ndeʼ diti gocni toib costumbre copy. Portín maca ronyibu láani lainy sinagogas judías né láaca lainy templo ni goyoʼ Jerusalén, lagarycu goniiny Dios ñacni toib «yoʼ de oración par guirá gudxrop» (Marcos 11:17).
Dios rioladx que xpiimbu guidop né gony oración toibsi, mod ná la Biblia. Oración labúu guichiinni looy gonylo stipnés cós ni diti labúu ñonylo (Hebreos 13:18, 19). Por ngú, testigos xtuny Jehová ronyibu oración ló xireuniónyibu. Pal nainy looy guicadiaglo oración ni ronyibu labúu tzeelo lainy Salón del Reino ni noʼ más gaxtiguié ro rabéslo, ro radop guirá Testigos.
La Biblia diti rasetlaa xipa ór gonyno oración o pu lagary gonyno láani. Rasetlani que xpiin Dios buny oración ortísi né rotísi lagary. Jesús goniʼ: «Órni guininélo Dios, goyoʼ lainy xcuartlo né, órni ma bisieglo xpuertlo, goniné Bixioslo ni noʼ nagach. Ór cú Bixioslo ni rabiʼ nagach saguiix looy» (Mateo 6:6).
Labúu guininéno Dios ortísi né rotísi lagary.
¿Diti radziguiaʼlo que labúu guinabno xcalrracné ni Bisaʼ guibá né Gudxlio nac nitisi ór né lagary ronoʼno la? Ndeʼ racné lóono guienno xigony Jesús biyopy lagary par labúu ñonybu oración toibbu. Toibtica buelt antes de gonybu toib cós, guidopynac gueʼel bunybu oración (Lucas 6:12, 13).
Per láaca goyoʼ tipnés buñguieeu né buñgonaʼ ni gonab xcalrracné Dios antes de ñonyibu toib cós o órni cualóyibu galnagan. Ná pal goniʼyibu láani fuers o goniʼyibu láani tzagaa, o bunyibu láani nisló xidal buñ o láasiyibu, ni más rasac, que bunyibu láani. Jehováca raiby lóono ndeʼ: «Colguinab lóo Dios guirási ór» (1 Tesalonicenses 5:17). ¿Diti nac ndeʼ toib invitación portín ronladxbu lóono la? Dios puextca noʼbu guidiagbu xpiimbu ortísi caquiinyibu láani.
Per ná scú, xidal buñ diti raluladx né ranabdiitzyibu pal noʼ pu raquiin oración. Sigory dada looy ranabdiitzlo ndeʼ.
Sigory láaca sioladxlo ndeʼ
GUIICH NI CANIʼ
Oración, ¿noʼ pu raquiinni la?
Oración racnéni lóono emocional, físico né máspa la, espiritual.