La Biblia bitzaʼ mod bibanyibu

¿Xí bichiin toib buñ ni godxit por bidxiich né góc buñ gobáan par nasiambu galrraguit né natzaʼbu mod nabanybu? Guibiʼno xi goniʼbu.

«Nigolú bioladxi carreras de mainy» (RICHARD STEWART)

ÍZ NI GOLBU: 1965

GUDX: JAMAICA

TIPNÉS CÓS NI BUNYBU: GODXITBU POR BIDXIICH NÉ GÓCBU BUÑ GOBÁAN

NI BUNI LÓ DZÚ NI SEE: Goniʼsa lainy toib gudx pobre de Kingston, capital xtuny Jamaica, ro diti goyoʼ dxiin né nogoluʼ buñ mal. Buñ ni golés lagarycu nigolú bidzuiby por guirá buñ malcu. Casi guirá dzú goyoʼ ni goditz tir.

Xinaʼya bunygoluʼ dxiin par nasniʼsbu naʼ né stoib buchi, néca bisanienna. Né láaca bixelbu lóodo scuel. Per naʼ nigolú bioladxi carreras de mainy, diti bioladxi ñaʼya scuel. Guirá ór diti goyaʼya scuel par ñaʼya nabiʼya ro raxony mainy. Dada gorubi tipnés mainy.

Diti xidzú después nigolú godxita por bidxiich né gosanéya xidal buñgonaʼ. Láaca godóba mariguan. Par labúu nabani scú gosalóya golana né por ngú gopa xidal guip. ¡Labúu diti bigati ni toib buñ órni golana xpidxiichyibu!

Bidxin midid gonásyibu naʼ né goloʼyibu naʼ lachquiip. Per órni bireʼya gosalóya golana stoib. Ma más peor buni. Lóoya bidudyni diitz que naca buñtzay per naʼ diti goyoʼya ló razón, góca buñdzuitz né buñ mal. Nosi goyoʼya galrrasaʼ por naʼ.

¿XIMOD BITZAʼ LA BIBLIA MOD BIBANI?: Ló tiempcu, xinaʼya gosaló bisuidy la Biblia né bidxinbu gócbu testigo xtuny Jehová. Ni bitzaʼbu mod nacbu, bichiinni naʼ ñaana xigony. Goniiny naʼ ñaana xigony bitzaʼbu, por ngú gosaló goniya de la Biblia né Testigos.

Órcuca bidudi cuent que layibu diti rasuidyibu ni rasuidy stipnés religión né guirá ni rasuidyibu sieedni ló la Biblia. Bidudi cuent que nosi layibu rasaayibu yoʼ por yoʼ né rasuidyibu buñ ni ná la Biblia, xomod buny cristianos ni bibany ló siglo primero (Mateo 28:19; Hechos 20:20). Ni buny que naluladxi que layibu ngú religión ni rasuidy xinésni, láani ngú galnadxiʼ ni raslooyibu saʼyibu (Juan 13:35).

Órni gosaló bisudi la Biblia, bidudi cuent que non natzaʼya mod nabani. Jehová Dios rianladxbu galyoxh né pal nainy ñoni xchiimbu non nasiana guirá ni rony buidy ladi (2 Corintios 7:1; Hebreos 13:4). Ni goona que guirá ni roni labúu coʼ nakitni o coʼ nabanni Jehová bidxinni dada lainy xcalnabani (Proverbios 27:11). Ma diti godóba mariguan né ma diti gopa guip, né buni xtem par natzaʼya mod naca. Ni más gosac nagana ngú nasiana guirá buñgonaʼ ni gosanéya, né galrraguit por bidxiich.

Primer la, diti goniiny naʼ ñan ximiga que casudi la Biblia né Testigos. Per bitzaʼya mod buni pensary órni biila ni goniʼ Jesús ló Mateo 10:33: «Pal noʼ ni raniʼ nisló buñ que diti rimbu naʼ, naʼ láaca saniya que diti rimbuya láabu nisló Bixiosa ni noʼ guibá». Órcuca goodxi guirá xcompañera guirá ni cayoni. Diti gonyibu xi naniʼyibu: diti biluladxyibu que toib buñ xomod naʼ naniiny ñac cristiano. Ná scú goodxi layibu que ma goloʼya guica guitzaʼya mod naca.

¿XÍ GALNASÁC MA CUAʼYA?: Xinaʼya nigolú bibaladx órni bibiʼbu que ma casoba ni ná la Biblia, nigoreʼ ma diti riogoluʼbu galrrasaʼ por xi guirá cayoni, guiropcado rioladxdo guinido de cós ni rioladxdo gonydo: galnadxiʼ ni napdo Jehová. Rioʼ ór, órni rasetnaladxi mod bibani, rasac nagana guiluladxi que ma bitzaʼya mod naca né xcalrracné Dios. Ma diti rioladxi goni galyoxh nili guiyopygoluʼ bidxiich mod buni nírcu.

Nandxichi que pal diti nasoba ni ná la Biblia ma noʼya lachquiip nigoreʼ o ma goti. Per por ni bisudi ló la Biblia, nigoreʼ nabani nakit né xfamila. Tzeʼela nigolú racné naʼ né napdo xiindzapdo ni rasob lóodo, né guioncado ronydo xchiin Jehová goxtiguie. Diti naana ximod labúu guidudi guixquix por ni goyoʼ toib ni bisuidy naʼ ni ná la Biblia. Por ngú, guirá ór raniya ni ná la Biblia né stipnés buñ. Radudi guixquix Jehová ni ma noʼya lainy xcudxbu, per ni máspa la, radudi guixquix por ni bixelcaʼbu naʼ ronoʼbu né galrronladx.

[Comentario]

«Ni goona que guirá ni roni labúu coʼ nakitni o coʼ nabanni Jehová bidxinni dada lainy xcalnabani»

[Dibuj]

Tzeʼela né xiindzapa

[Dibuj]

Xinaʼya bitzaʼ mod góc, né ngú bichiin naʼ ñaana xigony