Dzú góca mbioxhlas golésa gaxca gudx Leipzig, ni nac República Democrática Alemana, riaʼanni gaxca Polonia né República Checa. Órni gopa 6 íz goyoʼdo goylésdo gudx Brasil por dxiin ni gop bixiosa, né de ngú soʼdo niis gudx Ecuador.

Órni gopa 14 íz, bixiosa né xinaʼya bunyibu que nabiguetta gudx Alemania par nasudi lainy toib internado. Diti goyoʼya né layibu, por ngú ma xcuenta goyoʼ guiráni. Diti goyoʼya galrrasaʼ por stipnés, né diti bidudi cuent pal guirá ni buni bitzuitzni stipnés buñ.

Bixiosa né xinaʼya bibiguetyibu gudx Alemania órni gopa 17 íz. Primer la, goyoʼya né layibu, por ni ma diti goyoʼya galrrasaʼ por stipnés gosac nagana nasoba layibu, né órni gopa 18 íz bisiana layibu.

Guirá ór ma diti goyoʼya conforme mod bibani, por ngú biyobi tipnés cós ni ñoni. Bibiʼya xi láani rony tipnés grupos né organizaciones, né goloʼya guica nimbuya ni noʼ ló Gudxlio antes de guinitló buñgudxlio láani.

Gosiiya toib mot, bireʼya gudx Alemania né saʼya niis África. Per diti xidzú bibigueta gudx Europa portín bixin mot xtuni. Órni goctzayni, goyaʼya gudx Portugal. Órcu buni xpensari que ma diti guiquiina mot, más galán guiquiina bark.

Bidzaga tipnés mbioxhlas ni caa guic tzee océano Atlántico. Ladyibu goyoʼ toib mbioxhlas ni laa Laurie, ni bidxin góc tzeʼela. Goyoʼdo lainy bark dada islas del Caribe, diti goclado gudx Puerto Rico, de ngú bibiguetdo Europa. Laurie né naʼ biyopydo toib bark mitien par labúu nabésdo lainyni. Tzón beʼo goclado biyopydo láani, per diti birebuʼni portín goyoʼya ló galsoldad gudx Alemania.

Quins beʼo goyoʼya ló Marina, né ló tiempcu bunydo galtzeʼel. Goniiny lóodo nasaado par nabiʼdo guirá ni noʼ ló Gudxlio. Né antes ni ñoʼya ló galsoldad gosiido toib lanch mitien, né laʼga noʼya ló galsoldad bunytzaaydo láani par bunydo láani toib bark mitien. Goniiny lóodo nabésdo lainyni né nasaado nimbudo guidopynac Gudxlio. Después ni bireʼya ló Marina, né antes de nasloxdo barkcu, testigos xtuny Jehová goniné lóodo, né gosalódo bisuidydo ni ná la Biblia.

Primer la, diti buni xpensari que raquiin guitzaʼya mod naʼca: buni galtzeʼel né buñgonaʼ ni golesnéya né ma diti godóba gues (Efesios 5:5). Láaca, buni xpensari que ni ma cayimbuya guirá cós sacróyen ni bisaʼ Dios, ngú ni más galán ni goni.

Per nanto la, noʼra tipnés cós ni yása guisiana. Né walsa naca buñ farmay né diti rioʼya galrrasaʼ por stipnés, nigolú góca buñ xiatz né goniiny naʼ naniya de guirá ni ma buni. Máspa goyoʼya galrrasaʼ por naʼ.

Toibtica buelt biila discurs ni goloʼ Jesús laidy dainy (Mateo, capítulos 5 a 7). Primer la bidziguiaʼya guirá ni goniʼ Jesús de galnakit. Por ejemplo, bisetlabu que buñ ni calaʼn né calaʼn nís labúu tzoʼ nakit (Mateo 5:6). Per gonabdiidza naʼca, ximod toib buñ ni calaʼn né calaʼn nís labúu tzoʼ nakitbu. Laʼga casudi más ni ná la Biblia, bidudi cuent que guiráno raquiin guimbuno Dios né par labúu gonyno láani non guidudyno cuent que raquiin gonyno láani. Nacni xomodpa goniʼ Jesús láani: «Dichós guirá buñ ni nan que non guiyopy Dios» (Mateo 5:3).

Laurie né naʼ gosalódo bíildo la Biblia gudx Alemania, goyoʼdo gudx Francia né de ngú soʼdo Italia. Rotísi lagary ro goyoʼdo goyoʼ Testigos. Nigolú bidziguiaʼya galnadxiʼ ni gopyibu saʼyibu né mod godabioyibu saʼyibu. Bidudi cuent que guiráyibu raguaʼyibu toibsi ló guidopynac Gudxlio (Juan 13:​34, 35). Bidxin midid goyonisdo.

Ná ma naca testigo xtuny Jehová, biquiin natzaʼya mod naca. Laurie né naʼ goloʼdo guicdo ñoʼdo niis costa ni riaʼan África né nadudydlagdo Atlántico dada nadxindo gudx Estados Unidos. Órni tzeʼela né naʼ noʼdo galay nisdaʼ, né nagoʼ nís lóodo bidudi cuent que mitienno nisló ni Bisaʼ lóono. Gopa xiroʼ tiemp lainy nisdaʼ, diti goyoʼ xiroʼ cós ni labúu ñoʼni por ngú gosaloya biila la Biblia. Ni máspa la buni pensary ló historia ro ritlaa de Jesús. Ná diti gopbu galkié gopbu cualidades ni labúu guidziguiaʼno, né dipa biyopybu mod nadziguiaʼ buñ láabu. Más goyoʼbu galrrasaʼ por Bixiosbu, que por láacabu.

Órni buni pensary ló guirá ni buny Jesús, bidudi cuent que diti noʼ xi portín nadudi tiemp ni riaʼan sobra ló xchiin Gobierno xtuny Dios, xalagary ngú non ñodieʼya loni (Mateo 6:33). Órni bidxindo gudx Estados Unidos, goloʼdo guicdo ma diti ñonydo ni bunydo nírcu, xalagary ngú ñodieʼdo ñonydo xchiin Jehová.

Nírcu órni buni pensary lósi naʼ dipa gopa confianz pal narebuʼ ni nagoʼya guica ñoni. Nigoreʼ ma bidzela toib lagary ro ralainy sabiduría ni diti raché (Isaías 48:​17, 18). Láaca ma bidudi cuent que noʼ xi portín noʼya ló Gudxlio: gony adorar a Dios né gacnéya buñ guimbu láabu.

Ma sacró rabesnéya Laurie, nacni scú portín consej xtuny la Biblia gocné lóodo. Láaca, Jehová bidudy xcalnasác lóodo portín napdo toib xiindzapdo ni rimbu Dios né nadxiʼ láabu.

Racalódo tipnés galnagan. Per Jehová dipa ma bisian lóodo, né ma goloʼdo guicdo diti guireʼgando né gapdo confianz lóo Jehová guirá ór (Proverbios 3:​5, 6).