Conforma radudy dzú buñ ma más peor rony. Buñ ni riee ló doctor nagüetyibu raniʼdieyibu doctor; buñ ni roo lainy restauran radilnéyibu ni rony dxiin lagarycu; buñ ni rioʼ lainy roplan ronynayibu buñ ni rony dxiincu; mbiox ronyibu borla, rac nadoxyibu né racalóyibu mextra. Láaca, tipnés políticos rioʼyibu lad galrradíil, laʼga stipnés políticos rayopyibu mod guislooyibu que napyibu respet.

 La Biblia rabexa ximod non guislooy buñ respet. Láaca raslooyni xigony ma diti noʼ respet ló xtzúno.

 Ló guidopynac Gudxlio, buñ ma más peor rony, né ma diti napiʼyibu respet por cós tzaay nili por costumbres tzaay.

•   Toib encuesta ni buny Gallup ló ndeʼga, buñ estadounidenses goniʼyibu que lainy Estados Unidos ma diti tampa noʼ buñ ni rony cós tzaay né ni nap respet mod goyoʼni de goló 22 íz.

•   Ló stoib encuesta ni góc a más de 32.000 buñ lainy 28 gudxrop, 65 por ciento de layibu goniʼyibu que diti ma goyoʼ dzú bibiʼyibu que nigolú ma diti noʼ respet.

 La Biblia bisetlani guirá ni cabiʼno ló naareʼ.

•   «Ló dzú ni ma guidubylagaʼ sieed tiemp nagan, né nagan par gony guantary buñ láani. Portín buñ nosi sioʼyibu galrrasaʼ por láasiyibu, sasobladxyibu bidxiich, sacyibu buñ nabeʼt, buñ ni riatz, buñ ni raniʼ mal de Dios, buñ ni diti rasob bixios, ni diti radudy guixquix né ni rasian sa’, ni diti nap galrronladx, ni diti radxin toib acuerdo, ni raniʼ pór galrrascú rodann de stipnés, ni diti labúu rony mandary láacabu, buñ nadox, ni diti nadxiʼ cós tzaay» (2 Timoteo 3:1-3).

 Pal nainy looy ganlo ximod cayac cumplir profecía reʼ, bíil artículo ni laa, «¿Predijo la Biblia cómo sería la gente en nuestros días?».

 Ná ló guidopynac Gudxlio buñ ma más peor rony, xidalguixo buñ ma bisuidyibu que la Biblia ragonés tzaay buñ par gony xinésni. Cós tzaay ni rasuidy la Biblia lóono, guirá ór labúu gapno confianz láani, nigoreʼ né por tipzó (Salmo 111:8) Guibiʼno chop ejemplos:

•   Ni ná la Biblia: «Guirá cós ni nainy lóoto gony buñ lóoto, láaca scúca colgony layibu» (Mateo 7:12).

   Ni radudyni diitz: Non cobiono stipnés buñ mod naniiny lóono nagobiooyibu lóono; sacró né respet.

•   Ni ná la Biblia: «Nigoreʼ ni ma bisianto guirá clas galrrascú, cada toibto colgaiby saʼto ni nigolú» (Efesios 4:25).

   Ni radudyni diitz: Guirá ór guinino ni nigolú né gonyno xinésni.

 Par ganlo más de tema reʼ, bíil ndeʼ:

•   Guiich ni caniʼ, laani «Toib libro ni ragonéstzay lóono par gonyno xinésnii».

•   Artículo «¿Radudy la Biblia permís gony buñ nitisi cós la?».