23 de may íz 2023, Director general de Salud Pública de Estados Unidos goniʼ que redes sociales cayonyni mal xidal mbioxhlas.

•    «Nigolú, redes sociales labúu racnéni mbioxien né mbioxhlasien, per noʼ xidal prueby ni raslooy que noʼ riesga guixoʼ guicyibu né gonyni mal layibu» (Social Media and Youth Mental Health: The U.S. Surgeon General’s Advisory [Redes sociales né mod raguiñani mbioxhlas: Informe xtuny director general de Salud Pública de Estados Unidos], íz 2023).

 informe cu rasetlaa mod bireʼ tipnés estudios ni góc ni raslooy que guirá ndeʼ nacni toib galnagandaʼ:

•    Mbioxhlasien ni nap de 12 a 15 íz «ni godudy más de tzón ór guirá dzú ló redes sociales goyoʼ más riesga naxoʼ guicyibu, ni raguiña ñapyibu depresión né ansiedad».

•    Lad mbioxhlas de 14 íz «bienni que mbioxhlas ni godudy más tiemp ló redes sociales, diti labúu goisytzaybu, goyoʼ buñ ni buny cós mal o bixiich layibu por internet, diti bioladxyibu mod rienyibu, goyoʼ nabanyibu né más gocxiroʼ depresión ni gopyibu, né mbioxhlasgonaʼyen ngú ni gosaclóo más láani».

 ¿Xí labúu gony bixios né xinaʼ mbiox par gapyibu xiinyibu de riesga ni noʼ ló redes sociales? La Biblia radudy consej galán.

 Goyoʼ xcalrrasaʼni. Buny pensary xi riesga noʼ ni guiquiin xiinlo redes sociales, né de ngú buny pensary pal labúu guiquimbu láani.

•    Texto ni rareʼ loguiaʼ:«Bisniʼs xiinlo ló néz ro non saabu» (Proverbios 22:6).

•    Par ganlo más, bíil artículo ni laa «¿Deberían mis hijos usar redes sociales?».

 Pal radudylo permís xiinlo guiquiin redes sociales, cuá cuidad riesga ni noʼ né goyoʼ galrrasaʼ por ni rony xiinlo ló internet. ¿Ximod labúu gonylo láani?

 Gop xiinlo de guirá cós ni noʼ ló internet ni labúu gony mal láabu. Bisuidy xiinlo guidudy cuent xi cós ni noʼ ló internet labúu gonyni mal láabu né ni labúu gonybu par diti guibiʼbu láani.

•    Texto ni rareʼ loguiaʼ: «Galyoxh né nitisi cós buidy o galrrasobladx, nili guitlaani ladto […]. Láaca diti guiniʼto cós ni radudy galnatoy, diti guiniʼto diitz ni diti raquiin, diti cueʼto galrraxiich né diitz yox» (Efesios 5:3, 4).

•    Sadzelo tipnés consej ni sacné looy ló artículo ni laa «Enséñele a su hijo adolescente a usar con seguridad las redes sociales».

 Goloʼ tipnés reglas. Por ejemplo, góoch xiinlo pu ór né balac tiemp labúu guiquimbu redes sociales.

•    Texto ni rareʼ loguiaʼ: «Colgap cuidad diti gonyto xomod rony buñ ngaʼal, xalagary ngú xomod buñ ni noʼ xcalrrien, colguiquiin xtiempto galán» (Efesios 5:15, 16).

•    Bibiʼ toibsi né xiinlo video xtuny «Pizarra animada» Goloʼ xcalrrienlo órni guiquiinlo redes sociales par gacnélo láabu guiembu xigony raquiin tzoʼ tipnés reglas órni guiquimbu redes sociales.