Tayoo 24 de febrero íz 2022, Rusia gosaló cualó Ucrania, ná goyoʼ tipnés buñxirop ni biyopy mod nacaa ló guerr reʼ. ¿Xí galnagan labúu coʼni ló guidopynac Gudxlio? António Guterres, secretario general xtuny Naciones Unidas, goniʼ ndeʼ: «Diti rigaʼl xpensaryno balaati sanitlóni, satudyni buñ ló galrrioʼob né saxinni mod nabany buñ niis Europa né ló guidopynac Gudxlio».

•   Jesucristo goniʼ que sadxin dzú «gudxrop né gudxrop sadíil, né gobierno láaca sacaló saʼ gobierno» (Mateo 24:7). Bíil artículo ni laa, «¿Xí láani raslooy que ma nabanyno ló dzú ni ma cadubylagaʼ?» modreʼ sanlo que guirá guerr ni cayac ló naareʼ cayony cumplirni profecía ni goniʼ Jesús ni sieed ló la Biblia.

•   Ló libro ni laa, Apocalipsis rony representarni guerr xomod toib buñ ni dxiʼp mainy «color nixináa» né «rabeʼni paz ló gudxlio» (Apocalipsis 6:4). Par ganlo más bíil artículo ni laa, «¿Xí rony representar buñ ni dxiʼp mainy ni ritlaa ló Apocalipsis?» né gon xigony guirá guerr ni cayac raslooyni que cayac cumplir profecía reʼ.

•   Ló libro xtuny Daniel ritlaa «rey del norte» né «rey del sur» né goniʼni que sacalóyibu saʼyibu (Daniel 11:25-45). Bibiʼ video laa, Mod cayac cumplir profecía ni sieed ló Daniel 11 par labúu ganlo xigony Rusia né xpiin nac rey del norte. a

•   Apocalipsis láaca rasetlaa «guerr xtuny Dios ni nap Xiroʼ galnadip» (Apocalipsis 16:14, 16). Per diti nacni toib guerr ro racaló buñgudxlio saʼ, xomod ni cabiʼno nigoreʼ. Bíil artículo ni laa, «¿Xí láani ngú Armagedón?» par ganlo más ximod gac guerr reʼ.

•   La Biblia ná que Dios sanitlóbu «guerr ló guidopynac gudxlio» (Salmo 46:9). Bíil artículo ni laa, «Nanno que sioʼ dzú sabanyno sacró» par ganlo más xi gony Dios ló dzú ni sietra.

•   Jesús bisuidybu xpiimbu guinab guieed Gobierno xtuny Dios (Mateo 6:9, 10). Gobierno reʼ noʼni lainy guibá né sonyni ló Gudxlio ni nainy Dios. Né ni nainy Dios par Gudxlio ngú que guibany buñ sacró. Bibiʼ video ni laa, ¿Xí ngú Gobierno xtuny Dios? par labúu ganlo xi gony Gobierno reʼ por looy.

 Lainy gudx Ucrania noʼ más de 129.000 testigos xtuny Jehová. Né xomodca rony guirá Testigos ni nabany ló guidopynac Gudxlio, rasuʼyibu mod buny Jesús né rasagaʼ galayibu. Por ngú diti rioʼyibu lad partid nili rieeyibu guerr (Juan 18:36). Guirá lad, testigos xtuny Jehová caniraʼyibu «diitz sacró de Gobierno xtuny Dios»; raniʼyibu que nosi Gobierno reʼ labúu sabeʼ galnagan ni cacaló buñ, xomod guerr (Mateo 24:14). Raruʼdo looy guiyopylo lóodo par ganlo más xi esperanza ritlaa ló la Biblia.