La Biblia rasuidy que Dios diti rioladx guiabno «ló galyoxh» (1 Tesalonicenses 4:3). La Biblia ná que «galyoxh» láani ngú órni toib buñ ni ma bitzña rioné stoib ni diti nac tzeʼel, órni toib buñ nac buñ moxh né órni toib buñguieeu né toib buñgonaʼ rioné saʼ scásiʼ.

•  ¿Xigony rasac par Dios gony buñ galtzeʼel?

•  ¿Labúu cuesné buñ saʼ scásiʼ par gony prueby pal labúu gony guantary saʼ la?

•  ¿Ximod labúu guibanyno sacró lainy xcaltzeelno?

•   Dios goloʼ galtzeʼel ló Gudxlio. Bunybu láani órni bisaʼbu Eva par ñac tzeʼel Adán (Génesis 2:22-24). Dios diti bioladx que toib buñguieeu né toib buñgonaʼ nabesné saʼ scásiʼ.

•   Dios nan xí láani ngú ni más galán par lóono. Goloʼbu galtzeʼel par cuesné buñguieeu né buñgonaʼ saʼ por tipzó. Dios goniiny que modcu buñ ñan xfamil. Bunysi pensary ló ndeʼ: pal raniiny lóono guisaʼno toib mueble, raquiin guicanaldo instrucciones ni sitnéni. Modcuca pal raniiny guibanyno nakit né xfamilno, non guisobno ni ná Dios. Guirá ór sarecaano sacró pal rasobno láabu (Isaías 48:17, 18).

•   Pal toib buñguieeu né toib buñgonaʼ rioné saʼ scásiʼ, sacalóyibu galnagan. Labúu sac xiimbu, sacaa galguitz láabu né ma diti sioʼbu sacró.

•   Dios bidudy lóono toib galrrascad: labúu rioʼ xiinno órni ratnéno buñ. Ngú nac toib galrrascad ni nigolú rasac. Gonysino pensary, par Dios nigolú rasac galnabany. Por ngú ranabbu lóono guiquintzayno galrrascadcu né nosi tzonéno tzeelno. Modcu sonyxiroʼno galtzeʼel (Hebreos 13:4).

 Par labúu guibany buñ sacró né tzeʼel, diti rac falt «gonyibu prueby» pal labúu gony guantaryibu saʼyibu né gonyibu pensary que labúu guisianyibu saʼyibu ortísi guiniiny layibu. Xalagary ngú, galtzeʼel rac nadipni más órni guiropyibu ronladxyibu saʼyibu né ronyibu dxiin toibsi par guicalóyibu galnagan. a Nosi labúu gonyibu ngú órni ma bunyibu galtzeʼel (Mateo 19:6).

 Diti noʼ toib galtzeʼel ni diti raché. Per labúu guibanyno sacró, pal rasobno consej ni sieed ló la Biblia. Guibiʼno chop tzónni:

•   Nír coltzoʼ galrrasaʼ por cós ni caquiin tzeelto (1 Corintios 7:3-5; Filipenses 2:3, 4).

•   Guirá dzú colgony por gonladxto né gapto respet saʼto (Efesios 5:25, 33).

•   Nír colgony pensary xi guiniʼto (Proverbios 12:18).

•   Colgap paseins né colguitudy xcalkiéto scásiʼ (Colosenses 3:13, 14).