Espíritu santo láani ngú xcalnadip Dios ni raquiimbu par gonybu dxiin (Miqueas 3:8; Lucas 1:35). Órni Dios raxel espíritu xtuny toib lagary, nac nitisi nac lagary ro raxelbu láani, espíritu santo reʼ ronyni ni nábu (Salmo 104:30; 139:7).

 Ló la Biblia, diitz «espíritu» racáni ló diitz hebreo xomod rúaj, né ló diitz griego racáni xomod pnéuma. Casi guirá buelt órni ritlani ló la Biblia radudyni diitz xcalnadip Dios ni rimbuno xomod espíritu santo (Génesis 1:2). Per rioʼ ór láaca ritlani ló la Biblia par guidudyni diitz ndeʼ:

•   Buu ni racaʼno (Habacuc 2:19; Apocalipsis 13:15).

•   Buu (Génesis 8:1; Juan 3:8).

•   Galnadip ni rascuany tanli buñ né nimal (Job 34:14, 15).

•   Mod rony o mod nac toib buñ (Números 14:24).

•   Espíritus suusi Dios o ángeles (1 Reyes 22:21; Juan 4:24).

 Guirá ndeʼ radudyni diitz que nacni toib ni diti labúu rabiʼno, per nanno que noʼni. Espíritu xtuny Dios, «Nacni xomod buu, diti labúu rabiʼno láani, diti labúu raganno láani né nadipni» (Diccionario expositivo de palabras del Antiguo y del Nuevo Testamento exhaustivo, xtuny William E. Vine).

 Órni la Biblia raniʼ de espíritu santo, raniʼni que nacni suusi «ña» o «bicuña» Dios (Salmo 8:3; 19:1; Lucas 11:20; bitzak láani né ni ná Mateo 12:28). Xomod toib buñ ni rasaʼ guus, raquiimbu ñabu né bicuñabu par gonybu xchiimbu, scúca Dios biquiimbu xcalnadipbu modreʼ:

•   Par bisaʼbu guidopynac Gudxlio né guibá (Salmo 33:6; Isaías 66:1, 2).

•   Par golonésbu buñ ni bicaʼ la Biblia (2 Pedro 1:20, 21).

•   Par labúu naniʼ xpiimbu xtiitzbu né ñonyibu galrradziguiaʼ ló dzú ni see (Lucas 4:18; Hechos 1:8; 1 Corintios 12:4-11).

•   Par gacnébu buñ ni rasob láabu gap cualidades (Gálatas 5:22, 23).

Espíritu santo diti nacni toib buñ

 Órni la Biblia ná que espíritu santo nacni suusi «ña», «bicuña» o «buu» xtuny Dios, raslooyni que espíritu diti nacni toib buñ (Éxodo 15:8, 10). Suusi toib buñ ni rasaʼ guus, diti ñasibu rony dxiin. Scúca, espíritu xtuny Dios nosi ronyni dxiin órni láabu rasanésbu láani (Lucas 11:13). La Biblia láaca ná que espíritu xtuny Dios nacni suusi nís né ratzak laani né stipnés cós, xomod fe né galnan. Ndeʼ láaca radudy diitz que espíritu santo diti nacni toib buñ (Isaías 44:3; Hechos 6:5; 2 Corintios 6:6).

 Ná la Biblia ná que Dios laabu Jehová né Xiimbu laa Jesucristo, ni toib lagary sieed ximod laa espíritu santo (Isaías 42:8; Lucas 1:31). Toibtica buelt, discípulo Esteban gop toib visión, bibiʼbu chopsi buñ, diti tzón. La Biblia ná: «Laʼga bidzabu de espíritu santo, bibiʼbu lainy guibá né bibiʼbu gloria xtuny Dios né Jesús sagaʼ xiladbuʼ Dios» (Hechos 7:55). Dios bidudybu espíritu santo a Esteban par labúu bibiʼ Esteban visióncu.

 Tipnés buñ ná: Espíritu nacni toib buñ, né nacni toib trinidad. Scú ritlani ló 1 Juan 5:7, 8 ló tipnés biblias, xomod Torres Amat né Reina-Valera.

 Ni nigolú: Biblia ni laa Torres Amat ná ló 1 Juan 5:7, 8: «Tzónyibu raniʼ lainy guibá: Padre, Verbo né Espíritu Santo; né guioncani nacni toibsi cós. Né guioncani raniʼ ló Gudxlio». Per tipnés buñ ni ma bisuidy láani nanoy náyibu que apóstol Juan diti bicaʼ ngú, né por ngú diti non guieedni ló la Biblia. Por ejemplo, toib biblista ni laa Bruce M. Metzger goniʼ: «Diitzreʼ diti nigolúni, né [...] diti non guicaani ló Nuevo Testamento» (Ndeʼ bicaʼyibu ló testamento griego).

 Tipnés buñ ná: La Biblia raniʼ de espíritu santo suusi ñacni toib buñ, por ngú scá non guienno láani.

 Ni nigolú: Rioʼ ór ló la Biblia ritlaa que espíritu santo nacni xomod toib buñ. Por ejemplo, Jesús goniʼ que espíritu santo nacni xomod toib buñ «ni racné» (láaca rimbu buñ láani xomod paráclito). Goniʼbu que láani nagonésni, naniʼni, nacadiagni, nasuidyni galnigolú a xpiin Jesús, ñony xiroʼni Jesús né ñoʼ ni nadudyni a Jesús (Juan 16:7-15). Per ndeʼ diti radudy diitz que espíritu santo nacni toib buñ. Scúca rac órni raniʼni de galnan, galgoity né galkié (Proverbios 1:20; Romanos 5:17, 21). Por ejemplo, náni que galnan «rioʼ xiinni» né «ronyni dxiin» né láaca náni que galkié rachelni buñ, rasobladxni né ragaityni (Mateo 11:19; Lucas 7:35; Romanos 7:8, 11).

 Tipnés buñ ná: Órni buñ rionis, rony láani ló la espíritu santo; por ngú espíritu nacni toib buñ.

 Ni nigolú: Órni buñ rionis «ló la espíritu santo», radudyni diitz que buñ ni cayonis rien que Dios raquiin xcalnadip par gonybu ni nábu (Mateo 28:19).

 Tipnés buñ ná: Xpiin Jesús ni bibany ló dzú ni see, xomod apóstoles, bunyibu pensary que espíritu santo nacni toib buñ.

 Ni nigolú: Diti sieed ngú ló la Biblia nili caani ló libro xtuny buñgudxlio. Mod ná Encyclopædia Britannica, «buñ gosaló buny crer que Espíritu Santo nacni toib buñ ni nac xomod dios [...] ló Concilio de Constantinopla ni góc íz 381 después ni goity Cristo». Reunión reʼ gocni más de chopgayoʼ gorol íz después ni goity último apóstol xtuny Jesús.