Nllalhe ka benach, Jesús guke tu be bxin yaba ka ze galje ka benach lhau Yellʼlhiu (Juan 8:23). Guke bene nech ben bxe Jeoba nha guklhenhe leʼ par bxie yuge dan de yellʼlhiu. Kuin Dios bxie Jesús. Por denhi Biblia shnan dek «togueʼ» nhake Xhinʼ Dios (Juan 1:14). Por niche Jesús bdie xtille Dios, le Biblia nsie leʼ ka «Xtilla». Blhab Colosenses 1:15-17.

Dios bsele xhine lhau Yellʼlhiu. Par guk kaʼ bdie yelemban chie lu leʼ María, tu nhulwego judía. Por len, Jesús bit bzu tu xeʼ benach (Lucas 1:30-35). Leʼ bide lhau Yellʼlhiu par gunhe shone de llialhau: 1) Blhueide deliʼ de nhake che Dios, 2) leʼ blhueide dek wake gunchho kan shna Dios, lakse shtilchho de zed, nha 3) bnhexjwe yelemban chie sin dole xya par yezle chhio. Blhab Mateo 20:28.

Par yelha tu bene par bit sute leʼ lliaxj gaxjw tu de zake lhebze ka leʼ (Éxodo 21:29, 30). Yelegut nha den gaxochho bit nhaken kan chhaklhalle Dios par benach. Nezdchho denhi le Jeoba gulle Adán deke shi uxinje o shi bit uzenhage chie, nha gate. Shikaʼ leʼ bit bxinje, bit gute (Génesis 2:16, 17; 5:5). Kan shna Biblia, yelegut uxhen lhau yellʼlhiu por Adán. Wak nachho, dek Adán bdie xhin xhasue dole xya nha por niche len yuge dsate. Por len yugechho lliaxjdchho nhu yezla chhio lhau deki. Blhab Romanos 5:12; 5:18.

Naʼ, ¿nhuxhe wake yezle chhio lhau yelegut? Kate chhatchho, chyixjchho dole xya den dachho. Por niche yugechho nhakchho bene dole xya, nituchho ka gake chixjchho dole xya che bene yoblhe. Blhab Romanos 3:23.

Nllalhe ka chhio, Jesús bit bdape dole xya nha bitkse benhe da xinj. Por len bit chheyale gate por xtoleʼ, san gate par chixjwe che bene yoble. Kate bsele xhine par gate por chhio, Dios blhue dek zite chhekde che benach. Nha Jesús lekseka blhue dek chhekde chechho kate bzenhage che Xeʼ nha bnhexjwe yelemban chie par yezle chhio lhau dole xya nha yelegut. Blhab Juan 3:16; Romanos 5:18, 19.

Kate bzue lhau Yellʼlhiu, Jesús beyunhe bene chhak yillwe, bezbanhe bene wat nha guklhenhe bene chhesetil yelezi. Denhi blhuen ka den gunhe de ze za por benen chhunteze llin che Dios (Mateo 15:30, 31; Juan 5:28). Kate gut Jesús, Dios bezbanhe leʼ nha benhexjwe yelemban chie ka be bxin yaba (1 Pedro 3:18). Nhach Jesús blheze kuit Xeʼ katech bnhexjwe leʼ yelewak par nabie lhau Yellʼlhiu (Hebreos 10:12, 13). Nella, Jesús shnabie yaba, nha bene sjenhau leʼ chheselhueide dille wen che denhi dulhu Yellʼlhiu. Blhab Apocalipsis 11:15; Marcos 13:10.

Lhen yelewak den ba bnhexjw Dios leʼ, Rey walh nhi ba zu galze yenite bene malh nha yelezi den chhi yellʼlhiu. Yuge ben chhejle che Jesús nha chesezenhage chie yesenhite mbalhaz lhau Yellʼlhiu, kate yeyaken tu lhatje wen. Blhab Mateo 5:5.