Xhin xhesua Abrahán, Dios benhe leʼ tuze nha bnhexjwe leʼ zan ley. Yell nhi, den bsie Israel, sjengu lhau nheʼe sunxhenhe Dios tuliteze nha zunhe kan shna xtillen (Salmo 147:19, 20). Chhuxklen bene ki, yuge bene lle yuge yell lekseka wake zibanheze denhi. Blhab Hechos 3:25.

Dios bchhie bene israelitas kaʼ par sake testigʼo chie. Ka den guke che yell nhi shlhuen dek shi uzenhagchho che Xtille Dios nsan de wen par chhio (Deuteronomio 4:6). Por bene ki, zanch bene yoblhe wake sumbie Dios bene tuli.

Kate Israel, yell den ba bchhie, blliayeʼ den sjanhite wen lhen Dios, Jeoba beshen lhen benen kaʼ shjazenhau Cristo (Mateo 21:43; 23:37, 38). Por len nella, bene deliʼ chhune llin che Dios len sjanheke testigʼo chie age israelitas kaʼ. Blhab Hechos 15:14, 17.

Jesús bsie xnhezen kuinch bene sjasenhau leʼ sunhe llin den shjaselhueide bene dulhu yellʼlhiu nha sake txen leʼ (Mateo 10:7, 11; 24:14, TNM; Mateo 28:19, 20). Llin nhi ba zu yeyullen le ba zu galze yenit Dios de malh den chhi lhau yellʼlhiu. Jeoba chhetube zan bene duxhen Yellʼlhiu par sake txen religión de tuli (Apocalipsis 7:9, 10). Por niche sjanhake tuze, bene dzun llin che Dios chhak chhesetiplhalle nha tsaklhen ljwelle. Gateteze nhite, tuze de chhesezede kate chhezellage lhau reunión kaʼ. Blhab Hebreos 10:24, 25.

Denhi bxhen ka du iz 1870. Kanha tu chupe bene chhesezed Biblia beseillelde de tuli de za le Xtille Dios de ba bgashe zsha. Sjanezde dek Jesús bsie xnezen desde kanhite dek chheyale shjaselueide bene nha por len besezulhawe beselhueide lhau dulhu Yellʼlhiu dille wen che Yeleunabia che Dios. Desd iz 1931 sjansie leʼ Testigʼo che Jeoba. Blhab Hechos 1:8; 2:1, 4, 11; 5:42.

Lhau siglo nechh, benen sjasenhau Jesús ben sjanhite lhau zan yell besezie banhez dek sjanhite tu chupe bene chheseneyueide leʼ, bene ki beseyumbie Jesús ka bene ngu lhau nhaʼa congregación (Hechos 16:4, 5). Lekseka naʼ, lhen testigʼo che Jeoba sjanhitekze tu chupe bene sjanhejnhid, nha dille xtilh sjansie Cuerpo Gobernante, bene ki sjangu lhau nheʼe llin de chhak lhau sucursal den nhite dulhu yellʼlhiu. Lhau sucursal ki chheseidie dille yoblhe, chhesebeje nha chheseyise publicación par uzedchho Biblia lhau mas xon gayua dille. Benen sjanheke txen Cuerpo Gobernante chhesechinhe Biblia par dzun dipʼlhalle nha chhesewe nhez benen chhezellag lhau mas tu gayua galje mil congregación de lle dulhu yellʼlhiu, lhau deki nhitekze bene sjanejnhide nha chheselhue yelechhek par dzapeshie yell che Dios. Blhab 1 Pedro 5:2, 3.

Testigʼo che Jeoba sjansie xnezen par shjaselhueide dille wen den za le Biblia par ka bene sake leʼ txen. Kan bsun apóstoles ka, chheselhueide tu tu yoʼ (Hechos 20:20). Lekseka chhesezede Biblia lhen benen chhekde che de tuli. Per naʼ, lage sjanhake tu chupze bene parze chhesellage chhesezede Biblia, san naketo txen tu familh ga chhekde che ljwellto ka bishe zanto nha chhezito banhez chhapeshi Xato Jeoba nheto (2 Tesalonicenses 1:3). Nha por niche yuge bene wen llin che Dios tzunhe gazelhau par sunhe kan shna Dios nha dzaklhenhe bene yoblhe, por len bit zu familh bene nhite mbalhazech ka leʼ lhau Yellʼlhiu. Blhab 1 Pedro 2:9; Hechos 20:35.