ELVIV, e-Ukraine—Ihhovisi legatsha loFakazi BakaJehova e-Ukraine libika ukuthi ngo-June 17, 2014, kufe uFakazi oyedwa edolobheni elisempumalanga ye-Ukraine eKramatorsk lapho kuqhuma ibhomu eduze kwemoto yakhe. Abekho abanye oFakazi ababulewe noma abalimele ngenxa yezinxushunxushu ezikuleli zwe eziqale ezinyangeni ezimbalwa ezidlule. Nokho, amakhulu oFakazi akhishiwe ezindaweni ezithintekile empumalanga ye-Ukraine. Labo abakhishiwe ezindlini zabo bahlala emizini yabanye oFakazi.

Naphezu kwalezi zinxushunxushu eziqhubekayo, oFakazi base-Ukraine bayaqhubeka behlanganyela isigijimi seBhayibheli esiduduzayo nomakhelwane babo. Ngasekuqaleni kuka-June 2014, oFakazi babe nemihlangano emikhulu enokuthula eminingana empumalanga ye-Ukraine, eyayinezinkulumo ezisekelwe eBhayibhelini nemiboniso yezindlela zokusebenzisa iseluleko seBhayibheli ekuphileni kwansuku zonke. Kwaba nabantu abangaphezu kuka-5 200. OFakazi bazoba nemihlangano yesifunda engu-40 e-Ukraine naseCrimea, ezoqokomisa lokho okushiwo iBhayibheli ngekusasa elinokuthula ngaphansi koMbuso kaNkulunkulu. Kulindelwe abantu abangaphezu kuka-165 000 kule mihlangano kuhlanganise nabangu-7 500 eCrimea.

Media Contact(s):

International: J. R. Brown, Office of Public Information, tel. +1 718 560 5000

Ukraine: Vasyl Kobel, tel. +38 032 240 9323