NgoSepthemba 3, 2020, iNkantolo YeSifunda YaseVekilbazar eSifundazweni saseMary igwebe uMfoweth’ uMyrat Orazgeldiyev unyaka owodwa ejele ngenxa yokwenqaba kwakhe ubusosha ngenxa kanembeza. Uzofaka isikhalo.

UMyrat Orazgeldiyev

• Wazalwa: 2002 (eMary City)

• Umlando omfushane: Ubenza umsebenzi wokuba uweta ukuze asize ekondleni umndeni wakubo. Umama wakhe wamfundisa ngoJehova kusukela esemncane. Uyayithanda imidlalo nokubhala izingoma

Ihhovisi elibhalisa abazosebenza ebusosheni labiza uMfoweth’ u-Orazgeldiyev ukuze azongena ebusosheni ngoJuni 2020, ngemva kwenyanga eyodwa ehlanganise iminyaka engu-18 ubudala. UMfoweth’ u-Orazgeldiyev wachaza ukuthi akanakukwazi ukusebenza ebusosheni, wabe esecela ukuba bamnike omunye umsebenzi owenziwa amalungu omphakathi avamile.

NgoJulayi 1, 2020, amalungu amathathu avela ebuthweni lezempi azama ukuthatha uMfoweth’ u-Orazgeldiyev kubo. Wenqaba ukuhamba nawo. Kamuva ngalolo suku, uMfoweth’ u-Orazgeldiyev wahlolwa odokotela. Kwatholakala ukuthi uphile kahle ukuba angasebenza emasosheni.

NgoJulayi 14, 2020, ihhovisi likamshushisi labiza uMfoweth’ u-Orazgeldiyev ukuze lizomphenya ngemibuzo. Ngenyanga elandelayo, wabekwa icala kwase kubekwa usuku lokuqulwa kwalo.

Sithandaza sinokuqiniseka kokuthi uJehova uzoqhubeka emupha isibindi namandla uMfoweth’ u-Orazgeldiyev nabanye abafowethu abasebasha abayishumi abasejele.—IHubo 31:24.