Numeri 8:1-26
8 UJehova wakhuluma noMose, wathi:
2 “Khuluma no-Aroni uthi kuye, ‘Lapho ukhanyisa izibani, izibani eziyisikhombisa kufanele zikhanyise indawo ephambi kothi lwesibani.’” +
3 Ngakho u-Aroni wenza lokhu: Wakhanyisa izibani zalo ukuze zikhanyise indawo ephambi kothi lwesibani, + njengoba nje uJehova ayemyalile uMose.
4 Nansi indlela okwakwenziwe ngayo uthi lwesibani: Lwalwenziwe ngegolide kusetshenziswa isando; kusukela esiqwini salo kuya ezimbalini zalo lalenziwe ngesando. + Uthi lwesibani lwalwenziwe ngokuvumelana nombono + uJehova ayewubonise uMose.
5 UJehova waphinde wakhuluma noMose, wathi:
6 “Thatha amaLevi kuma-Israyeli, uwahlanze. +
7 Nansi indlela okufanele uwahlanze ngayo: Fafaza amanzi ahlanza isono phezu kwawo, kumelwe aphuce wonke umzimba, awashe izingubo zawo azihlanze nawo. +
8 Ngemva kwalokho azothatha ithole leduna + nomnikelo walo wokudla okusanhlamvu + kafulawa ocolekile oxutshwe namafutha, uzobe usuthatha elinye ithole leduna libe elomnikelo wesono. +
9 Kufanele ulethe amaLevi phambi kwetende lokuhlangana, uqoqele ndawonye yonke inhlangano yama-Israyeli. +
10 Lapho uletha amaLevi phambi kukaJehova, ama-Israyeli kufanele abeke izandla zawo phezu kwamaLevi. +
11 U-Aroni kumelwe anikele* amaLevi phambi kukaJehova njengomnikelo ozuliswayo + ovela kuma-Israyeli, futhi wona kumelwe enze inkonzo kaJehova. +
12 “AmaLevi ayobe esebeka izandla zawo phezu kwamakhanda ezinkunzi. + Ngemva kwalokho, anikele enye ibe umnikelo wesono nenye ibe umnikelo oshiswayo kuJehova ukuze wenzele amaLevi isihlawulelo. +
13 Uyomisa amaLevi phambi kuka-Aroni namadodana akhe, uwanikele* njengomnikelo ozuliswayo kuJehova.
14 Kumelwe uhlukanise amaLevi kuma-Israyeli, amaLevi abe ngawami. +
15 Ngemva kwalokho, amaLevi ayongena ayokhonza etendeni lokuhlangana. Yile ndlela okufanele uwahlanze ngayo nozowanikela* ngayo abe umnikelo ozuliswayo.
16 Anikwe mina njengezipho ezivela kuma-Israyeli. Ngizozithathela wona esikhundleni sabo bonke labo abangamazibulo* ama-Israyeli. +
17 Ngoba wonke amazibulo phakathi kwama-Israyeli angawami, kokubili abantu nezilwane. + Ngazingcwelisela wona ngosuku engabulala ngalo wonke amazibulo ezweni laseGibhithe. +
18 Ngizothatha amaLevi esikhundleni sawo wonke amazibulo aphakathi kwama-Israyeli.
19 U-Aroni namadodana akhe ngiyobanika amaLevi njengezipho ezivela kuma-Israyeli, ukuze enzele ama-Israyeli inkonzo etendeni lokuhlangana + futhi awenzele nesihlawulelo, ukuze kungabi bikho nhlupho eyehlela ama-Israyeli + ngenxa yokuthi asondela endaweni engcwele.”
20 UMose no-Aroni nayo yonke inhlangano yama-Israyeli bakwenza lokhu kumaLevi. Ngokuvumelana nakho konke uJehova ayemyale ngakho uMose ngokuphathelene namaLevi, yilokho ama-Israyeli akwenza kuwo.
21 Ngakho amaLevi azihlanza awasha nezingubo zawo, + ngemva kwalokho u-Aroni wawanikela* njengomnikelo ozuliswayo phambi kukaJehova. + U-Aroni wabe esewenzela isihlawulelo ukuze awahlanze. +
22 Ngemva kwalokho, amaLevi angena ukuze enze inkonzo yawo etendeni lokuhlangana phambi kuka-Aroni namadodana akhe. Njengoba nje uJehova ayemyalile uMose ngokuqondene namaLevi, benza kanjalo kuwo.
23 UJehova wakhuluma noMose, wathi:
24 “Yilokhu okusebenza kumaLevi: Owesilisa oneminyaka engu-25 kuya phezulu, uyongena eqenjini lalabo abasenkonzweni yetende lokuhlangana.
25 Kodwa uma esedlulile eminyakeni engu-50 ubudala, uyothatha umhlalaphansi eqenjini lenkonzo angabe esakhonza.
26 Angabakhonza abafowabo abenza imisebenzi etendeni lokuhlangana, kodwa akumelwe yena enze inkonzo khona. Yilokho okumelwe ukwenze ngokuphathelene namaLevi nezibopho zawo.” +
Imibhalo yaphansi
^ NgesiHebheru, “azulise,” okuwukuthi, awayise phambili nasemuva.
^ NgesiHebheru, “uwazulise,” okuwukuthi, uwayise phambili nasemuva.
^ NgesiHebheru, “nozowazulisa,” okuwukuthi, uwayise phambili nasemuva.
^ Noma, “labo abangamazibulo avula isizalo.”
^ NgesiHebheru, “wawazulisa,” okuwukuthi, wawayisa phambili nasemuva.
