Njengayo yonke imihlangano yebandla, umhlangano wenkonzo uyilungiselelo elivela kuJehova elisisiza ukuba sivuselelane uthando nemisebenzi emihle. (Heb 10:24, 25) Lo mhlangano kumelwe ube yimizuzu emihlanu noma eyisikhombisa ubude, uhlanganisa ukuhlela amaqembu, ukuhlela ukuthi iyiphi insimu ezosetshenzwa nokuthandaza. (Uma lo mhlangano ungemva kwemihlangano yebandla, kumelwe ube mfushane nakakhulu.) Oqhuba lo mhlangano kufanele alungiselele okungasiza labo abazoya ensimini ngalolo suku. Ngokwesibonelo, uma kunguMgqibelo, abaningi basuke bengazange babe khona ensimini phakathi nezinsuku, basuke begcine ngempelasonto edlule, kuhle ukucabangela okungaba usizo. Yiziphi ezinye izinto ongakhuluma ngazo ezingaba usizo?

• Ingxenye ethi Ongase Uxoxe Ngakho ethathwe encwajaneni ethi INcwajana YoMhlangano Wokuphila KobuKristu Nenkonzo Yethu

• Indlela ongakusebenzisa ngayo okusanda kwenzeka noma umbiko wezindaba ukuze uqale ingxoxo

• Indlela ongaphendula ngayo umuntu ophikisa ngendlela evamile

• Indlela ongaphendula ngayo umuntu ongakholelwa kuNkulunkulu, okholelwa ekuziphendukeleni kwemvelo, okhuluma olunye ulimi noma umuntu osonta esontweni elingajwayelekile endaweni yangakini

• Indlela yokusebenzisa i-jw.org, i-JW Library^® noma iBhayibheli

• Indlela yokusebenzisa amathuluzi aseBhokisini Lamathuluzi Okufundisa

• Indlela yokusebenzisa ezinye izindlela zokushumayela njengokufakaza ngocingo, ukubhala izincwadi, ukufakaza obala, ukwenza izimpindelo noma ukuqhuba izifundo zeBhayibheli

• Izikhumbuzo zokuphepha, ukuvumelana nezimo, ukuphatha kahle abanye, isimo sengqondo esihle noma okunye okufana nalokhu

• Isifundo noma ividiyo ethathwe encwajaneni ethi Zimisele Ekufundeni Nasekufundiseni

• Indlela yokukhuthaza nokusiza osebenza naye ensimini

• Umbhalo okhuluma ngenkonzo noma indaba ekhuthazayo etholakale enkonzweni yasensimini