Kweyesi-2 Korinte 12:2, 3, uPawulu ukhuluma ngendoda ethile ‘eyathathwa yayiswa ezulwini lesithathu.’ Yayingubani leyo ndoda? Lapho ebhalela ibandla laseKorinte, uPawulu wagcizelela ukuthi uNkulunkulu wayesebenzisa yena njengomphostoli. (2 Kor. 11:5, 23) Wabe esekhuluma ‘ngemibono nezambulo zeNkosi.’ Kulokhu, uPawulu akazange akhulume ngabanye abafowabo. Ngakho, kunengqondo ukuphetha ngokuthi nguye le ndoda ayekhuluma ngayo eyayibona imibono nezambulo.—2 Kor. 12:1, 5.

UPawulu nguye “owathathwa wayiswa ezulwini lesithathu” futhi “wathathwa wayiswa epharadesi.” (2 Kor. 12:2-4) Wasebenzisa igama elithi ‘izambulo,’ elibonisa ukuthi wayambulelwe ngalokho okwakuzokwenzeka esikhathini esizayo.

Yini uPawulu ayibona ‘iyizulu lesithathu’?

EBhayibhelini, ‘izulu’ lingasho umkhathi noma isibhakabhaka. (Gen. 11:4; 27:28; Math. 6:26) Kodwa ‘izulu’ libuye libhekisele nakwezinye izinto. Ngezinye izikhathi lichaza ukubusa kwabantu. (Dan. 4:20-22) Lingabhekisela nasekubuseni kukaNkulunkulu esebenzisa uMbuso wakhe.—IsAm. 21:1.

UPawulu uthi wabona ‘izulu lesithathu.’ Wayesho ukuthini? Ngezinye izikhathi iBhayibheli liphinda into kathathu ukuze liyigcizelele, libonise ukubaluleka kwayo noma ukuze liyenze ibe nesisindo. (Isaya 6:3; Hez. 21:27; IsAm. 4:8) Kubonakala sengathi njengoba uPawulu ayekhuluma ‘ngezulu lesithathu,’ wayechaza ububusi obusezingeni eliphakeme kakhulu—uMbuso kaMesiya, okuzobusa kuwo uJesu Kristu nabangu-144 000. (Bheka i-Insight on the Scriptures, uMqulu 1, kk. 1059, 1062.) Umphostoli uPetru wabhala ukuthi silindele “amazulu amasha” esiwathenjiswe uNkulunkulu.—2 Pet. 3:13.

“Ipharadesi” uPawulu akhuluma ngalo lona lisho ukuthini?

Igama elithi “ipharadesi” nalo lingasho izinto ezihlukahlukene: (1) Uma sicabanga ngekhaya lokuqala labantu, kunengqondo ukuphetha ngokuthi “ipharadesi” lingasho iPharadesi elingokoqobo elizoba khona emhlabeni. (2) Lingasho nesimo esikhethekile sokuthula esivela kuJehova abantu baKhe abazosijabulela ezweni elisha. (3) Ngaphezu kwalokho, lingasho nezimo ezimangalisayo zasezulwini, “epharadesi likaNkulunkulu” okukhulunywa ngalo encwadini yesAmbulo 2:7.—Bheka INqabayokulinda kaJulayi 15, 2015, k. 5, isigaba 8.

Kungenzeka ukuthi kweyesi-2 Korinte 12:4, uPawulu wayebhekisela kuzo zontathu lezi zincazelo lapho echaza lokho akubona.

Ngamafuphi:

‘Izulu lesithathu’ okukhulunywa ngalo kweyesi-2 Korinte 12:2, cishe “amazulu amasha” okuwuMbuso kaMesiya okuzobusa kuwo uJesu Kristu kanye nabangu-144 000.—2 Pet. 3:13.

Lo Mbuso ‘uyizulu lesithathu’ ngenxa yokuthi uyidlula yonke eminye futhi uphakeme kakhulu.

“Ipharadesi” uPawulu ‘athathwa wayiswa’ kulo embonweni cishe libhekisela (1) ePharadesi elingokoqobo elizoba khona emhlabeni, (2) esimweni esikhethekile sokuthula esivela kuJehova abantu baKhe abayosijabulela, esiyoba sikhulu kunalesi esisijabulela manje, (3) ‘nasepharadesi likaNkulunkulu’ lasezulwini elizoba khona ngesikhathi esifanayo nezwe elisha emhlabeni.

Ngenxa yalokho, izwe elisha lizokwakhiwa amazulu amasha nomhlaba omusha. Kuyoba ilungiselelo elisha, elihlanganisa kokubili uMbuso owuhulumeni wasezulwini kanye nesintu esikhonza uJehova emhlabeni oyipharadesi.