Kubonakala bungekho ubulungisa lapho abantu abalungile behlupheka. Kungase kubonise nokuthi akusizi ngalutho ukuba ngumuntu olungile.

Abanye abantu bakholelwa ukuthi umuntu uyafa aphinde azalwe. Bathi labo ababenza izinto ezinhle baphinde bazalwe bese bephila ukuphila okungcono kunokwangaphambili, kanti labo ababenza izinto ezimbi bazalelwa esimweni esinzima kakhulu sokuphila. Ngokwale nkolelo, ngisho nomuntu olungile angahlupheka uma ayenza izinto ezimbi “ekuphileni kwakhe kwangaphambili.” Kodwa . . .

• Lokho kuhlupheka kungafeza yiphi injongo uma umuntu okuthiwe uphinde wazalwa engakukhumbuli ukuphila kwakhe kwangaphambili?

• Kungani sizikhandla ngokuhlala sinempilo futhi sigwema izingozi uma inhlalakahle yethu ngokwezinga elikhulu inqunywa izinto esazenza ekuphileni kwangaphambili?

  FUNDA OKWENGEZIWE

  Bukela ividiyo ethi: Kungani UNkulunkulu Evumela Ukuhlupheka? ku-jw.org/zu.

Ukuhlupheka akusona isijeziso esivela kuNkulunkulu.

Ngokuphambene nalokho, okuningi kwakho kwenzeka kungalindelekile​—ngokuvamile kuba ukuthi umuntu usendaweni engafanele ngesikhathi esingafanele.

“Ukuphumelela umncintiswano akuyi ngabanejubane, noma impi ngabanamandla, noma ukudla ngabahlakaniphileyo, noma ingcebo, ngabaqondayo, ngisho nalabo abanolwazi abawutholi umusa; ngoba isikhathi nesenzakalo esingalindelekile sibehlela bonke.”​—UMSHUMAYELI 9:11.

Ukuzalwa kwethu sinesono kunomthelela ekuhluphekeni kwethu.

Abantu ngokuvamile basebenzisa igama elithi “isono” lapho bebhekisela esenzweni esibi esenziwe othile. Nokho, iBhayibheli liphinde lilisebenzise ekuchazeni isimo bonke abantu​—abalungile nabangalungile—​abasizuza njengefa.

“Ngazalwa ngezinseka nginesiphambeko, umama wangikhulelwa esonweni.”​—IHUBO 51:5.

Isono esazalwa naso siye saba nemiphumela edabukisayo kubantu.

Asizange nje silimaze ubuhlobo bethu noMdali wethu kodwa sibangele ukuba senze ngokuphambene nayo yonke indalo kaNkulunkulu. Lokho kuphumele ekuhluphekeni okukhulu kwabantu ngabanye nalo lonke uhlanga lwesintu.

“Lapho ngifisa ukwenza okuhle, kukhona okubi kimi.”​—ROMA 7:21.

“Indalo iyaqhubeka ibubula kanyekanye futhi isezinhlungwini kanyekanye.”​—ROMA 8:22.