Imali eyasetshenziselwa impi ngo-2022 emhlabeni wonke isifinyelele emadoleni (U.S.) angu-2.24 trillion, okokuqala ngqa ifinyelela kuleli nani njengoba iRussia ihlasela i-Ukraine. Nakhu okwenzeka ngo-2022 okwavezwa umbiko okhishwe i-Stockholm International Peace Research Institute (SIPRI) ngo-Ephreli 2023:

•   Imali echithwe iYurophu empini “ikhuphuke ngamaphesenti angu-13 ngonyaka, okube inani elikhulu kunawo wonke lemali eyake yasetshenziswa ngonyaka eYurophu kusukela ngo-1991.”

•   “IRussia . . . imali eyisebenzisile yenyuke ngamaphesenti angaba ngu-9.2, okuyisuse endaweni yesihlanu yaba izwe lesithathu kwachithe imali eningi kwezempi.”

•   I-United States ilokhu ihola phambili ngokuchitha imali eningi empini, “isebenzise imali engamaphesenti angu-39 empini.”

 “Izindodla zezimali ezichithwe kwezempi eminyakeni yamuva ziwuphawu lokuthi siphila ezweni elingalondekile,” kusho uDkt. Nan Tian, ongomunye wababhali bombiko we-SIPRI.

 IBhayibheli labikezela ngokwanda kwezingxabano phakathi kwemibuso yezwe enamandla namuhla futhi lembula okuwukuphela kwekhambi lokuba nokuthula.

•   IBhayibheli libiza isikhathi esiphila kuso ngokuthi ‘isikhathi sokuphela.’—Daniyeli 8:19.

•   Incwadi kaDaniyeli yabikezela ukuthi phakathi naleso sikhathi kuyoba nemibango yokubusa. Imibuso yezwe “iyongqubuzana” noma ilwe, ibanga amandla. Lokhu kulwa kuhilela ukusetshenziswa “komcebo” omningi, noma kwezimali.—Daniyeli 11:40, 42, 43.

 Ukuze ufunde kabanzi ngalesi siprofetho seBhayibheli, bukela ividiyo ethi Isiprofetho Esigcwalisekile—Daniyeli ISahluko 11.

•   IBhayibheli lithi uNkulunkulu uzobakhipha ohulumeni babantu. “Uyomisa umbuso ongeke neze ubhujiswe. Lo mbuso ngeke udluliselwe kwabanye abantu. Uyophihliza yonke le mibuso uyiqede, wona wodwa ume kuze kube phakade.”—Daniyeli 2:44.

•   Kungekudala, uJehova a uNkulunkulu uzokwenza into abantu abangeke bakwazi ukuyenza—uzoletha ukuthula kwangempela okuyohlala unomphela. Kanjani? UMbuso wakhe wasezulwini uzoqeda zonke izikhali nalo lonke udlame.—IHubo 46:8, 9.

 Ukuze ufunde okwengeziwe ngalokho okuyofezwa uMbuso kaNkulunkulu, funda isihloko esithi “Lapho Sekubusa UMbuso KaNkulunkulu, ‘Kuyochichima Ukuthula.’”